ప్రజల సొమ్ముతో విగ్రహాలా.. కరుణానిధి విగ్రహ ఏర్పాటుకు నో చెప్పిన సుప్రీంకోర్టు

తమిళనాడు దివంగత ముఖ్యమంత్రి, డీఎంకే వ్యవస్థాపకులు ఎం. కరుణానిధి విగ్రహ ఏర్పాటు విషయంలో సుప్రీంకోర్టు కీలక వ్యాఖ్యలు చేసింది. ప్రజల డబ్బుతో.. నేతల కీర్తిని ప్రచారం చేసేలా చేపట్టే చర్యల పట్ల తీవ్ర అసహనం వ్యక్తం చేసింది. ఈ క్రమంలోనే ప్రజల సొమ్ముతో కరుణానిధి విగ్రహాన్ని ఏర్పాటు చేయాలనుకున్న ఎంకే స్టాలిన్ నేతృత్వంలోని తమిళనాడు ప్రభుత్వం తీసుకున్న నిర్ణయంపై సుప్రీంకోర్టు తీవ్రంగా ఆగ్రహించింది. ఈ సందర్భంగా విగ్రహాల ఏర్పాటుపై మద్రాస్ హైకోర్టు ఇచ్చిన ఉత్తర్వులను సమర్థించిన సుప్రీంకోర్టు.. ఈ వ్యవహారంలో విగ్రహం ఏర్పాటు చేయాలని తమిళనాడు ప్రభుత్వం పెట్టుకున్న పిటిషన్‌ను వెనక్కి తీసుకోవాలని సూచించింది. ఈ వ్యవహారంలో మద్రాస్ హైకోర్టును ఆశ్రయించాలని స్టాలిన్ సర్కార్‌కు తెలిపింది.

తిరునల్వేలి జిల్లాలోని ప్రధాన రహదారిపై వల్లీయూర్ డైలీ వెజిటేబుల్ మార్కెట్ మెయిన్ గేట్ వద్ద కరుణానిధి కాంస్య విగ్రహంతోపాటు.. నేమ్ బోర్డు ఏర్పాటు చేయాలని తమిళనాడు ప్రభుత్వం నిర్ణయం తీసుకుంది. ఇందుకు అనుమతి ఇవ్వాలని సుప్రీంకోర్టును స్టాలిన్ ప్రభుత్వం విజ్ఞప్తి చేసింది. ఈ పిటిషన్‌పై విచారణ జరిపిన సుప్రీంకోర్టు న్యాయమూర్తులు.. జస్టిస్ విక్రమ్ నాథ్, జస్టిస్ ప్రశాంత్ కుమార్ మిశ్రాలతో కూడిన ద్విసభ్య ధర్మాసనం దాన్ని తీవ్రంగా ఖండించింది.

బహిరంగ ప్రదేశాల్లో నేతల విగ్రహాలను ఏర్పాటు చేయడానికి అనుమతి నిరాకరిస్తూ మద్రాస్ హైకోర్టు ఇచ్చిన తీర్పును.. ఈ సందర్భంగా సుప్రీంకోర్టు సమర్థించింది. అయితే గతంలో మద్రాసు హైకోర్టు ఇచ్చిన ఉత్తర్వుల్లో.. ఇలాంటి విగ్రహాల ఏర్పాటు కారణంగా రోడ్లపై ట్రాఫిక్ ఇబ్బందులు ఏర్పడి.. వాహనదారులు, స్థానికులు, ప్రజలకు తీవ్ర అసౌకర్యం కలుగుతుందని వెల్లడించింది. రాజ్యాంగం ప్రకారం పౌరుల హక్కులను రక్షించాలని.. ఇలాంటి అనుమతులపై సుప్రీంకోర్టు నిషేధం విధించినపుడు.. రాష్ట్ర ప్రభుత్వం ఆమోదం తెలపకూడదని ఇప్పటికే మద్రాస్ హైకోర్టు తేల్చి చెప్పింది.

విగ్రహాల ఏర్పాటు వ్యవహారంలో మద్రాస్ హైకోర్టు ఇచ్చిన ఈ ఉత్తర్వులను సుప్రీంకోర్టు గుర్తు చేసింది. అదే సమయంలో రాజకీయ నేతల స్మారక చిహ్నాల కోసం.. ప్రజల డబ్బును ఉపయోగించడంపై దేశవ్యాప్తంగా తీవ్ర చర్చలు జరుగుతున్న వేళ.. సుప్రీంకోర్టు చేసిన వ్యాఖ్యలు తీవ్ర ప్రాధాన్యాన్ని సంతరించుకున్నాయి.