కార్తీక మాసం ఎఫెక్ట్.. ప్రత్యేక బస్సులు ఏర్పాటు

కార్తీక మాసం మరికొద్ది రోజుల్లో ప్రారంభం కానుంది. శివునికి అత్యంత ప్రీతికరమైన కార్తీక మాసంలో శైవ క్షేత్రాల సందర్శన కోసం భక్తులు పెద్ద సంఖ్యలో తరలి వెళ్తుంటారు. కార్తీక మాసంలో శివాలయంలో పూజలు నిర్వహిస్తే మంచి జరుగుతుందనేది భక్తుల విశ్వాసం. ఈ నేపథ్యంలోనే ఈ మాసంలో శివాలయాలు శివనామస్మరణతో పోటెత్తుతుంటాయి. ఇక కార్తీక మాసంలో భక్తుల సౌలభ్యం కోసం ఆర్టీసీ ప్రత్యేక చర్యలు తీసుకుంటూ వస్తోంది. ప్రముఖ ఆలయాలకు సర్వీసులను నడుపుతూ ఒకేరోజులో ఎక్కువ శైవక్షేత్రాలను దర్శించుకునేలా ప్లాన్ చేస్తూ ఉంటోంది. ఈ క్రమంలోనే పంచారామ శైవక్షేత్రాలకు ఏపీఎస్ఆర్టీసీ ప్రత్యేక బస్సులు నడపనుంది. కార్తీక మాసం సందర్భంగా అమలాపురం, రావులపాలెం, రాజోలు, రామచంద్రాపురం డిపోల నుంచి పంచారామ శైవక్షేత్రాలకు ప్రత్యేక బస్సులు నడపనున్నారు.

కార్తీక మాసంలో పంచారామ శైవక్షేత్రాల సందర్శన.. పూర్తి వివరాలివే..

మరోవైపు భీమవరం, పాలకొల్లు, అమరావతి, సామర్లకోట, ద్రాక్షారామంలోని శైవక్షేత్రాలను సందర్శించేందుకు ఆర్టీసీ ఈ ప్రత్యేక బస్సులను అందుబాటులోకి తెస్తోంది. రాజోలు, రావులపాలెం, అమలాపురం, రామచంద్రాపురం డిపోల నుంచి కార్తీక మాసంలోని ప్రతీ ఆదివారం ఈ బస్సులు అందుబాటులో ఉంటాయి. సోమవారం రోజున ఈ ఆలయాలలోని పరమ శివుణ్ని దర్శించుకునేలా ఆదివారం రోజునే బస్సులు ఆయా డిపోల నుంచి బయల్దేరతాయి. అక్టోబర్ 26, నవంబర్ 2వ తేదీ, 9, 16వ తేదీలలో ఈ బస్సులు అందుబాటులో ఉంటాయి. ఆ రోజులలో రాత్రి ఎనిమిది గంటలకు ఆయా డిపోల నుంచి ప్రత్యేక బస్సులు బయల్దేరతాయి.

కార్తీక సోమవారం రోజున పంచారామ శైవక్షేత్రాల సందర్శన అనంతరం .. సోమవారం రాత్రి 9 గంటల సమయానికి తిరిగి డిపోలకు చేరుకుంటాయని అధికారులు వెల్లడించారు. మరోవైపు ఒకేచోట నుంచి 39 మంది భక్తులు ఉంటే.. అక్కడి నుంచే బస్సు సర్వీసు ప్రారంభమయ్యేలా ఏర్పాట్లు చేసినట్లు ఆర్టీసీ అధికారులు వెల్లడించారు. పంచారామ బస్సులలో ముందస్తు రిజర్వేషన్ల కోసం పలుచోట్ల కౌంటర్లు ఏర్పాటు చేశారు. ఇంకా ఏవైనా వివరాలు కావాలంటే రామచంద్రపురం డిపో మేనేజర్‌ను సంప్రదించాలని.. 9959225536 నంబరుకు ఫోన్ చేయాలని ఆర్టీసీ అధికారులు సూచించారు.