మరోసారి టమాటా వైరస్ కలకలం.. 12 ఏళ్లలోపు చిన్నారులు జరభద్రం

మధ్యప్రదేశ్‌లో కొత్తరకం టమాటా వైరస్ కలకలం సృష్టిస్తోంది. భోపాల్ నగరంలోని పాఠశాలల్లో చదువుతోన్న చిన్నారుల్లో ఎక్కువగా ఈ వైరస్ వ్యాప్తి చెందడంతో ఆందోళన నెలకుంది. ఈ వైరస్ బారినపడిన చిన్నారుల శరీరం, చేతులు, పాదాలు, అరికాళ్లు, మెడ కింద, నోటిలో ఎర్రటి దద్దుర్లుగా మొదలై.. తర్వాత పెద్ద బొబ్బలుగా మారుతున్నాయి. దురద, మంట, నొప్పితో పాటు జ్వరం, గొంతునొప్పి వంటి లక్షణాలు బయటపడుతున్నాయి. ఒకరి నుంచి ఒకరికి వ్యాపించే ఈ వైరస్ విషయంలో అప్రమత్తంగా ఉండాలని అధికారులు సూచించారు. ఈ వైరస్ ఈ లక్షణాలతో బాధపడే చిన్నారులను స్కూళ్లకు పంపొద్దని తల్లిదండ్రులను పాఠశాల యాజమాన్యాలు అప్రమత్తం చేస్తున్నాయి.

వైరస్ గురించి పీడియాట్రిషియన్ మాట్లాడుతూ.. ‘‘ఈ టమోటా ఫ్లూ వైరస్‌ను హ్యాండ్, ఫుట్‌, మౌత్‌ డిసీజ్‌ (HFMD) అంటారు. ఎచినోకాకస్, కాక్స్‌సాకీ అనే వైరస్ వల్ల ఇది వ్యాప్తి చెందుతుంది.. 6 నెలల నుంచి 12 సంవత్సరాల వయసున్న చిన్నారుల్లో ఇది ఎక్కువగా వ్యాపిస్తుంది’’ అని చెప్పారు. అయితే, ఇది సాధారణ సమస్యేనని, పెద్దగా ఆందోళన పడాల్సిన అవసరం లేదని ఆయన అన్నారు. ఎటువంటి ప్రత్యేక చికిత్స అవసరం లేదని, వారం, పది రోజుల్లో ఈ వైరస్ దానంతట అదే తగ్గిపోతుందని చెప్పారు.

ఈ వైరస్‌ చాలావరకు మలవిసర్జన తర్వాత చేతులు శుభ్రంగా కడుక్కోకపోవడం, పరిశుభ్రత పాటించకపోవడం వల్ల వ్యాపిస్తుంది. వైరస్ బాధితులు దగ్గినప్పుడు, తుమ్మినప్పుడు వచ్చే తుంపర్ల ద్వారాను ఒకరి నుంచి మరొకరికి సోకుతుంది. అలాగే, లాలాజలం వంటి శరీర స్రావాలతోనూ ఇతరులకు ఈ వైరస్ సంక్రమిస్తుంది. టమాటా ఫ్లూ సోకిన 3 నుంచి 6 రోజుల్లో లక్షణాలు బయటపడతాయి. ఈ వ్యాధికి ఎటువంటి ప్రత్యేకమైన చికిత్సా విధానం లేదు. గుండె, ఊపిరితిత్తులు, ఇతర జన్యు సంబంధిత అనారోగ్యంతో బాధపడే చిన్నారులకు అత్యంత అప్రమత్తతతో చికిత్స అందిస్తుంటారు. దేశంలో తొలిసారి ఈ వైరస్‌ 2022 మే నెలలో కేరళలో వెలుగుచూసింది. తర్వాత తమిళనాడు, ఒడిశా, ఉత్తర్ ప్రదేశ్ వంటి రాష్ట్రాల్లో టమాటా వైరస్ కేసులు బయటపడ్డాయి.