ప్రపంచంలోనే అతిపెద్ద రైల్వే స్టేషన్లు.., ఆ రాష్ట్రంలోనే రెండు స్టేషన్లు

ప్రపంచవ్యాప్తంగా రైల్వేలకు ఎంతో ఘన చరిత్ర ఉంది. కేవలం ప్రయాణికులను ఒకచోటు నుంచి మరో చోటుకు తరలించడానికి మాత్రమే కాకుండా.. సరుకు రవాణాకు కూడా ఉపయోగపడుతున్నాయి. తక్కువ ఖర్చుతో ఎక్కువ సేవలు అందిస్తూ.. రవాణా రంగంలో రైల్వేలు.. చాలా దేశాలకు ఆర్థిక వృద్ధిలో కీలక పాత్ర వహిస్తున్నాయి. ఒకవైపు ప్రయాణికులను, మరోవైపు గూడ్స్ రవాణాతో రైల్వేలు వార్తల్లో నిలుస్తున్నాయి. అదే కాకుండా మారుమూల ప్రాంతాలకు, ఎత్తైన కొండలు, నదులు, ఎడారి ప్రాంతాలకు రైల్వే నెట్‌వర్క్‌ను విస్తరించడంతో.. ఎన్నో ఇంజినీరింగ్ అద్భుతాలను సృష్టిస్తున్నాయి. మన దేశంలో కూడా అనేక రైల్వే స్టేషన్లు, రైల్వే లైన్లు, రైల్వే వంతెనలు.. ప్రసిద్ధి చెందాయి.

అత్యధిక ప్లాట్‌ఫారాలు, అత్యంత రద్దీ, అత్యధిక విస్తీర్ణం, ఎక్కువ మంది ప్రయాణికులు ప్రయాణించడం సహా మరెన్నో ప్రత్యేకతలు కలిగిన రైల్వే స్టేషన్లు వివిధ దేశాల్లో ఉన్నాయి. ఇక మన దేశంలోని పశ్చిమ బెంగాల్‌లోని కోల్‌కతా హౌరా జంక్షన్ .. సీల్దా స్టేషన్, ముంబై ఛత్రపతి శివాజీ టెర్మినస్ వంటి స్టేషన్లు.. ప్రపంచంలోనే అతిపెద్ద రైల్వే స్టేషన్ల జాబితాలో టాప్-6లో నిలవడం విశేషం.

గ్రాండ్ సెంట్రల్ టెర్మినల్ (న్యూయార్క్, అమెరికా)

అమెరికా న్యూయార్క్ రాష్ట్రంలో ఈ గ్రాండ్ సెంట్రల్ టెర్మినల్ రైల్వే స్టేషన్ ఉంది. ఈ టెర్మినల్ అత్యధిక ప్లాట్‌ఫారాలు (44) కలిగి ఉంది. అదే సమయంలో ఏకంగా 67 రైల్వే ట్రాక్‌లు కలిగి ఉన్న రైల్వే స్టేషన్‌గా ప్రపంచ రికార్డును దక్కించుకోవడం గమనార్హం. ఈ గ్రాండ్ సెంట్రల్ టెర్మినల్ నుంచి నిత్యం 1.25 లక్షల మంది ప్రయాణికులు రాకపోకలు సాగిస్తూ ఉంటారు.

షింజుకు స్టేషన్ (టోక్యో, జపాన్)

జపాన్ రాజధాని టోక్యోలోని షింజుకు రైల్వే స్టేషన్ ప్రపంచంలోనే అత్యంత రద్దీ కలిగినదిగా ప్రసిద్ధికెక్కింది. ఈ షింజుకు రైల్వే స్టేషన్ నుంచి ప్రతిరోజూ సుమారు 35 లక్షల మంది ప్రయాణికులు ప్రయాణాలు చేస్తారు. ఈ స్టేషన్ జపాన్ రవాణా వ్యవస్థలో కీలక పాత్ర పోషిస్తోంది.

నగోయా స్టేషన్ (జపాన్)

మొత్తం విస్తీర్ణం పరంగా చూస్తే ప్రపంచంలోనే అతిపెద్ద రైల్వే స్టేషన్‌గా జపాన్‌లోని నగోయా రైల్వే స్టేషన్ నిలుస్తుంది. ఈ రైల్వే స్టేషన్‌లో ప్రయాణికులకు అందించాల్సిన అన్ని సేవలతోపాటు.. షాపింగ్ కాంప్లెక్స్‌ ఉంటాయి. అంతేకాకుండా జపాన్ బుల్లెట్ రైలు నెట్‌వర్క్‌కు కూడా ఈ నగోయా స్టేషన్ కేంద్రంగా ఉంది.

