మహిళల వన్డే ప్రపంచకప్‌ బెత్ మూనీ సెంచరీ,,,76/7 నుంచి 221/9 వరకు.. పాక్‌ ఆశలు గల్లంతు

మహిళల వన్డే ప్రపంచకప్ టైటిల్ ఫేవరెట్లలో ఒకటిగా బరిలోకి దిగిన ఆస్ట్రేలియా జట్టు.. తామెందుకు ఫెవరెటో నిరూపిస్తూ సత్తాచాటుతోంది. పాకిస్థాన్‌తో కొలంబోలో జరుగుతున్న మ్యాచ్‌లో అదిరే ప్రదర్శన చేసింది. ఈ మ్యాచ్‌లో తొలుత బ్యాటింగ్ చేసిన ఆస్ట్రేలియా ఓ దశలో.. 76 పరుగులకు ఆరు వికెట్లు కోల్పోయి పీకల్లోతు కష్టాల్లో పడింది. బెత్ మూనీ సెంచరీతో గొప్పగా పుంజుకున్న ఆ జట్టు.. చివరకు పాకిస్థాన్‌ ముందు 222 పరుగుల లక్ష్యాన్ని నిలిపింది. స్వల్ప స్కోరుకే కట్టడి చేయాలని భావించిన పాకిస్థాన్ ఆశలపై నీళ్లు చల్లింది.

ఈ మ్యాచ్‌లో టాస్ గెలిచిన పాకిస్థాన్ కెప్టెన్.. ఆస్ట్రేలియాకు బ్యాటింగ్ అప్పగించింది. తమ బౌలర్లపై విశ్వాసంతో ఈ నిర్ణయం తీసుకుంది. కెప్టెన్ నమ్మకాన్ని నిలబెడుతూ పాక్ బౌలర్లు సత్తాచాటారు. దీంతో ఆస్ట్రేలియా బ్యాటర్లు పెవిలియన్‌కు క్యూ కట్టారు. తొలి 8 మంది బ్యాటర్లలో ఐదుగురు కేవలం సింగిల్ డిజిట్‌కే ఔట్ అయ్యారు. దీంతో ఆస్ట్రేలియా 76/7.. 115/8తో పీకల్లోతు కష్టాల్లో పడింది. ఈ సమయంలో ఆస్ట్రేలియా 150 పరుగుల లోపే ఆలౌట్ అయ్యేలా కనిపించింది.

హ్యాట్సాఫ్ బెత్‌మూనీ..

ఈ దశలోనే ఆస్ట్రేలియా స్టార్‌ బ్యాటర్ బెత్ మూనీ.. తనలోని అసలైన ఆటను బయటకు తీసింది. పదో నంబర్ బ్యాటర్ అలానా కింగ్‌తో కలిసి 9వ వికెట్‌కు.. 106 పరుగులు జోడించింది. 114 బంతుల్లో 100 రన్స్ చేసి ఔట్ అయింది. వన్డే ప్రపంచకప్‌లో తన తొలి సెంచరీ నమోదు చేసింది. అలానా కింగ్ సైతం 49 బంతుల్లో 51 రన్స్ చేసి.. సత్తాచాటింది. దీంతో నిర్ణీత 50 ఓవర్లలో ఆస్ట్రేలియా 9 వికెట్ల నష్టానికి 221 పరుగులు చేసింది.

పాకిస్థాన్‌తో మ్యాచ్ అంటేనే చెలరేగిపోయే బెత్ మూనీ ఈ మ్యాచ్‌లోనూ అదే రిపీట్ చేసింది. సహచర బ్యాటర్లు పెవిలియన్‌కు క్యూ కడుతున్న సమయంలో మొండిగా నిలబడింది. పాక్‌తో 9 వన్డే మ్యాచ్‌లు ఆడిన ఆమె.. 77 సగటుతో 388 రన్స స్కోరు చేసింది. చివరి మూడు ఇన్నింగ్స్‌లలో రెండు సెంచరీలు ఉన్నాయి. ఇక అలానా కింగ్ సైతం.. మహిళల వన్డే ప్రపంచకప్‌లో పదో స్థానంలో బ్యాటింగ్‌కు వచ్చి హాఫ్ సెంచరీ చేసిన తొలి ప్లేయర్‌గా నిలిచింది.