గాల్లో ఎగురుతున్న విమానంలో మంటలు.. ప్రయాణికుడి లగేజీ నుంచే

దక్షిణ కొరియాలోని సియోల్‌కు వెళ్తున్న ఎయిర్ చైనా విమానంలో శనివారం ఓ ప్రయాణికుడి లగేజీలోని లిథియం బ్యాటరీ పేలి మంటలు చెలరేగాయి. ఓవర్‌హెడ్ కంపార్ట్‌మెంట్‌లో మంటలు రావడం చూసి ప్రయాణికులు భయపడ్డారు. వెంటనే అప్రమత్తమైన సిబ్బంది విమానాన్ని షాంఘై పుడోంగ్ అంతర్జాతీయ విమానాశ్రయంలో అత్యవసర ల్యాండింగ్ చేయడంతో పెను ప్రమాదం తప్పింది. ఈ ఘటనలో ఎవరికీ గాయాలు కాలేదని ఎయిర్ చైనా ధృవీకరించింది. భద్రతా కారణాల దృష్ట్యా విమానాల్లో పవర్ బ్యాంక్‌లు, లిథియం బ్యాటరీల వినియోగంపై ఇప్పటికే కఠిన నిబంధనలు ఉన్నాయి.

తూర్పు చైనాలోని హాంగ్‌జౌ నుంచి దక్షిణ కొరియాలోని సియోల్ వైపు వెళ్తున్న ఎయిర్ చైనా విమానంలో శనివారం ఈ ఘటన చోటుచేసుకుంది. ఎయిర్ చైనా సంస్థ విడుదల చేసిన ప్రకటన ప్రకారం.. శనివారం ఉదయం 9:47 గంటలకు హాంగ్‌జౌ నుంచి ఇంచియాన్‌కు (సియోల్) బయలుదేరిన సీఏ 139 విమానంలో ఈ సంఘటన జరిగింది. విమానం గాల్లోకి లేచిన కొంత సమయం తర్వాత.. ఓ ప్రయాణికుడి ఓవర్‌హెడ్ కంపార్ట్‌మెంట్‌లో ఉన్న క్యారీ ఆన్ లగేజీలోని లిథియం బ్యాటరీ అకస్మాత్తుగా పేలి, మంటలు అంటుకున్నాయి. ఓవర్‌హెడ్ బిన్ నుంచి పొగ, మంటలు బయటకు రావడంతో ప్రయాణికులు భయభ్రాంతులకు గురయ్యారు.

వెంటనే అప్రమత్తమైన విమాన సిబ్బంది పరిస్థితిని అదుపులోకి తీసుకువచ్చి.. విమానంతోపాటు అందులోని ప్రయాణికుల భద్రతను దృష్టిలో ఉంచుకుని షాంఘై పుడోంగ్ ఇంటర్నేషనల్ ఎయిర్‌పోర్టులో అత్యవసర ల్యాండింగ్‌ చేశారు. విమాన సిబ్బంది వేగంగా స్పందించడం వల్ల ఎలాంటి ప్రాణ నష్టం జరగలేదని.. ఎవరికీ గాయాలు కాలేదని ఎయిర్ చైనా ధృవీకరించింది. ఈ ఘటనకు సంబంధించిన వీడియో సోషల్ మీడియాలో వైరల్ అవుతోంది.

ఇలాంటి ప్రమాదాల నేపథ్యంలో.. ఈ ఏడాది జూన్ నుంచి చైనా దేశీయ విమానాల్లో చైనీస్ భద్రతా ధృవీకరణ మార్కింగ్‌లు లేని పవర్ బ్యాంక్‌లపై నిషేధం విధించారు. అలాగే పవర్ బ్యాంక్‌లను విమానంలో ఉపయోగించడం లేదా వాటితో ఫోన్లను ఛార్జింగ్ చేయడానికి కూడా అనుమతి నిరాకరించారు. ఇక తయారీదారులు రీకాల్ చేసిన పవర్ బ్యాంక్‌లను కూడా విమానంలోకి అనుమతించరు.