టీవీకే గుర్తింపు పొందిన రాజకీయ పార్టీ కాదు.. విజయ్‌కి షాకిచ్చిన ఎన్నికల సంఘం

తమిళనాడు అసెంబ్లీ ఎన్నికలకు ముందు.. దళపతి విజయ్ నేతృత్వంలోని తమిళగ వెట్రి కళగం (టీవీకే) పార్టీకి భారీ షాక్ తగిలింది. టీవీకే పార్టీ గుర్తింపు పొందిన రాజకీయ పార్టీ కాదని.. కేంద్ర ఎన్నికల సంఘం .. మద్రాస్ హైకోర్టుకు వెల్లడించింది. ప్రస్తుతం కరూర్ తొక్కిసలాటకు సంబంధించిన కేసు విచారణ జరుగుతుండగా.. టీవీకే పార్టీ గుర్తింపును రద్దు చేయాలని దాఖలైన ప్రజా ప్రయోజన వ్యాజ్యంపై విచారణ సందర్భంగా మద్రాస్ హైకోర్టుకు కేంద్ర ఎన్నికల సంఘం వెల్లడించింది.

కొన్ని రోజుల క్రితం తమిళనాడులోని కరూర్‌ జిల్లాలో జరిగిన విజయ్‌ ప్రచార ర్యాలీలో తొక్కిసలాట చోటు చేసుకోగా.. 41 మంది ప్రాణాలు కోల్పోయారు. ఈ ఘటన యావత్‌ దేశాన్ని తీవ్ర దిగ్భ్రాంతికి గురిచేసింది. ఈ నేపథ్యంలోనే విజయ్‌ టీవీకే పార్టీ గుర్తింపు రద్దు చేయాలని.. దీంతోపాటు రాజకీయ పార్టీల ప్రచార సభల్లో మహిళలు, చిన్నారులు పాల్గొనకుండా కఠిన ఆంక్షలు విధించాలని.. పలువురు మద్రాస్‌ హైకోర్టులో పలు ప్రజాప్రయోజన వ్యాజ్యాలు దాఖలు అయ్యాయి. వీటిని మద్రాస్ హైకోర్టు చీఫ్ జస్టిస్ ఎంఎం శ్రీవాస్తవ.. జస్టిస్‌ జీ అరుల్‌ మరుగణ్‌ల ధర్మాసనం విచారణ జరిపింది.

ఇక ఈ కరూర్ తొక్కిసలాట ఘటనకు సంబంధించి సుప్రీంకోర్టులో పెండింగ్‌లో ఉన్న పిటిషన్లు తప్ప.. ఈ కేసులన్నింటినీ విచారణ జరిపేందుకు ఓ ధర్మాసనాన్ని ఏర్పాటు చేసేందుకు వీలుగా వాటన్నింటిని హైకోర్టు పాలనావ్యవహారాల విభాగం ముందు ఉంచాలని హైకోర్టు రిజిస్ట్రీని ఆదేశించింది. ఇక టీవీకే పార్టీ గుర్తింపు రద్దు విషయానికి వస్తే.. ఇప్పటికీ ఆ పార్టీకి హోదా లేనందున ఆ పిటిషన్ నిలబడదని ఎన్నికల సంఘం తరఫు న్యాయవాది నిరంజన్‌ రాజగోపాల్‌ వెల్లడించారు.