సుకన్య యోజన, పీపీఎఫ్ సహా పోస్టాఫీసు స్కీమ్స్ కొత్త వడ్డీ రేట్లు

మీరు పోస్టాఫీసు పొదుపు పథకాలైన సుకన్య సమృద్ధి యోజన, పబ్లిక్ ప్రావిడెంట్ ఫండ్, మంత్లీ ఇన్‌కమ్ స్కీమ్ వంటి వాటిల్లో ఇన్వెస్ట్ చేస్తున్నారా? అయితే మీకో అలర్ట్. కేంద్ర ఆర్థిక మంత్రిత్వ శాఖ తాజాగా కొత్త వడ్డీ రేట్లను ప్రకటించింది. అక్టోబర్-డిసెంబర్ 2025 త్రైమాసికానికి గానూ వడ్డీ రేట్లను ప్రకటించింది. అయితే, పీపీఎఫ్, ఎస్ఎస్‌వై, ఎస్‌సీఎస్ఎస్, ఎన్‌ఎస్‌సీ వంటి స్మాల్ సేవింగ్స్ స్కీమ్స్ వడ్డీ రేట్లలో ఎలాంటి మార్పులు చేయకుండా యథాతథంగా కొనసాగిస్తున్నట్లు తెలిపింది. వరుసగా ఏడో త్రైమాసికాలుగా వడ్డీ రేట్లను మార్చకపోవడం గమనార్హం. ప్రస్తుతం ఏ స్కీమ్‌లో ఎంత వడ్డీ వస్తుంది? అనే పూర్తి వివరాలు తెలుసుకుందాం.

'ఈ ఆర్థిక సంవత్సరం 2025-26 మూడో త్రైమాసికంలో వివిధ చిన్న మొత్తాల పొదుపు పథకాల వడ్డీ రేట్లను కేంద్ర ప్రభుత్వం నిర్ణయించింది, సవరించిన కొత్త వడ్డీ రేట్లు 2025 అక్టోబర్ 1వ తేదీ నుంచి 2025 డిసెంబర్ 31 వరకు అమలులో ఉంటాయి. ఈసారి వడ్డీ రేట్లలో ఎలాంటి మార్పులు లేవు. రెండో త్రైమాసికం జూలై- సెప్టెంబర్ వరకు ఉన్న వడ్డీ రేట్లే ఈ త్రైమాసికంలోనూ కొనసాగుతాయి.' కేంద్ర ఆర్థిక మంత్రిత్వ శాఖ నోటీఫికేషన్లో పేర్కొంది.

కొత్త వడ్డీ రేట్లు ఇలా..

పబ్లిక్ ప్రానిడెంట్ ఫండ్ స్కీమ్ లేటెస్ట్ వడ్డీ రేట్లు 7.1 శాతంగా ఉన్నాయి. ఇది ఒక లాంగ్ టర్మ్ సేవింగ్స్ స్కీమ్. రిటైర్మెంట్ కోసం ఎంచుకోవచ్చు.

సీనియర్ సిటిజన్లు మంచి వడ్డీ రేటుతో పొదుపు చేసుకునేందుకు సీనియర్ సిటిజన్ సేవింగ్స్ స్కీమ్ ఉపయోగపడుతుంది. ప్రస్తుతం ఈ పథకంలో వడ్డీ రేటు 8.2 శాతంగా ఉంది.

సుకన్య సమృద్ధి యోజన పది సంవత్సరాల లోపు ఉండే ఆడ పిల్లల పేరుపై పొదుపు చేసేందుకు ఈ స్కీమ్ ఉపయోగపడుతుంది. ప్రస్తుతం ఇందులో వడ్డీ రేటు 8.2 శాతంగా ఉంది.

నేషనల్ సేవింగ్స్ సర్టిఫికేట్ స్కీమ్ వడ్డీ రేటు 7.7 శాతంగా ఉంది.

పోస్టాఫీస్ మంత్లీ ఇన్‌కమ్ స్కీమ్ అనేది నెలవారీ ఆదాయం కోరుకునే వారికి మంచి మార్గం. ప్రస్తుతం ఇందులో 7.4 శాతం వడ్డీ లభిస్తోంది.

కిసాన్ వికాస్ పత్ర స్కీమ్ ద్వారా ప్రస్తుతం 7.5 శాతం వడ్డీ ఇస్తున్నారు.

ఇక ఏడాది ఫిక్స్‌డ్ డిపాజిట్లపై 6.9 శాతం వడ్డీ ఆఫర్ చేస్తున్నారు.

రెండేళ్ల ఫిక్స్‌డ్ డిపాజిట్లకు 7 శాతం వడ్డీ లభిస్తోంది.

3 ఏళ్ల ఫిక్స్‌డ్ డిపాజిట్లపై 7.10 శాతం వడ్డీ వస్తోంది.

5 ఏళ్ల టర్మ్ డిపాజిట్లపై 7.5 శాతం వడ్డీ ఇస్తున్నారు.

ఇక 5 సంవత్సరాల రికరింగ్ డిపాజిట్లపై వడ్డీ రేటు 6.7 శాతంగా ఉంది.