లక్ష డాలర్లు స్కాలర్‌షిప్‌ వచ్చినా వేస్ట్.. భారతీయ విద్యార్థికి వీసా రిజెక్ట్

భారత్‌కు చెందిన కౌశిక్ రాజ్ అనే 27 ఏళ్ల విద్యార్థికి అమెరికాలో అరుదైన అవకాశం దక్కింది. ప్రపంచంలోనే టాప్ యూనివర్సిటీల్లో ఒకటైన కొలంబియా యూనివర్సిటీలో జర్నలిజం చదవడానికి ఏకంగా 100,000 డాలర్లు (దాదాపు రూ.88 లక్షలు) స్కాలర్‌షిప్ వచ్చింది. అయితే, ఈ కల నెరవేరే సమయంలోనే అతనికి అమెరికా ఇమ్మిగ్రేషన్ ఆఫీసర్ల నుంచి భారీ షాక్ తగిలింది. అమెరికా స్టూడెంట్ వీసా దరఖాస్తును రిజెక్ట్ చేస్తూ అతనికి లెటర్ పంపారు. దీంతో స్కాలర్‌షిప్‌తో హాయిగా అమెరికాలో చదువుకోవచ్చని భావించిన కౌశిక్ కల నీరుగారిపోయింది. అయితే, అతడి వీసాను తిరస్కరించడానికి చెప్పిన కారణం చదివి షాకయ్యాడు.

‘‘అమెరికాలో చదువు పూర్తయిన తర్వాత మీరు భారత్‌‌కు తిరిగి వస్తారని మాకు అనిపించట్లేదు.. మీరు అమెరికాలోనే జెండా పాతేసే అవకశాలే కనిపిస్తున్నాయి’’ అని స్పష్టంగా చెప్పేశారు. అమెరికా వీసా నిబంధనల ప్రకారం, విద్యార్థి వీసా (F1) తీసుకునేవారు, తాత్కాలికంగా మాత్రమే అమెరికాకు వెళ్తున్నామని, తమ సొంత దేశానికి తిరిగి వచ్చేస్తామని.. అమెరికాలో శాశ్వతంగా ఉండకుండా సొంత దేశానికి వచ్చేయడానికి ఇక్కడ బలమైన బంధాలు ఉన్నాయని నిరూపించుకోవాలి. కానీ, కౌశిక్ విషయంలో భారత్‌కు తిరిగి వచ్చేంత బంధాలు అతనికి ఉన్నట్టు నిరూపించుకోలేకపోయాడని ఆ లెటర్ తేల్చి చెప్పింది.

వీసా నిరాకరణపై కౌశిక్ రాజ్ స్పందిస్తూ.. ‘‘నేను భారత్‌లో పుట్టి పెరిగాను, నా కుటుంబమంతా ఇక్కడే ఉంది. అయినా నాకు వీసా ఇవ్వకపోవడం ఆశ్చర్యంగా ఉంది’’ అని చెప్పాడు. మరి వీసా ఎందుకు రాలేదని ఆలోచిస్తే.... అమెరికా కాన్సులేట్ అధికారులు తన సోషల్ మీడియా ప్రొఫైల్స్ చెక్ చేయడమే అయి ఉంటుందని కౌశిక్ అనుమానం వ్యక్తం చేశాడు. వీసా దరఖాస్తులో ఇప్పుడు సోషల్ మీడియా వివరాలు ఇవ్వడం తప్పనిసరి. సోషల్ మీడియా వెట్టింగ్ అనేది చాలా కీలకంగా మారింది.

వాస్తవానికి కౌశిక్ రాజ్‌కు సోషల్ మీడియాలో యాక్టివ్‌గా ఉండే అలవాటు లేదు. వివాదాస్పద పోస్టులు కూడా పెట్టలేదు. కానీ, అడును నాలుగేళ్లు జర్నలిస్ట్‌గా పని చేశాడు కాబట్టి, ఆ సమయంలో రాసిన కథనాల లింక్‌లను మాత్రం పోస్ట్ చేశాడు. బహుశా, వాటిని చూసి, వీసా అధికారులుఇతను అమెరికాలో జర్నలిజం ముసుగులో స్థిరపడటానికి ప్రయత్నిస్తున్నాడని అనుమానించి ఉండొచ్చు. కానీ, లెటర్‌లో మాత్రం సోషల్ మీడియా ప్రొఫైల్స్ గురించి నేరుగా చెప్పకుండా.. మాకు మీరు తిరిగి ఇండియాకి రారని అనుమానం ఉంది అన్నట్టు చెప్పారు. స్కాలర్‌షిప్ లభించినా, సరైన పత్రాలు ఉన్నా మన అప్లికేషన్ చూసే ఆ వీసా ఆఫీసర్ కరుణిస్తేనే మనం అమెరికా వెళ్లగలం. వారు కాదంటే ఎదురు చెప్పే హక్కు కూడా లేదు. ఎందుకంటే అమెరికా వీసా అనేది జస్ట్ ఎ ప్రివిలేజ్.. హక్కు కాదు.

అందుకే ఆ వీసా రిజెక్షన్ లెటర్‌లో ఈ నిర్ణయాన్ని అప్పీల్ చేయడానికి అవకాశం లేదని కూడా స్పష్టం చేశారు. ఒకవేళ కౌశిక్ మళ్లీ వీసా కోసం ప్రయత్నిస్తే కొత్తగా దరఖాస్తు చేసుకుని, ఇంటర్వ్యూకి హాజరు కావాలి. అంతేకాదు, గతంలో దరఖాస్తు చేసినప్పటి నుంచి తన పరిస్థితులు ఎలా మారాయో స్పష్టంగా వివరించడానికి సిద్ధంగా ఉండాలని కూడా సూచించారు. ఈ పరిణామం ఉన్నత విద్య కోసం అమెరికా వెళ్లాలనుకునే భారతీయ విద్యార్థుల్లో ఒకింత ఆందోళన పెంచుతోంది.