ట్రంప్ దెబ్బకు.. చైనా ఆర్థిక వ్యవస్థ ఢమాల్

భారత్ ఒకవైపు.. ఆర్థిక వృద్ధిలో దూసుకెళ్తున్న సంగతి తెలిసిందే. సవాళ్లు ఎదురవుతున్నప్పటికీ.. ప్రత్యేక వ్యూహాలతో.. పగడ్బందీ చర్యలతో ముందుకెళ్తోందని చెప్పొచ్చు. ఈ క్రమంలోనే పలు అంతర్జాతీయ రేటింగ్ కంపెనీలు.. భారత వృద్ధి రేటు అంచనాలపై సానుకూలంగానే ఉన్నాయి. మరోవైపు మన పొరుగున ఉన్న.. ప్రస్తుతం ప్రపంచంలోనే రెండో అతిపెద్ద ఆర్థిక వ్యవస్థగా ఉన్నటువంటి చైనా మాత్రం తిరోగమనం దిశగా పయనిస్తున్నట్లు తెలుస్తోంది. చైనా వృద్ధి రేటు ఈ ఏడాది మూడో త్రైమాసికంలో (జులై- సెప్టెంబర్) క్షీణించింది. రాయిటర్స్ రిపోర్ట్ ప్రకారం.. జీడీపీ వృద్ధి రేటు సమీక్షా త్రైమాసికంలో 4.8 శాతానికి తగ్గింది. ఇది ఏడాది కనిష్టం కావడం గమనార్హం. కిందటి త్రైమాసికంలో చూస్తే ఇది 5.2 శాతంగా ఉంది. అక్కడి నుంచి భారీగానే తగ్గిందని చెప్పొచ్చు.

ఇక్కడ చైనా వృద్ధి మందగించేందుకు ప్రధానంగా రెండు కారణాలు ఉన్నాయి. వీటిల్లో ఒకటి.. చైనాలో కొంత కాలంగా నెలకొన్న ప్రాపర్టీ సంక్షోభం. ఇక్కడ దీర్ఘకాలంగా స్థిరాస్తి రంగంలో బలహీనతలు కొనసాగుతూనే ఉన్నాయి. ఇంకా ఇది డిమాండ్‌పైనా ప్రభావం చూయిస్తుంది.

అమెరికాతో వాణిజ్య ఉద్రిక్తతలు మరో అతిపెద్ద కారణంగా ఉంది. అమెరికా కొంత కాలంగా చైనాపై కఠిన చర్యలు తీసుకుంటూనే ఉంది. భారీగా దిగుమతి సుంకాల్ని విధిస్తోంది. అమెరికా అధ్యక్షుడిగా డొనాల్డ్ ట్రంప్ రెండోసారి బాధ్యతలు చేపట్టాక.. ముఖ్యంగా చైనాపై దిగుమతి సుంకాల్ని భారీగా విధించారు. ట్రేడ్ డీల్ చేసుకునేందుకు మరింత పెంచుకుంటూ పోయారు. ఇది వాణిజ్య యుద్ధానికి దారితీసింది. కొంత కాలం తర్వాత ఎట్టకేలకు ట్రంప్ దిగొచ్చి సుంకాల్ని తగ్గించారు. ఏమైందో ఏమో గానీ.. కొద్ది రోజుల కిందట మళ్లీ సడెన్‌గా చైనా నుంచి వచ్చే వస్తువులపై దిగుమతి సుంకాల్ని మరో 100 శాతం పెంచారు. దీంతో.. మరోసారి ఉద్రిక్తతలు తలెత్తాయి.

పాలు విరిగిపోయాయని, పాడైపోయాయని సింక్‌లో పారబోస్తున్నారా, మీరు మీ ఇంటితో పాటు పర్యావరణాన్ని కూడా పాడుచేసినట్లే

ఈ క్రమంలోనే ఎక్కువగా ఎగుమతులు, తయారీపై ఆధారపడిన చైనా ఆర్థిక వ్యవస్థకు తీవ్ర నష్టాన్ని కలిగిస్తున్నాయి. ఇదే సమయంలో చైనా ఆర్థిక వృద్ధిని పెంచే దిశగా.. అధికార యంత్రాంగం ఉద్దీపన చర్యలు ప్రకటించొచ్చని భావిస్తున్నారు. ఇక్కడ కూడా అమెరికా సుంకాలు.. ఆటంకం కలిగించేవిగా ఉన్నట్లు తెలుస్తోంది.

చైనాలో పారిశ్రామిక ఉత్పత్తి సెప్టెంబరులో స్వల్పంగా పెరిగినప్పటికీ.. రిటైల్ అమ్మకాల్లో క్షీణత కనిపించింది. దేశీయ వినియోగం బలహీనంగా ఉందనడానికి ఇది సంకేతంగా నిలిచింది. ఇదే సమయంలో ధరల తగ్గింపుపైనా ప్రయత్నాలు జరుగుతున్నాయి. తయారీ, ఎగుమతులపైనే ఎక్కువగా ఆధారపడినందున.. ఆర్థిక వ్యవస్థను, మళ్లీ దేశీయ వినియోగంవైపునకు మళ్లించేందుకు కఠిన సంస్కరణలు చేపట్టే అవకాశాలు కనిపిస్తున్నాయి.