మండపాల్లో రాత్రి 12 గంటల వరకూ లౌడ్‌స్పీకర్లకు అనుమతి.. సీఎం కీలక ప్రకటన

రామ్‌లీలా, దుర్గాపూజ మండపాలు, దసరా నవరాత్రి ఉత్సవాల సందర్భంగా జరిగే ఇతర మతపరమైన వేడుకల్లో లౌడ్‌స్పీకర్లును అర్ధరాత్రి వరకు వినియోగించుకోవచ్చని ఢిల్లీ ముఖ్యమంత్రి రేఖా గుప్తా వెల్లడించారు. రాత్రి 10 గంటల తర్వాత లౌడ్‌స్పీకర్లపై ఉన్న నిషేధాన్ని రెండు గంటల సడలించినట్టు ఢిల్లీ ప్రభుత్వం ప్రకటించింది. ఢిల్లీ ముఖ్యమంత్రి రేఖా గుప్తా మాట్లాడుతూ.. ‘హిందూ పండుగలు ఎప్పుడూ ఇబ్బందులు ఎదుర్కొంటున్నాయని నేను గమనించాను.. రామ్‌లీలా లేదా దుర్గాపూజలను రాత్రి 10 గంటల్లోపు ముగించలేం.. గుజరాత్‌లో రాత్రంతా దాండియా ఆడుతారు.. ఇతర రాష్ట్రాల్లో కొన్ని కార్యక్రమాలు రాత్రి మొత్తం కొనసాగుతాయి.. మరి ఢిల్లీ ప్రజలు కూడా అలా ఎందుకు జరుపుకోకూడదు? కాబట్టి ఈసారి రామ్‌లీలా, దుర్గాపూజా, సాంస్కృతిక-మతపరమైన పండుగలను రాత్రి 12 గంటల వరకూ జరుపుకోవచ్చు’ అని ఢిల్లీ సీఎం అన్నారు.

ఢిల్లీలోని బహిరంగ ప్రదేశాల్లో లౌడ్‌స్పీకర్లపై రాత్రి 10 గంటల నుంచి ఉదయం 6 గంటల వరకు నిషేధం అమల్లో ఉంటుంది. దేశ రాజధానిలో ఎక్కడైనా లౌడ్ స్పీకర్లను ఉపయోగించాలంటే ముందస్తు అనుమతి తప్పనిసరి అని ఢిల్లీ పోలీసులు ఈ ఏడాది ఆరంభంలో ఉత్తర్వులు జారీ చేశారు. కాగా, 2023లోనూ అరవింద్ కేజ్రీవాల్ నేతృత్వంలోని ఆమ్ ఆద్మీ పార్టీ ప్రభుత్వం సైతం ఇటువంటి సడలింపు ఇచ్చింది. రామ్‌లీలా వేదికలు, దుర్గాపూజా మండపాల్లో లౌడ్‌స్పీకర్ల వినియోగానికి అర్ధరాత్రి వరకు అనుమతి ఇచ్చింది.

ప్రధాని నరేంద్ర మోదీ పుట్టినరోజు సందర్భంగా సేవా పఖ్వాడాలో భాగంగా ఢిల్లీ ముఖ్యమంత్రి మంగళవారం జరిగిన పారిశుద్ధ్య కార్యక్రమంలో పాల్గొన్నారు. ఈ సందర్భంగా పార్టీ కార్యకర్తలు తన ఫోటోలతో కూడిన పోస్టర్లను ఏ ప్రభుత్వ కార్యాలయాలు, సంస్థల గోడలపైనా అతికించవద్దని కూడా ఆమె కోరారు. ‘గోడలపై రాతలు, పోస్టర్లు అతికించి ఆస్తులను పాడు చేయడం చాలా పెద్ద నేరం... ఇది నగరాన్ని చెత్తగా మారుస్తుంది.. ముఖ్యంగా రాజకీయ నాయకులు ఎటువంటి ఆస్తులను ధ్వంసం చేయడాన్ని నేను సహించబోం... నా ఫోటోతో పోస్టర్లు అతికించే ధైర్యం చేయకండి’ అని ఆమె హెచ్చరించారు.