ఇండోర్‌లో ఆస్ట్రేలియా క్రికెటర్లపై వేధింపులు.... బైక్‌పై వచ్చి అసభ్యంగా తాకిన నిందితుడు

ఇండోర్‌లో మ్యాచ్ సందర్భంగా ఆస్ట్రేలియా మహిళా క్రికెటర్లపై వేధింపుల ఘటన కలకలం రేపుతోంది. వేధింపులకు పాల్పడిన నిందితుడు అఖిల్ ఖాన్ అలియాస్ నైట్రా‌ను పోలీసులు అరెస్ట్ చేశారు. విచారణలో నిందితుడికి సంబంధించి విస్తుగొలిపే విషయాలు వెలుగులోకి వస్తున్నాయి. ఇండోర్‌కు చెందిన అతడ్ని మోస్ట్ వాంటెడ్ క్రిమినల్‌గా గుర్తించారు. మహిళల వన్డే క్రికెట్ ప్రపంచ కప్‌లో భాగంగా మ్యాచ్ కోసం ఇండోర్‌కు వచ్చిన ఆస్ట్రేలియా ప్లేయర్లు ఇద్దరు అక్టోబరు 23న (గురువారం) ఉదయం 11 గంటల సమయంలో తాము బస చేసిన హోటల్‌కు సమీపంలో ఉన్న ఒక కేఫ్‌కి వెళ్తున్నారు.

ఈ సమయంలో తన బైక్‌పై వెళ్తున్న అఖిల్.. క్రికెటర్లకు దగ్గరగా వచ్చి వారిలో ఒకరిని లాగడానికి ప్రయత్నించి వేగంగా వెళ్లిపోయాడు. మళ్లీ కొద్దిసేపటి తర్వాత వచ్చి మరో క్రికెటర్‌ను అసభ్యంగా తాకి పరారయ్యాడు. దీంతో భయపడిన ఆ ఇద్దరు క్రికెటర్లు వెంటనే తమ భద్రతాధికారికి సమాచారం ఇవ్వగా.. ఆస్ట్రేలియా జట్టు సెక్యూరిటీ ఇంఛార్జి డ్యానీ సిమన్స్ ఇండోర్ పోలీసులకు ఫిర్యాదు చేశారు. ఘటనపై కేసు నమోదుచేసి దర్యాప్తు చేపట్టిన పోలీసులు.. అక్కడ ఉన్న సీసీటీవీ ఫుటేజ్‌లను పరిశీలించి నిందితుడ్ని ట్రేస్ చేశారు. అతడిపై కనీసం పది క్రిమినల్ కేసులు ఉన్నాయని, వీటిలో కొన్ని 2012కు ముందు నాటివని దర్యాప్తులో తేలింది. దోపిడీ, దారి దోపిడీ, చోరీ, హత్యాయత్నం, బెదిరింపులు, డ్రగ్స్ సరఫరా, అక్రమ మద్యం వ్యాపారం వంటి కేసులు అతడిపై ఉన్నట్టు గుర్తించారు.

ఇండోర్ అడిషనల్ డిప్యూటీ కమిషనర్ (క్రైమ్) రాజేష్ దండోతియా మాట్లాడుతూ.. పెయింటర్‌గా పనిచేస్తోన్న నిందితుడు అఖిల్‌కు నేర చరిత్ర ఉందని, గతంలో పలుసార్లు జైలుకెళ్లాడని చెప్పారు. బెయిల్, పెరోల్‌పై జైలు నుంచి వచ్చినప్పుడల్లా కొత్త నేరాలకు పాల్పడేవాడని పేర్కొన్నారు. గతేడాది కత్తితో ఒక యువ జంటపై దాడి చేసిన నిందితుడు.. ఆ యువతిని అసభ్యంగా తాకడానికి ప్రయత్నించాడని తెలిపారు. ఉజ్జయినిలో పోలీసుల వద్ద నుంచి రైఫిల్స్‌ను లాక్కొని కాల్పులు జరపడానికి ప్రయత్నించిన కేసులో ఇటీవల జైలు శిక్ష పూర్తిచేసుకుని విడుదల ఇండోర్‌కు తిరిగి వచ్చాడని వివరించారు. అతడి తల్లిదండ్రులు కూలీలుగా పనిచేస్తుంటారని అన్నారు.

ఆస్ట్రేలియా క్రికెటర్లపై వేధింపుల అంశాన్ని తీవ్రంగా పరిగణించిన పోలీసులు.. ఐదు పోలీస్ స్టేషన్లకు చెందిన అధికారులతో గాలింపు చేపట్టారు. ఈ ఘటనను బీసీసీఐ కార్యదర్శి దేవజిత్‌ సైకియా ఖండించారు. ఇలా జరిగి ఉండాల్సింది కాదని, భారత్ ఆతిథ్యానికి, భద్రతకు ప్రసిద్ధి చెందిందని అన్నారు. నిందితుడ్ని అరెస్ట్ చేసిన పోలీసులను ఆయన అభినందించారు.