బొద్దింకకు ఉరి శిక్ష,,,ఎయిర్ ఇండియా లాగ్‌బుక్‌లో నమోదు

చాలా మంది ఇళ్లలో బొద్దింకలు ఉంటాయి. అటు ఇటూ తిరుగుతూ చిరాకు తెప్పిస్తాయి. వాటి వల్ల జరిగే అనార్థాలూ, వచ్చే అనారోగ్య సమస్యలు అనేకం. అందుకే వాటిపై పగబట్టినట్లు వివిధ రకాలుగా వాటికి శిక్ష విధిస్తారు. కొందరు నలిపి చంపేస్తారు.. మరికొంత మంది హిట్ వంటి స్ప్రేలు కొట్టి వాటి బెడద వదలించుకుంటారు. కానీ ఎయిర్ సిబ్బంది మాత్రం ఉరి శిక్ష విధించారు. అవును మీరు చదివింది నిజమే.. బొద్దింకను చనిపోయే దాకా ఉరి తీశారట. ఎయిర్ ఇండియా విమాన సంస్థ సిబ్బంది చేసిన ఓ పని ఇప్పుడు నెట్టింట్లో నవ్వులు పూయిస్తోంది. మరి అంత కఠిన శిక్ష వేసేలా ఆ బొద్దింక చేసిన నేరం ఏంటంటూ నెటిజన్లు ఆరా తీస్తున్నారు.

ఈ నెల 24న ఢిల్లీ నుంచి దుబాయ్‌ వెళ్తున్న ఏఐ315 విమానంలో ఓ ప్రయాణికుడు.. ఒక బతికున్న బొద్దింకను గుర్తించాడు. అనంతరం క్యాబిన్ సిబ్బందికి ఫిర్యాదు చేశాడు. ఆ ఫిర్యాదును తాము పరిష్కరించినట్లు క్యాబిన్ డిఫెక్ట్ లాగ్‌బుక్‌లో నమోదు చేశారు సిబ్బంది. ఆ ఫిర్యాదును.. " కాక్రోచ్ ఫౌండ్ అలైవ్ బై గెస్ట్ (బతికున్న కాక్రోచ్‌ను గెస్ట్ గుర్తించాడు)" అని నమోదు చేశారు. ఇక దానికి పరిష్కారాన్ని.. "కాక్రోచ్ హ్యాంగ్డ్ టు అంటిల్ డెత్ (బొద్దింక చనిపోయే దాకా ఉరితీశాము)" అని పేర్కొన్నారు. అయితే ఈ లాగ్‌బుక్‌ ఘటన నెట్టింట్లో తెగ వైరల్ అవుతోంది. నెటిజన్లు విభిన్న రకాలుగా స్పందిస్తున్నారు.

దుబాయ్ స్టైల్ శిక్ష..

దీనిపై స్పందించిన ఓ యూజర్.. 'ఖల్లాస్.. దుబాయ్ స్టైల్ శిక్ష వేశారు' అని రాసుకొచ్చాడు. 'ఇంతకీ మృతదేహాన్ని కుటుంబ సభ్యులకు అప్పగించారా లేదా.. నాకు తెలియాలి' అంటూ మరో నెటిజన్ కామెంట్ పెట్టాడు. 'బొద్దింకకు ఏ కోర్టులో ఆ శిక్ష విధించారు, ఆ జడ్జి పేరు ఏంటి', 'ఆ బొద్దింకను గాల్లోనే దింపేయాల్సింది' అంటూ సోషల్ మీడియాలో నవ్వులు పూయిస్తున్నారు. ఇదే సమయంలో క్యాబిన్ శుభ్రతపై కూడా కొంత మంది విమర్శలు చేస్తున్నారు. కాగా, ఈ ఘటనపై ఎయిర్ ఇండియా ఇంతవరకు స్పందించలేదు.

మరోవైపు, విమానంలో లాగ్‌బుక్‌ అనేది చాలా కీలతం. విమాన సిబ్బంది, పైలట్లు, మైంటెనెన్స్ టీమ్ కోసం ఉపయోగపడే అధికారిక రికార్డు. విమానంలో ఏ చిన్న సమస్య వచ్చినా.. లైట్స్‌ పని చేయకపోవడం, సీటు సమస్య, బొద్దింక కనిపించడం వంటి వాటిని కూడా లాగ్‌బుక్‌లో నమోదు చేయాల్సి ఉంటుంది. మేంటెనెన్స్ టీమ్‌కు దీన్ని అప్పగిస్తారు. అనంతరం నిర్వహణ సిబ్బంది వాటిని పరిష్కరించి.. తదుపరి ఫ్లైట్‌లో ప్రయాణికులకు ఇబ్బందులు తలెత్తకుండా సిద్ధం చేస్తారు.