ఆసీస్‌తో రెండో వన్డేకు రోహిత్‌ను పక్కన పెట్టేస్తున్నారా? జైస్వాల్‌తో గంభీర్

వన్డే కెప్టెన్సీ కోల్పోయిన రోహిత్‌ శర్మ ఇప్పుడు ఓపెనింగ్ స్లాట్ సవాల్‌గా మారింది. తొలి వన్డేలో విఫలమైన హిట్ మ్యాన్ రెండో వన్డేలో ఆడతాడా లేదా అనే దానిపై ఊహాగానాలున్నాయి. ప్రాక్టీస్‌లో రోహిత్ ఆఫ్‌ మూడ్‌లో కనిపించగా, సెలెక్టర్లు యశస్వీ జైస్వాల్‌తో మాట్లాడటం చర్చనీయాం అయింది. శుభమన్ గిల్ నాయకత్వంలో జట్టు భవిష్యత్తు నిర్మాణం జరుగుతున్నందున, రోహిత్ ఫామ్‌పైనే అతని స్థానం ఆధారపడి ఉంది. ఈ సిరీస్‌కు రోహిత్‌ను ఆడిస్తారా? లేదా? అనేది రెండో వన్డేతో ఫైనల్ కానుంది.

ఇప్పటికే వన్డే కెప్టెన్సీ నుంచి దూరమైన రోహిత్‌కు.. ఇప్పుడు ఓపెనింగ్ స్లాట్ సవాల్ ఎదురవ్వనుంది. పెర్త్ వేదికగా జరిగిన తొలి వన్డేలో కేవలం 8 పరుగులకే అవుటైన రోహిత్‌కు రెండో వన్డేలో ప్లేస్ దక్కదనే వార్తలు వినిపిస్తున్నాయి. దాంతో హిట్ మ్యాన్ భవిష్యత్‌పై ఊహాగానాలు పెరుగుతున్నాయి.

అక్టోబర్ 23న అడిలైడ్ వేదికగా ఆసీస్ - భారత్ మధ్య రెండో వన్డే జరగనుంది. మ్యాచ్‌కి ముందు టీమిండియా మంగళవారం ప్రాక్టీస్ సెషన్ ప్రారంభించింది. ఆ సెషన్‌లో మొదటగా గ్రౌండ్‌లోకి అడుగుపెట్టిన ఆటగాడు రోహిత్‌ శర్మ. నెట్‌లో తీవ్రంగా చెమటోడ్చాడు. అయితే, ప్రాక్టీస్‌ ముగిసే సమయానికి రోహిత్‌ ప్రవర్తనలో సాధారణ ఉత్సాహం కనిపించలేదని రిపోర్టులు చెబుతున్నాయి.

రెవ్ స్పోర్ట్స్ నివేదిక ప్రకారం సాధారణంగా అభిమానులతో నవ్వుతూ మాట్లాడే రోహిత్‌ ఈసారి కొంచెం ఆఫ్‌ మూడ్‌లో కనిపించాడని తెలిపింది. నెట్‌ ప్రాక్టీస్‌ ముగిసిన వెంటనే ఒంటరిగా హోటల్‌ వైపు నడిచిపోతుండగా, అదే సమయంలో భారత ప్రధాన కోచ్‌ గౌతమ్‌ గంభీర్, చీఫ్ సెలెక్టర్ అజిత్‌ అగార్కర్, సెలెక్టర్‌ శివ్‌ సుందర్‌ దాస్ యువ ఓపెనర్‌ యశస్వీ జైస్వాల్‌తో సుదీర్ఘంగా మాట్లాడటం మీడియా దృష్టిని ఆకర్షించింది. ఈ భేటీతో భారత జట్టులో తర్వాతి తరం ఓపెనర్‌ స్థాన మార్పు ప్రారంభమైందా? అనే చర్చ మొదలైంది. జైస్వాల్‌ ప్రస్తుతం గిల్‌తో పాటు భవిష్యత్తు వన్డే ఓపెనర్‌గా భావిస్తున్నారు.

అడిలైడ్‌లో జరగనున్న రెండో వన్డే ముందు, అజిత్‌ అగార్కర్‌ గిల్‌ను కొత్త కెప్టెన్‌గా ప్రకటించడం ఇప్పటికే రోహిత్‌ భవిష్యత్తుపై సందేహాలు రేకెత్తించింది. నివేదికల ప్రకారం రోహిత్‌ స్వచ్ఛందంగా కెప్టెన్సీ వదిలేయలేదని.. సెలెక్షన్ కమిటీ, టీమ్‌ మేనేజ్‌మెంట్‌ ఒత్తిడితోనే ఆ నిర్ణయం తీసుకున్నాడని సమాచారం.

 ఇకిప్పుడు గిల్‌ నాయకత్వంలో జట్టు భవిష్యత్తు నిర్మాణం జరుగుతున్నందున, రోహిత్‌ ప్లేయింగ్‌ 11లో తన స్థానం కాపాడుకోవాలంటే బ్యాటింగ్‌లో స్థిరంగా ప్రదర్శన చేయాల్సి ఉంది. 38 ఏళ్ల వయసులో ఉన్న రోహిత్‌ శారీరకంగా ఫిట్‌గా ఉన్నప్పటికీ, ఫామ్‌లో కొంచెం వెనుకబడ్డారని విశ్లేషకులు భావిస్తున్నారు. మొదటి వన్డేలో ఆయన కేవలం 8 పరుగులు మాత్రమే చేయడం ఆ ఆందోళనలకు కారణమైంది. ఇటీవల ఫిట్‌నెస్‌ విషయంలో రోహిత్‌ అద్భుతమైన మార్పు సాధించాడు. బరువు తగ్గించి, ఫిట్‌గా కనిపిస్తున్న రోహిత్‌కు అభిమానులు ప్రశంసలు కురిపిస్తున్నారు. అయితే, కేవలం ఫిట్‌నెస్‌ సరిపోదు, ఫామ్‌ తిరిగి రావాల్సిందే అని నిపుణులు అంటున్నారు.