ఇంట్లో ఒంటరిగా ఉన్న 80 ఏళ్ల ముసలావిడ.. అదను చూసి, 70 ఏళ్ల వృద్ధుడు
Andhra Pradesh Telugu | Suryaa Desk | Published : Fri, Oct 17, 2025, 08:45 PM
"కామాతురాణం నభయం నలజ్జ." అంటే కామంతో కళ్లు మూసుకుపోయిన వాడికి సిగ్గూ, భయం ఉండవని అర్థం. ఇది దేశముదురు సినిమాలో రమాప్రభ చెప్పిన డైలాగ్ కాదు. రాబోయే రోజులను ముందే ఊహించి ఏనాడో పెద్దలు చెప్పిన మాట. అయితే అలా సుద్ధులు నేర్పించాల్సిన పెద్దల బుద్ధే గాడి తప్పితే.. అలాంటి ఘటనే తూర్పుగోదావరి జిల్లా సీతానగరం లో చోటుచేసుకుంది. 80 ఏళ్ల వృద్ధురాలిపై అత్యాచారానికి యత్నించాడో 70 ఏళ్ల వృద్ధుడు. సీతానగరం మండలంలో జరిగిన ఈ ఘటన స్థానికంగా కలకలం రేపింది. స్థానిక ఎస్ఐ రామ్ కుమార్ వెల్లడించిన వివరాల ప్రకారం.. సీతానగరం మండలానికి చెందిన ఓ 80 ఏళ్ల వృద్ధురాలు ఒంటరిగా ఉంటోంది. అదే ఊరికి చెందిన 70 ఏళ్ల మంగయ్య వృద్ధుడు ఇదే అదనుగా భావించాడు. వృద్ధురాలు ఇంట్లో ఒంటరిగా ఉన్న సమయంలో మంగయ్య ఇంట్లోకి ప్రవేశించాడు. వృద్ధురాలిని అసభ్యకరంగా మాట్లాడి.. అఘాయిత్యానికి యత్నించాడు.
ఊహించని ఈ పరిణామానికి వృద్ధురాలు భయపడిపోయింది. భయంతో గట్టిగా కేకలు వేసింది. దీంతో వృద్ధురాలి కేకలు విన్న స్థానికులు వెంటనే అక్కడకు చేరుకున్నారు. చుట్టుపక్కల జనం రావటం గమనించిన మంగయ్య అక్కడి నుంచి పారిపోయాడు. ఈ ఘటనపై వృద్ధురాలు ఇచ్చిన ఫిర్యాదు ఆధారంగా పోలీసులు కేసు నమోదు చేశారు. పరారైన వృద్ధుడిని అదుపులోకి తీసుకున్నారు. అనంతరం కోర్టులో హాజరుపరచగా.. కోర్టు రిమాండ్ విధించింది. దీంతో మంగయ్యను పోలీసులు జైలుకు తరలించారు.
|
|