ఏపీ మహిళలకు జీఆర్‌సీ.. ప్రభుత్వం మరో కొత్త కార్యక్రమం

రాష్ట్రంలోని మహిళల సాధికారత కోసం ఆంధ్రప్రదేశ్ ప్రభుత్వం అనేక చర్యలు చేపడుతోంది.ఉచిత గ్యాస్ సిలిండర్లు, ఉచిత బస్సు ప్రయాణం వంటి పథకాలతో వారికి ఆర్థికంగా అండగా నిలుస్తోంది. అలాగే డ్వాక్రా మహిళలకు తక్కువ వడ్డీకే రుణాలు అందిస్తూ వారు సొంత కాళ్ల మీద నిలదొక్కుకునేలా చర్యలు తీసుకుంటోంది. మహిళలను వ్యాపారవేత్తలుగా తీర్చిదిద్దే ఉద్దేశంతో పలు ప్రోత్సాహకాలు అందిస్తోంది. అయితే ప్రభుత్వం ఎన్ని చర్యలు తీసుకుంటున్నప్పటికీ పలు అంశాలలో మహిళలు ఇబ్బందులు పడుతున్నారు. ఆర్థిక కారణాలతో పాటుగా పలు సామాజిక అంశాలు, మానసిక సమస్యలు వారిని కలవరపెడుతున్నాయి. ఇబ్బందులకు గురి చేస్తున్నాయి. ఇలాంటి వాటికి పరిష్కారం చూపేందుకు ఏపీ ప్రభుత్వం ఓ కొత్త కార్యక్రమం తీసుకువచ్చింది.. అదే జెండర్ రిసోర్స్ సెంటర్స్ .. 

ఈ జెండర్ రిసోర్స్ కేంద్రాలను రాష్ట్రంలోని ప్రతి నియోజకవర్గంలో ఏర్పాటు చేయాలని ఏపీ ప్రభుత్వం సంకల్పించింది. అందులో భాగంగా ఇప్పటికే అల్లూరి వంటి కొన్ని జిల్లాల్లో వీటిని అందుబాటులోకి తెచ్చారు. ఈ జెండర్ రిసోర్స్ కేంద్రాల ద్వారా ఆర్థిక, సామాజిక, మానసిక సమస్యల నుంచి మహిళలకు భరోసా కల్పించవచ్చని ప్రభుత్వం భావిస్తోంది. వేధింపులు, బయటకు చెప్పుకోలేని సమస్యలు, చివరకు పోలీస్ స్టేషన్‌లోనూ ఫిర్యాదు చేసేందుకు వెనుకాడే అంశాలతో బాధపడే మహిళలకు ఈ జెండర్ రిసోర్స్ కేంద్రాల ద్వారా సాయం అందించనున్నారు.

  మరోవైపు జెండర్ రిసోర్స్ కేంద్రాల్లో అందరూ మహిళలే ఉంటారు. సెర్ప్ ఆధ్వర్యంలో ఈ కేంద్రాలు నడుస్తున్నాయి. ఈ కేంద్రాల్లోని కమిటీలు బాధితులకు సాయం చేస్తాయి. అవసరమైతే వారికి కొన్ని రోజులు వసతి కూడా కల్పిస్తారు. ఒక టీమ్‌లో ఐదుగురు సభ్యులుగా ఉంటారు. ఛైర్ పర్సన్, సెక్రటరీ ఇలా ఐదుగురితో బృందాలను ఏర్పాటు చేస్తారు. మహిళలకు ఏదైనా సమస్య వస్తే నేరుగా ఈ కేంద్రాలను సంప్రదించవచ్చు. డ్వాక్రా సంఘాల సభ్యులలో బాగా చదువుకున్న వారిని ఇందుకోసం రిసోర్స్ పర్సన్లుగా ఎంపిక చేస్తారు. జెండర్ రిసోర్స్ కేంద్రాలు ప్రతి గురువారం అందుబాటులో ఉంటాయి. మిగతా రోజుల్లో మహిళలు వెలుగు సిబ్బందిని సంప్రదించవచ్చని అధికారులు చెప్తున్నారు.

జీఆర్‌సీలలో లభించే సేవలు

బాల్యవివాహాలు, వేధింపులను అడ్డుకోవటం, ఉన్నత విద్యను అభ్యసించేలా బాలికలకు ప్రోత్సాహం, సమాన పనికి సమాన వేతనం లభించేలా చర్యలు, మహిళలకు ఆస్తి సమస్యల్లో సహాయం, పోషకాహారం అందించడం వంటి సేవలు అందిస్తారు.