అతడికి 74, ఆమెకు 24.. రూ. కోట్లు ఇచ్చి పెళ్లి చేసుకున్న తాత

ఈ మధ్య చాలా మంది వృద్ధులు కుర్రాళ్లలా మారిపోతున్నారు. పెళ్లై, పిల్లలు పుట్టి.. వారికి పెళ్లిళ్లు అయి, మనవళ్లు మనవరాళ్లు పుట్టాకా కూడా కొందరిలో ఆ ఉత్సాహం అలాగే ఉంటోంది. ఇటీవల ఓ 70 ఏళ్ల కుర్రాడు.. 35 ఏళ్ల మహిళను ప్రేమించి పెళ్లి చేసుకున్నాడు. తాజాగా అలాంటి మరో ఘటన జరిగింది. 74 ఏళ్ల వృద్ధుడు తన కంటే 50 ఏళ్లు చిన్న అంటే.. 24 యువతిని పెళ్లి చేసుకున్నాడు. రూ.1.5 కోట్లు ఎదురుకట్నం ఇచ్చి మరీ పెళ్లాడాడు. అయితే పెళ్లి చేసుకున్న తర్వాత వారు వీడియోగ్రాఫర్లకు డబ్బులు ఇవ్వలేదట. తర్వాత ఆ దంపతులిద్దరూ మాయం అవడంతో.. పోలీసులు దర్యాప్తు చేపట్టారు. ఇండోనేషియాలో జరిగిన ఈ ఘటన ప్రస్తుతం చర్చనీయాంశమైంది.

వీడియోగ్రాఫర్ చెప్పిన వివరాల ప్రకారం.. తూర్పు జావా ప్రావిన్స్‌లోని పిసిటన్ రీజెన్సీలో అక్టోబర్ 1న ఘనంగా ఈ పెళ్లి జరిగింది. టార్మాన్‌ అనే 74 ఏళ్ల వ్యక్తి అరికా అనే 24 సంవత్సరాల యువతిని వివాహం చేసుకున్నాడు. ఈ వివాహం చేసుకునేందుకు గానూ టార్మాన్‌.. ఆ యువతికి దాదాపు రూ.1.5 కోట్లు (3 బిలియన్ ఇండోనేసియా రుపయా) చెల్లించాడు. పెళ్లి కూతురి ధర మొదట్లో దాదాపు రూ. 50 లక్షలగా నిర్ణయించారు. కానీ పెళ్లి జరిగే సమయానికి రూ. కోటిన్నరకు పెంచినట్లు తెలుస్తోంది. ఇక పెళ్లికి వచ్చిన అతిథులకు కూడా కొంత డబ్బును రిటర్న్‌ గిఫ్ట్‌లుగా ఇచ్చారట.. వృద్ధ పెళ్లికొడుకు, పెళ్లి కూతురు తరఫువారు. అయితే ఫొటోగ్రాఫర్‌లకు మాత్రం డబ్బులు ఇవ్వకుండా.. వధువు తరఫు వారి బైక్‌పై తప్పించుకుందట కొత్తజంట. దీంతో ఫొటోగ్రాఫర్ల సంస్థ పోలీసులకు ఫిర్యాదు చేసింది.

మరోవైపు, ఈ వివాహం వద్దంటూ ఆ యువతిని తాము ముందే హెచ్చరించినట్లు ఆమె తరఫు బంధువులు ఓ వార్తా ప్రతికతో తెలిపారు. అయినా ఆమె తమ మాటలు వినలేదన్నారు. ఈ నేపథ్యంలో అట్టహాసంగా జరిగిన తన వివాహంపై వస్తున్న కథనాలపై టార్మాన్‌ సోషల్ మీడియాలో స్పందించాడు. వధువుకు డబ్బు చెల్లించిన విషయం నిజమేనని అంగీకరించాడు. పెళ్లి తర్వాత పారిపోయారంటూ వచ్చిన వార్తలను ఖండించారు. అంతేకాకుండా పెళ్లి చేసుకున్న యువతిని విడిచిపెట్టాడంటూ వచ్చిన వార్తలను కూడా తోసిపుచ్చాడు. తామిద్దరం కలిసే ఉన్నామని చెప్పాడు.

పారిపోలేదు.. హనీమూన్‌కు వెళ్లారు..

కాగా, ఈ వార్తలపై వధువు కుటుంబ సభ్యులు కూడా స్పందించారు. పెళ్లైన తర్వాత వారు పారిపోలేదని.. హనీమూన్‌కు వెళ్లారంటూ వెల్లడించారు. మరోవైపు, ఫొటోగ్రఫీ సంస్థ ఇచ్చిన ఫిర్యాదుపై పోలీసులు దర్యాప్తు చేపట్టారు.