హిందూ యువతులు జిమ్‌కు వెళ్లొద్దు, ఇంట్లోనే యోగా చేసుకోండి.. బీజేపీ ఎమ్మెల్యే

మహారాష్ట్ర బీజేపీ ఎమ్మెల్యే గోపిచంద్‌ పడాల్కర్‌.. హిందూ యువతులపై చేసిన వ్యాఖ్యలు ఆ రాష్ట్రంలో తీవ్ర వివాదానికి కారణం అయ్యాయి. దీంతో ఆయన మరోసారి తీవ్ర వివాదంలో చిక్కుకున్నారు. హిందూ అమ్మాయిలు జిమ్‌కు వెళ్లొద్దంటూ.. ఇంటి దగ్గరే యోగా చేయాలని సలహా ఇచ్చారు. ఈ వ్యాఖ్యలు ఇప్పుడు మహారాష్ట్రలో రాజకీయ దుమారాన్ని రేపుతున్నాయి. బీడ్‌ జిల్లాలో జరిగిన బహిరంగ సభలో మాట్లాడిన జాత్ ఎమ్మెల్యే గోపీచంద్ పడాల్కర్.. కాలేజీలకు వెళ్లే హిందూ యువతులను ఉద్దేశించి ఆయన ఈ సలహా ఇచ్చారు.

జిమ్‌లకు వెళ్లే విషయంలో హిందూ యువతులను తీవ్రంగా హెచ్చరించిన గోపీచంద్ పడాల్కర్.. జిమ్‌లలో పెద్ద కుట్ర జరుగుతోందని పేర్కొన్నారు. ఈ కుట్రను స్పష్టంగా అర్థం చేసుకోవాలని హితవు పలికారు. బాగా మాట్లాడే వారు లేదా చాలా మంచిగా కనిపించే వారు ఎవరైనా వారి చేతిలోనూ మోసపోవద్దని జాగ్రత్తలు చెప్పారు. అయితే ఈ బీజేపీ ఎమ్మెల్యే చేసిన వ్యాఖ్యలు పరోక్షంగా మరో వర్గాన్ని టార్గెట్ చేసి చేసినట్లు అనిపిస్తున్నాయి.

కొందరు యువతులను మభ్యపెట్టి మోసం చేస్తున్నారని ఆయన ఆరోపిస్తూ ఇలాంటి వ్యాఖ్యలు చేశారు. జిమ్‌కు వెళ్తే అక్కడ తమ ట్రైనర్ ఎవరు అనే దానిపై జనం దృష్టి పెట్టాలని సూచించారు. ఎవరైనా ఇంట్లో యువతులు జిమ్‌కు వెళ్తుంటే.. వారికి కౌన్సెలింగ్ ఇవ్వాలని పేర్కొన్నారు. అమ్మాయిలు ఇంట్లోనే యోగా సాధన చేయాలని.. జిమ్‌లకు వెళ్లాల్సిన అవసరం లేదు. ఎందుకంటే.. అలాంటి వారు మిమ్మల్ని మోసం చేస్తున్నారని.. మీకు అన్యాయం చేస్తున్నారని గోపీచంద్ పడాల్కర్ చేసిన వ్యాఖ్యలు తీవ్ర దుమారం రేపుతున్నాయి.

ఇక కాలేజీలకు వెళ్లే యువకులు తమ ఐడీ కార్డులు లేకుండా వస్తుంటే.. వారిని గుర్తించి లోపలికి వెళ్లకుండా అడ్డుకోవాలని కూడా ఎమ్మెల్యే గోపీచంద్ సూచించారు. అలాంటి వారికి మనం బలమైన అడ్డుకట్టను సృష్టించాలని పిలుపునిచ్చారు. అయితే ఇలాంటి వివాదాస్పద వ్యాఖ్యలు చేయడం పడాల్కర్‌కు ఇదే మొదటిసారేమీ కాదు. గతేడాది సెప్టెంబర్‌ నెలలో ఎన్సీపీ శరద్ పవార్ నేత జయంత్ పాటిల్, ఆయన తల్లిదండ్రులపై చేసిన అభ్యంతరకరమైన వ్యాఖ్యలు తీవ్ర రచ్చకు కారణం అయ్యాయి. అప్పుడు పడాల్కర్ దిష్టిబొమ్మలను ఆ పార్టీ కార్యకర్తలు దహనం చేయగా.. స్వయంగా శరద్ పవార్.. ముఖ్యమంత్రి దేవేంద్ర ఫడ్నవీస్‌కు ఫోన్ చేసి అభ్యంతరం వ్యక్తం చేశారు.