ఫాస్టాగ్ యూజర్లకు రిలీఫ్.. కేవైవీ ప్రాసెస్ సులభతరం

నేషనల్ హైవేస్ అథారిటీ ఆఫ్ ఇండియా కీలక ప్రకటన చేసింది. వాహనదారులకు ఊరట కల్పించింది. ఫాస్టాగ్ యూజర్లకు నో యువర్ వెహికల్ ప్రక్రియను మరింత సులభతరం చేసినట్లు తెలిపింది. ఇండియన్ హైవేస్ మేనేజ్మెంట్ కంపెనీ లిమిటెడ్ పబ్లిష్ చేసిన అప్డేటెడ్ రూల్స్ ప్రకారం కంప్లెయింట్ లేని వాహనాలకు ఫాస్టాగ్ సేవలను నిలిపివేయరు. ఆ వాహనదారులు కేవైవీ ప్రొసీజర్ చాలా ఈజీగా పూర్తి చేసేందుకు అవకాశం ఇచ్చారు. మరి కొత్త రూల్స్‌లో ఎలాంటి మార్పులు చేశారు అనేది తెలుసుకునే ప్రయత్నం చేద్దాం.

ఎన్‌హెచ్ఏఐ కొత్త మార్గదర్శకాల ప్రకారం.. కేవైవీ ప్రొసీజర్ పూర్తి చేసేందుకు ఇకపై కార్లు, జీపులు లేదా వ్యాన్ల సైడ్ ఫోటోలు అవసరం లేదు. ఫాస్టాగ్, నంబర్ ప్లేట్ కనిపించేలా ముందు నుంచి తీసిన ఫోటోలు మాత్రమే అప్లోడ్ చేస్తే సరిపోతుంది. దీంతో పాటుగా మరో విధంగా రిలీఫ్ కల్పించింది. వాహన్ వెబ్‌సైట్లో వాహనం నంబర్, ఛాసిస్ నంబర్ లేదా మొబైల్ నంబర్ ఎంటర్ చేయాగానే ఇకపై వాహన్ వెబ్‌సైట్ నుంచి ఆటోమేటిక్‌గా వెహికల్ ఆర్‌సీ వివరాలు కనిపిస్తాయి. అలాగే ఒక వేళ ఒకే మొబైల్ నంబర్‌పై రెండు లేదా అంతకంటే ఎక్కువ వాహనాలు రిజిస్టర్ అయి ఉంటే యూజర్లు ఏ వాహనానికి కేవైవీ పూర్తి చేయాలో ఎంపిక చేసుకునే అవకాశం ఇచ్చారు.

మరోవైపు.. కేవైవీ పాలసీకి ముందు జారీ చేసిన ఫాస్టాగ్ దుర్వినియోగం లేదా వదులుగా ఉన్న ట్యాగ్‌లకు సంబంధించిన ఫిర్యాదులు అందకపోతే అవి యాక్టివ్‌గా కొనసాగుతాయి. అదనంగా, వినియోగదారులు తమ కేవైవీని పూర్తి చేయడానికి జారీ చేసిన బ్యాంకుల నుంచి ఎస్ఎంఎస్ రిమైండర్‌లను అందుకుంటారు. కేవైసీ ప్రాసెస్ పూర్తి చేసేందుకు ఇష్యూ చేసిన బ్యాంకులు ప్రత్యేక చొరవ తీసుకుని కస్టమర్లకు సమాచారం అందించాలి. డాక్యుమెంట్లు అప్లోడ్ చేయడం ద్వారా కేవైవీ ప్రొసీజర్ పూర్తి చేసేందుకు సాయం చేయాలి. ఇష్యూ చేసిన బ్యాంక్ నుంచి కేవైసీ సంబంధిత సమస్యలు ఉంటే వాహనదారులు నేరుగా నేషనల్ హైవే హెల్ప్‌లైన్ నంబర్ 1033కి ఫోన్ చేసి ఫిర్యాదు చేయవచ్చు. తమ సందేహాలను నివృత్తి చేసుకోవచ్చు.

హెచ్‌డీఎఫ్‌సీ బ్యాంక్ వెబ్‌సైట్ ప్రకారం నో యువర్ వెహికల్ అనేది ఫాస్టాగ్ యూజర్లు తమ ఫాస్టా‌గ్‌కు సంబంధించిన నిర్దేశిత ఫోటోలను అప్లోడ్ చేయాల్సిన రెగ్యులేటరీ అవసరాలు. సరైన వాహనానికి, సరైన నంబర్ వేహికల్‌కే ఫాస్టాగ్ జారీ చేశారని నిర్దారించేందుకు ఈ కొత్త కేవైవీ ప్రాసెస్ అందుబాటులోకి తెచ్చారు. విండ్ షీల్డ్‌పై ఫాస్టాగ్ అంటించారా లేదా అనేది సైతం దీని ద్వారా తెలిసిపోనుంది. ఒకసారి నో యువర్ వెహికల్ పూర్తి చేస్తే మూడేళ్ల వరకు వాలిడ్ లో ఉంటుంది. మూడేళ్ల తర్వాత రీ-కేవైవీ పూర్తి చేయాల్సి ఉంటుంది.