పవన్ కళ్యాణ్ సార్థక నామధేయుడు.... భూమన కరుణాకర్ రెడ్డి

జనసేన అధినేత, ఏపీ డిప్యూటీ సీఎం పవన్ కళ్యాణ్ మీద వైసీపీ నేత, మాజీ ఎమ్మెల్యే భూమన కరుణాకర్ రెడ్డి వ్యంగ్యాస్త్రాలు సంధించారు. ఎకో టూరిజం గమ్యస్థానంగా పులికాట్ సరస్సును తీర్చిదిద్దాలని.. ఫ్లెమింగోల శాశ్వత నివాస స్థావరంగా మార్చే ప్రయత్నం చేయాలని డిప్యూటీ సీఎం పవన్ కళ్యాణ్ ఇటీవల అధికారులను ఆదేశించిన సంగతి తెలిసిందే. ఈ నేపథ్యంలో పవన్ కళ్యాణ్ వ్యాఖ్యలపై భూమన సెటైర్లు వేశారు. పులికాట్ సరస్సులో ఫ్లెమింగో పక్షులకు శాశ్వత నివాసం కల్పించాలని పవన్ కళ్యాణ్ తీసుకున్న నిర్ణయం అభినందనీయమన్న భూమన కరుణాకర్ రెడ్డి.. ఆయన సార్థకనామధేయుడని.. పేరులోనే పవనం, కళ్యాణం రెండూ ఉన్నాయంటూ సెటైర్లు వేశారు. వందల ఏళ్ల నుంచి సైబీరియా నుంచి ఫ్లెమింగో పక్షులు వేల కిలోమీటర్లు ప్రయాణించి పులికాట్ వస్తున్నాయని భూమన అన్నారు. అలాంటి పక్షులకు ఇక్కడ స్థిర నివాసం ఏర్పాటు చేయాలనుకోవటం గొప్ప నిర్ణయమంటూ ఎద్దేవా చేశారు.

ఆ రకంగానే వందల కిలోమీటర్లు దూరం ప్రయాణించే పులస చేపలకు కూడా గోదావరిలో శాశ్వత నివాసం కల్పించాలని భూమన కరుణాకర్ రెడ్డి కోరారు. ఏప్రిల్, మే నెలల్లో ఎండాకాలం వస్తుందని.. ఆ నెలల్లో ప్రజలకు ఇబ్బందులు లేకుండా శీతల వాతావరణాన్ని పవన్ కళ్యాణ్ తన ఆధీనంలో ఉంచుకుని రాష్ట్రంలో చల్లదనం శాశ్వతంగా ఉంచాలంటూ పవన్ కళ్యాణ్ మీద భూమన సెటైర్లు గుప్పించారు. సనాతన ధర్మపరిరక్షకుడిగా పవన్ కళ్యాణ్ ఎన్నో చేయాలన్న భూమన.. ప్రమాదాలు జరగకుండా రోడ్లు, దేవాలయాల్లో ప్రమాదాలు జరగకుండా, మద్యం మత్తులో అనర్థాలు జరగకుండా చూడాలంటూ వ్యంగ్యాస్త్రాలు సంధించారు. పవన్ కళ్యాణ్ గాల్లో పక్షుల్ని, నీటిలో చేపల్ని ఆధీనంలో ఉంచుకోవాలనుకోవడం అభినందిస్తున్నానని.. ప్రకృతిని శాసించే శక్తి మీకు కలగాలని దేవుడ్ని ప్రార్థిస్తున్నానంటూ ఎద్దేవా చేశారు. పవన్ కళ్యాణ్ జ్ఞానం ఏపాటిదో ప్రజలకు ఇప్పటికే అర్థమైందంటూ ఎద్దేవా చేశారు.

మరోవైపు శీతాకాలంలో పులికాట్ సరస్సుకు సైబీరియన్ పక్షులు వలస వస్తుంటాయి. వేల కిలోమీటర్లు ప్రయాణం చేసి వస్తుంటాయి. వీటిని చూసేందుకు సందర్శకులు పెద్ద సంఖ్యలో అక్కడకు వెళ్తుంటారు. ఈ నేపథ్యంలో ఫ్లెమింగో ఫెస్టివల్ నిర్వహిస్తుంటారు. మూడు రోజుల పాటు ప్రభుత్వం ఈ ఫ్లెమింగో ఫెస్టివల్ నిర్వహిస్తుంది. ఈ క్రమంలోనే అధికారులకు పవన్ కళ్యాణ్ ఇటీవల కీలక సూచనలు చేశారు. ఎకో టూరిజాన్ని అభివృద్ధి చేసే కార్యక్రమంలో భాగంగా ఫ్లెమింగోలు స్థిర నివాసం ఏర్పాటు చేసుకునేలా అనుకూల పరిస్థితులు కల్పించాలని సూచించారు.

వాటి ఆహారం, విశ్రాంతి, భద్రతకు తీసుకుంటున్న చర్యలు మంచి ఫలితాలు ఇస్తున్నాయని అన్నారు. పులికాట్ సరస్సును ఫ్లెమింగోల శాశ్వత నివాస స్థావరంగా మార్చేందుకు అనుకూలమైన పరిస్థితులు కల్పించేందుకు కృషి చేస్తున్నామని పవన్ కళ్యాణ్ చెప్పుకొచ్చారు. ఈ క్రమంలోనే పవన్ వ్యాఖ్యలపై భూమన కరుణాకర్ రెడ్డి సెటైర్లు గుప్పించారు.