ఆత్మహత్య చేసుకున్న తుని అత్యాచార నిందితుడు

తుని అత్యాచార నిందితుడు తాటిక నారాయణరావు ఆత్మహత్య చేసుకున్నారు. చెరువులో దూకి ఆత్మహత్య చేసుకున్న అతడి మృతదేహాన్ని గురువారం ఉదయం వెలికి తీశారు. పోస్ట్‌మార్టం నిమిత్తం మృతదేహాన్ని కాకినాడ ప్రభుత్వాసుపత్రికి పోలీసులు తరలించారు. బుధవారం అర్థరాత్రి నారాయణరావును తుని పోలీస్ స్టేషన్ నుంచి కోర్టుకు పోలీసులు తరలించారు. ఆ క్రమంలో బాత్‌రూమ్‌కు వెళ్తానని నారాయణరావు చెప్పడంతో.. తుని శివారులోని చెరువు పక్కన పోలీసులు తమ వాహనాన్ని ఆపారు. పోలీసుల వాహనం దిగిన వెంటనే.. అతడు చెరువులోకి దూకాడు. నిందితుడి ఆచూకీ కోసం గజ ఈతగాళ్ల సాయంతో గాలింపు చర్యలు చేపట్టారు. అర్థరాత్రి కావడంతో అతడి మృతదేహం లభ్యం కాలేదు. గురువారం ఉదయం అతడి మృతదేహాన్ని చెరువులోని నుంచి వెలికి తీశారు. కాకినాడ జిల్లాలోని తునిలో మనవరాలి వయసున్న బాలికను గురుకుల పాఠశాల నుంచి నారాయణరావు నిర్మానుష్య ప్రాంతానికి తీసుకు వెళ్లి.. అత్యాచారానికి ఒడిగట్టాడు. బాలికకు తాను తాతనంటూ గురుకుల సిబ్బందిని చెప్పి.. బయటకు తీసుకు వెళ్లాడు. అనంతరం తొండంగి సమీపంలో ఒక తోటలో ఈ అఘాయిత్యానికి అతడు పాల్పడ్డాడు. ఆ సమీపంలోనే ఉన్న ఒక వ్యక్తి గమనించి.. నారాయణ రావు వ్యవహారాన్ని వీడియో తీశాడు. అలాగే నారాయణరావును నిలదీశాడు. అనంతరం పోలీసులకు ఫిర్యాదు చేశాడు. ఇక ఈ విషయం తెలిసిన బాలిక కుటుంబ సభ్యులతోపాటు స్థానికులు నారాయణరావుకు దేహశుద్ది చేశారు. అనంతరం పోలీసులకు అప్పగించారు. అతడిపై పోక్సో చట్టం కింద కేసు నమోదు చేశారు. ఆ తర్వాత అతడిని కోర్టుకు తరలిస్తుండగా చెరువులో దూకి ఆత్మహత్య చేసుకున్నాడు.