ఏపీలో నకిలీ మద్యం వ్యవహారం.. యూట్యూబర్ అరెస్ట్

ఆంధ్రప్రదేశ్‌లో కల్తీ మద్యం వ్యవహారం కలకలం రేపుతోంది. అన్నమయ్య జిల్లా ములకలచెరువులో నకిలీ మద్యం బాటిళ్లు దొరకడం.. ఆ తర్వాత తీగలాగితే డొంక కదిలినట్లు తంబళ్లపల్లె నకిలీ మద్యం తయారీ కేంద్రం వ్యవహారం వెలుగుచూసింది. ఈ కేసు దర్యాప్తు సమయంలోనే ఎన్టీఆర్ జిల్లా ఇబ్రహీంపట్నంలో నకిలీ మద్యం బాటిళ్లు పెద్దఎత్తున దొరకడం ఆందోళన రేకెత్తించింది. ఆ తర్వాత నకిలీ మద్యం వ్యవహారంలో రోజుకో పరిణామం చోటుచేసుకుంటూ వస్తోంది. ఈ క్రమంలోనే ఓ యూట్యూబర్ పాత్ర కూడా ఉన్నట్లు పోలీసులు గుర్తించారు. నకిలీమద్యం కేసులో నిందితుడిగా ఉన్న అల్లాబకాష్ అనే యూట్యూబర్, విలేఖరిని ఎక్సైజ్ పోలీసులు అరెస్ట్ చేశారు. అనంతరం కోర్టులో హాజరుపరచగా.. కోర్టు రిమాండ్ విధించడంతో జైలుకు తరలించారు.

నంద్యాల జిల్లాలోని గోస్పాడు మండలంలో ఉన్న జిల్లెళ్ల గ్రామం అల్లాబకాష్ స్వస్థలం. నకిలీ మద్యం కేసులో అల్లాబకాష్ 16వ నిందితుడిగా పోలీసులు పేర్కొన్నారు. నకిలీ మద్యం కేసు విచారణలో ఇతని పేరు రావటంతో ఎక్సైజ్ పోలీసులు అదుపులోకి తీసుకున్నారు. మరోవైపు20 ఏళ్లపాటు హైదరాబాద్‌లో ఉన్నారు అల్లాబకాష్. చిన్న, చిన్న ఉద్యోగాలు చేస్తూ జీవనం సాగించారు. చివరకు సంవత్సరం కిందట నంద్యాలకు తిరిగి వెళ్లిపోయిన అల్లాబకాష్.. యూట్యూబ్ ఛానెల్ పెట్టుకుని విలేకరిగా చలామణి అవుతున్నారు. అల్లాబకాష్ హైదరాబాద్ లక్డికాపూల్‌లో ఉన్న ఓ ప్రింటింగ్ ప్రెస్‌లో కల్తీ మద్యం లేబుల్స్ తయారు చేయిస్తున్నట్లు పోలీసులు గుర్తించారు. ఇందుకోసం నిందితుల వద్ద నుంచి అల్లబకాష్‌కు ఫోన్ పే ద్వారా డబ్బులు అందేవని గుర్తించారు. ఈ క్రమంలోనే మూడు రోజుల కిందట విజయవాడలో ఉన్న అల్లాబకాష్ ఇంట్లో ఎక్సైజ్ అధికారులు సోదాలు నిర్వహించారు. తాజాగా అల్లాబకాష్‌ను అదుపులోకి తీసుకుని కోర్టులో హాజరుపరిచారు. కోర్టు రిమాండ్ విధించడంతో జైలుకు తరలించారు.

మరోవైపు నకిలీ మద్యం ఏపీలో రాజకీయ మంటకు కారణమవుతోంది. ఈ అంశంపై టీడీపీ, వైసీపీ విమర్శలు, ప్రతి విమర్శలు గుప్పించుకుంటున్నాయి. ఇక కల్తీ మద్యం గుర్తించేందుకు ఏపీ ప్రభుత్వంఏపీ ఎక్సైజ్ సురక్షా యాప్ తీసుకురాగా.. మాజీ మంత్రి పేర్ని నాని దానిపై విమర్శలు గుప్పించారు. వైసీపీ హయాంలో మద్యం సీసాలపై క్యూఆర్ కోడ్ ఉండేదని నాని గుర్తు చేశారు. టీడీపీ కూటమి ప్రభుత్వం రాగానే ఆ క్యూర్ కోడ్ తీసేసిందన్న పేర్ని నాని.. మళ్లీ ఇప్పుడు క్యూఆర్ కోడ్ అంటూ హడావిడి చేస్తున్నారని విమర్శించారు. నకిలీ మద్యం అమ్మకాల కోసమే క్యూఆర్ కోడ్ విధానం తీసేశారని పేర్ని నాని ఆరోపించారు.