ప్రారంభమైన 'ఫ్లాగ్' సేవలు.. ఇక హెచ్1బీ నిపుణులను నియమించుకోవచ్చు

అమెరికాలో ఉద్యోగం చేయాలనుకునేవారికి ట్రంప్ సర్కార్ శుభవార్త చెప్పింది! అమెరికాలో ఉన్న కంపెనీలు.. విదేశీ వర్కర్లను నియమించుకోవడానికి లైన్ క్లియర్ అయింది. H-1B, H-2A, H-2B, PERM వీసాల కోసం దరఖాస్తు చేసుకోవడానికి.. ఫారిన్ లేబర్ అప్లికేషన్ గేట్‌వే (FLAG) సిస్టమ్‌ను తిరిగి ప్రారంభించింది ట్రంప్ సర్కార్. ఈ విషయాన్ని ఫారిన్ లేబర్ సర్టిఫికేష్ (OFLC) కార్యాలయం ధ్రువీకరించింది. ఈ వ్యవస్థ మళ్లీ ప్రారంభం కావడంతో.. కంపెనీలు ఇదివరకు చేసిన దరఖాస్తుల స్టేటస్‌ను తెలుసుకోవచ్చు. కొత్తగా వీసాల కోసం అప్లై చేసుకోవచ్చు. ఇది ఒక రకంగా హెచ్1బీతో పాటు ఇతర వీసాలతో ఉద్యోగాలు పొందాలనుకుంటున్నవారికి మంచి పరిణామమే అని చెప్పొచ్చు.

అమెరికాలో పని చేయాలంటే లేబర్ సర్టిఫికెట్లు ఉండాలి. ఉద్యోగం పొందే ప్రక్రియలో ఈ సర్టిఫికెట్ పొందడం ఒక స్టెప్‌. దీన్ని OFLC నిర్వహిస్తుంది. H-1B, H-2A, H-2B, PERM వీసా ప్రోగ్రామ్‌ల కింద విదేశీ వర్కర్లను నియమించుకోవాలంటే అమెరికాలోని కంపెనీలు ఈ స్టెప్‌ను దాటాలి. అయితే FLAG అనే ఆన్‌లైన్ ప్లాట్‌ఫామ్ ద్వారా ఈ సర్టిఫికెట్ కోసం దరఖాస్తు చేసుకోవాల్సి ఉంటుంది. OFLC సర్టిఫికెట్ ఉంటేనే.. యూఎస్ సిటిజెన్‌షిప్ అండ్ ఇమ్మిగ్రేషన్ సర్వీసెస్ (USCIS) వద్ద హెచ్1బీ లాంటి వీసా పిటిషన్లు వేసుకోవడానికి వీలు కలుగుతుంది. లేకుంటే.. వీసా ప్రాసెస్ ముందుకు కదలదు. కాగా, విదేశీ టెక్ నిపుణల కోసం ఇచ్చేది హెచ్1బీ వీసా. ఇక తాత్కాలిక వ్యవసాయ రంగంలో ఉద్యోగాల కోసం H-2A వీసా ఇస్తారు. ఇతర రంగాల్లో తాత్కాలిక ఉద్యోగాల కోసం H-2B వీసా ఇస్తారు. PERM అంటే శాశ్వత ఉద్యోగాల కోసం ఇచ్చే వీసా.

ఫ్లాగ్ ఎందుకు ఆగిపోయింది..?

అమెరికాలో షట్‌డౌన్ కొనసాగుతున్న సంగతి తెలిసిందే. దీని కారణంగా ప్రభుత్వ సంస్థల కార్యకలాపాలు నిలిచిపోయాయి. సెప్టెంబర్ 30తో ఈ సంస్థకు నిధుల కేటాయింపులు ఆగిపోయాయి. దీంతో ఫ్లాగ్‌ పోర్టల్ నిలిచిపోయింది. దీంతో కంపెనీలు విదేశీ వర్కర్లను నియమించుకోవడానికి దరఖాస్తులు చేసుకోలేకపోయాయి. ఇప్పటికే OFLC ముందు భారీ అప్లికేషన్లు ప్రాసెస్ కోసం ఎదురుచూస్తున్నాయి. 2024 మార్చిలో చేసిన దరఖాస్తులు.. 2025 జులై వరకు పెండింగ్‌లో ఉన్నాయి. అయితే ఫ్లాగ్ వ్యవస్థ స్టబిలైజ్ అయ్యే వరకు.. పర్మిట్ల ప్రాసెస్‌లో ఆలస్యం అయ్యే అవకాశం ఉందని నిపుణులు చెబుతున్నారు. మరోవైపు, హెచ్1బీ వీసా ఫీజు లక్ష డాలర్లకు పెంచడంతో విద్యార్థులు ఆందోళనకు గురవుతున్నారు. హెచ్1బీ వీసాదారులను నియమించుకునేందుకు కంపెనీలు ముందుకు రాకపోతే.. ఫ్లాగ్ పోర్టల్ అందుబాటులోకి వచ్చినా ఒరిగేది ఏం ఉండదు.