బీజింగ్ సౌత్ రైల్వే స్టేషన్ (చైనా)

చైనా రాజధాని బీజింగ్‌లోని సౌత్ రైల్వే స్టేషన్.. అధిక వేగంతో ప్రయాణించే రైళ్లకు ప్రధాన కేంద్రంగా నిలుస్తోంది. ప్రపంచంలోనే విశాలమైన ప్రాంతాన్ని కవర్ చేసే రైల్వే స్టేషన్‌గా బీజింగ్ సౌత్ రైల్వే స్టేషన్ ప్రసిద్ధి చెందింది.

హౌరా జంక్షన్ (కోల్‌కతా, పశ్చిమ బెంగాల్)

పశ్చిమ బెంగాల్ రాజధాని కోల్‌కతాలోని హౌరా జంక్షన్ రైల్వే స్టేషన్.. 23 ప్లాట్‌ఫారాలతో మన దేశంలోనే అతిపెద్ద రైల్వే స్టేషన్‌గా నిలిచింది. నిత్యం 7.5 లక్షలకు పైగా ప్రయాణికులు.. ఈ హౌరా జంక్షన్ రైల్వే స్టేషన్ నుంచి ప్రయాణాలు చేస్తున్నారు. తూర్పు భారతదేశానికి ప్రధాన రవాణా కేంద్రంగా ఈ హౌరా జంక్షన్ రైల్వే స్టేషన్ కొనసాగుతూ వస్తోంది.

సీల్దా స్టేషన్ (కోల్‌కతా, పశ్చిమ బెంగాల్)

హౌరా జంక్షన్ తర్వాత.. మళ్లీ అదే పశ్చిమ బెంగాల్‌ కోల్‌కతాలోని సీల్దా రైల్వే స్టేషన్ మరో భారీ స్టేషన్ జాబితాలో నిలిచింది. ఈ సీల్దా రైల్వే స్టేషన్‌లో 21 ప్లాట్‌ఫారాలు ఉంటాయి. ప్రతీ రోజు 7 లక్షల మందికి ఈ రైల్వే స్టేషన్ సేవలు అందిస్తోంది.

ఛత్రపతి శివాజీ మహారాజ్ టెర్మినస్ (సీఎస్‌టీ, ముంబై, మహారాష్ట్ర)

చారిత్రక ప్రాధాన్యత కలిగిన ఈ ఛత్రపతి శివాజీ మహారాజ్ టెర్మినస్ రైల్వే స్టేషన్ యునెస్కో ప్రపంచ వారసత్వ ప్రదేశంగా గుర్తింపు పొందింది. ఇది మహారాష్ట్ర రాజధాని ముంబైలో ఉంది. ఈ ఛత్రపతి శివాజీ మహారాజ్ టెర్మినస్‌లో 18 ప్లాట్‌ఫారాలు ఉండగా.. రోజుకు 6 లక్షల మందికిపైగా ప్రయాణికులకు సేవలు అందిస్తోంది.

లండన్ వాటర్‌లూ (బ్రిటన్)

బ్రిటన్‌ రాజధాని లండన్‌లోని లండన్ వాటర్‌లూ రైల్వే స్టేషన్‌ 24 ప్రధాన లైన్ ప్లాట్‌ఫారాలు కలిగి ఉంటుంది. ఈ స్టేషన్ యునైటెడ్ కింగ్‌డమ్‌లో అత్యంత రద్దీ కలిగినదిగా ప్రాముఖ్యతను కలిగి ఉంది.

టోక్యో స్టేషన్ (జపాన్)

జపాన్ రాజధాని టోక్యో నగరంలో ఉన్న ఈ టోక్యో రైల్వే స్టేషన్‌లో 28 ప్లాట్‌ఫారాలు ఉంటాయి. జపాన్ హై స్పీడ్ రైళ్లు, నగర రైల్వే లైన్లకు ప్రధాన టెర్మినస్‌గా ఈ టోక్యో స్టేషన్ పనిచేస్తుంది.

పారిస్ గార్ డూ నార్డ్ (ఫ్రాన్స్)

యూరప్‌లోని అత్యంత రద్దీ స్టేషన్లలో ఫ్రాన్స్‌లోని పారిస్ గార్ డూ నార్డ్ రైల్వే స్టేషన్‌ ఒకటిగా నిలిచింది. పారిస్ గార్ డూ నార్డ్ రైల్వే స్టేషన్‌‌లో 32 ప్లాట్‌ఫారాలు కలిగి.. రోజుకు 7 లక్షల మంది ప్రయాణికులను నిర్వహిస్తుంది.

ఇక ఈ స్టేషన్లు కేవలం రైళ్లు ఆగడానికి, రాకపోకలు సాగించడానికి మాత్రమే కాకుండా.. ఆయా దేశాల అద్భుతమైన ఇంజనీరింగ్, డిజైన్, నిర్వహణ సామర్థ్యంతో ప్రపంచానికి ఆదర్శంగా నిలుస్తున్నాయి.