సెంట్రల్ జైల్లో ఘనంగా ఖైదీ బర్త్‌డే.. మెడలో యాపిల్ దండ వేస్కొని మరీ కేక్ కటింగ్

బెంగళూరులోని పరప్పన అగ్రహార కేంద్ర కారాగారంలో ఎవరూ ఊహించని ఓ సంఘటన జరిగింది. జైల్లో ఉంటూ శిక్షను అనుభవిస్తున్న ఓ అండర్‌ ట్రయల్ ఖైదీ, రౌడీషీటర్.. తన పుట్టినరోజు వేడుకలను చాలా ఘనంగా చేసుకున్నాడు. మెడలో యాపిల్ పండ్ల దండ వేసుకుని మరీ.. కేక్ కట్ చేశాడు. ప్రస్తుతం ఇందుకు సంబంధించిన వీడియో నెట్టింట వైరల్ అవుతుండడంతో.. అప్రమత్తమైన అధికారులు వెంటనే విచారణకు ఆదేశించారు. జైలు నిబంధనలను ఉల్లంఘించి ఈ వేడుకలు జరుపుకోవడం, దాన్ని వీడియోగా తీసి సోషల్ మీడియాలో పోస్ట్ చేయడంతో జైలు భద్రతా పర్యవేక్షణపై తీవ్ర ఆందోళనలు వ్యక్తం అవుతున్నాయి. అసలు అధికారుల అనుమతి లేకుండానే జైల్లోకి కేక్, ఫోన్ వచ్చిందా అని అంతా ప్రశ్నిస్తున్నారు.

50 సెకన్ల నిడివి గల ఈ వీడియో క్లిప్‌లో.. శ్రీనివాస అలియాస్ గుబ్బాచ్చి సీనా అనే ఖైదీ తన సహచరుల సమక్షంలో ఘనంగా పుట్టిన రోజు జరుపుకున్నాడు. తోటి ఖైదీలను పిలిచి వారందరి మధ్య నిలబడి మరీ కేట్ కట్ చేశాడు. తోటి వాళ్లంతా చప్పట్లు కొడుతూ, ఈలలు వేస్తూ సందడి చేయగా.. గుబ్బాచ్చి సీనా యాపిల్ పండ్లతో చేసిన దండను మెడలో ధరించి వేడుకల్లో పాల్గొన్నాడు. ఈ దృశ్యాలను తోటి ఖైదీల్లో ఒకరు మొబైల్ ఫోన్ ద్వారా చిత్రీకరించి.. ఆ తరువాత దాన్ని సోషల్ మీడియాలో అప్‌లోడ్ చేసినట్లు తెలుస్తోంది.

అయితే జైలు నిబంధనల ప్రకారం ఖైదీలు మొబైల్ ఫోన్‌ల వాడడాన్ని పూర్తిగా నిషేధించినప్పటికీ.. వారు ఎలా వీడియో రికార్డు చేశారనే దానిపై పెద్ద ఎత్తున ప్రశ్నలు లేవనెత్తుతున్నాయి. అలాగే బయట నుంచి వారికి కేక్ ఎవరు తీసుకెళ్లి ఇచ్చారు, ఫోన్ ఎవరిచ్చారు, వీడియో తీసి మరీ సోషల్ మీడియాలో ఎవరు పోస్ట్ చేశారని అందరూ ప్రశ్నిస్తున్నారు. ముఖ్యంగా ఈ వీడియో చూసి అప్రమత్తమైన అధికారులు.. వీడియో రికార్డ్ చేయడం, కేక్, దండ వంటి వస్తువులను లోపలికి తీసుకురావడంపై దర్యాప్తు చేస్తున్నారు.

గుబ్బాచ్చి సీనా.. జనవరి నెలలో బెంగళూరులోని దొడ్డబొమ్మాసంద్రకు చెందిన తన ప్రత్యర్థి వెంకటేశును హత్య చేశాడు. ఆపై అక్కడి నుంచి పారిపోయాడు. కానీ రంగంలోకి దిగిన పోలీసులు నిందితుడిని గుర్తించి ఫిబ్రవరిలో అరెస్టు చేశారు. అరెస్టు సమయంలో సీనా పోలీసులపై దాడికి ప్రయత్నించగా.. అతడిపై కాల్పులు జరిపి మరీ పోలీసులు అదుపులోకి తీసుకున్నారు. అప్పటి నుంచి సీనాను పరప్పన అగ్రహార జైలులో రిమాండ్‌లో ఉంచారు.