వీల్ ఛైర్‌లో వచ్చి,,,ప్రతీకా రావల్ విన్నింగ్ మూమెంట్ సెలబ్రేషన్స్

ఆదివారం నవీ ముంబైలోని డీవై పాటిల్ క్రికెట్ స్టేడియంలో జరిగిన మహిళల వన్డే ప్రపంచకప్ 2025 ఫైనల్‌‌లో భారత్ విజేతగా నిలిచింది. దీంతో 140 కోట్ల మంది ప్రజలను సంబురాల్లో మునిగితేల్చింది. ఈ మ్యాచ్‌ను ప్రత్యక్షంగా వీక్షించేందుకు రోహిత్ శర్మ, నీతా అంబానీ లాంటి ప్రముఖులు సైతం హాజరయ్యారు. ఇక ఈ మ్యాచ్ తర్వాత స్టేడియంలో ఓ స్పెషల్ గెస్ట్ కనిపించింది. ఆమెనే ప్రతీకా రావల్ .

ఈ టోర్నీలో విశేషంగా రాణించిన ప్రతీకా రావల్.. బంగ్లాదేశ్‌తో చివరి లీగ్ మ్యాచులో గాయపడింది. చీలమండ గాయంతో టోర్నీ మొత్తానికి దూరమైంది. కానీ అంతకుముందు వరకు ఈ టోర్నీలో ఆమె పరుగుల వరద పారించింది. షఫాలీ వర్మ ప్లేసులో టీమిండియా వరల్డ్ కప్ బృందంలో చోటు దక్కించుకున్న ప్రతీకా.. అంచనాలకు మించి రాణించింది. ముఖ్యంగా ఈ టోర్నీలో స్మృతి మంధానతో కలిసి.. భారత్‌కు శుభారంభాలు అందించింది. మహిళల వన్డే ప్రపంచకప్ 2025లో ఆరు ఇన్నింగ్స్‌లలో 50కి పైగా సగటుతో 308 పరుగులు స్కోరు చేసింది. ఇందులో ఒక సెంచరీ, ఒక హాఫ్ సెంచరీ ఉన్నాయి.

తన ప్రదర్శనతో టీమిండియా ఫైనల్ చేరడంలో కీలకపాత్ర పోషించింది ప్రతీకా. సెమీస్ చేరాలంటే తప్పక గెలవాల్సిన మ్యాచులో సెంచరీ కొట్టింది. న్యూజిలాండ్‌పై 122 రన్స్ చేసి.. జట్టును నాకౌట్‌కు తీసుకెళ్లింది. ఇక గాయంతో టోర్నీకి దూరమైన ఆమె.. ఫైనల్ మ్యాచ్‌ను వీక్షించేందుకు నవీ ముంబై క్రికెట్ స్టేడియానికి వచ్చింది. టీమిండియా విజయం సాధించిన తర్వాత వీల్ ఛైర్‌లో నుంచే.. సంబురాలు జరుపుకుంది. త్రివర్ణ పతకాన్ని చేతబూని.. సంతోషాన్ని వ్యక్తం చేసింది. వీల్ ఛైర్‌లో కూర్చొని.. తన భావోద్వేగాన్ని వ్యక్తం చేసింది. ఈ సందర్భంగా మాట్లాడుతూ.. ఏడ్చినంత పని చేసింది. ఈ సంతోషాన్ని మాటల్లో చెప్పలేనని పేర్కొంటూ.. భావోద్వేగానికి గురైంది. ప్రతీకా రావల్ వీల్ ఛైర్‌‌ సంబురాలు చేసుకున్న వీడియో సోషల్ మీడియాలో వైరల్‌గా మారింది. ఆ తర్వాత పోడియంపై కూడా వీల్ ఛైర్‌లో కూర్చునే ఫొటోలకు ఫోజులు ఇచ్చింది. ఒక్క కాలుతోనే సహచర ఆటగాళ్లతో కలిసి పాటలకు స్టెప్పులేసింది.