జుట్టుకు రంగు అక్కర్లేదు ఓ ఉసిరికాయ చాలు

ఈ రోజుల్లో జుట్టు సమస్యలు సర్వసాధారణంగా మారాయి. జుట్టు రాలడం, పల్చబడటం, జుట్టు పెరుగుదల ఆగిపోవడం. వీటితో పాటు తెల్ల జుట్టు సమస్య కూడా చాలా మందిని వేధిస్తుంది. నల్ల జుట్టు తెల్లగా మారే సమస్య ఇప్పుడు చాలా సాధారణం అయిపోయింది. బిజీ లైఫ్‌స్టైల్, చెడు తిండి అలవాట్లు, ఆహారంలో తగిన పోషకాలు లేకపోవడం, సూర్యరశ్మి, జన్యు సంబంధిత సమస్యలు, ఒత్తిడి వంటి కారణాల వల్ల తెల్ల జుట్టు వస్తుంది. ఒకప్పుడు వయసు పైబడ్డ వారికి తెల్ల జుట్టు సమస్య వచ్చేది. ఇది కాలాక్రమేణా జరిగే విషయమే. ఇందులో ఎలాంటి ఆందోళన చెందాల్సిన అవసరం లేదు.

అయితే, ఈ రోజుల్లో యువతలో కూడా ఈ సమస్య వస్తుంది. అంతేందుకు చిన్న పిల్లల్లో తెల్ల జుట్టు సమస్య వస్తుంది. ఇందుకు మెలనిన్ సరిగ్గా లేకపోవడమే కారణం. నిండా ముప్పై నిండక ముందే చాలా మందికి జుట్టు నెరిసిపోతుంది. ఈ సమస్యను తగ్గించుకోవడానికి చాలా మంది ఎన్నో ప్రయత్నాలు చేస్తారు.

మార్కెట్లో దొరికే రంగులు, కెమికల్ డైలు వాడుతుంటారు. ఇవి తాత్కాలికంగా జుట్టు రంగును మారుస్తాయి. అయితే, జుట్టుకు సంబంధించిన ఇతర సమస్యలకు కారణమవుతాయి. అయితే, జుట్టుకు రంగు, కెమికల్ డై వాడకుండానే సహజంగా నల్లగా మార్చుకోవచ్చని ఆయుర్వేద డాక్టర్ ఉపాసన వోహ్రా చెబుతున్నారు. ఇందుకోసం ఉసిరికాయ ఉంటే చాలు. ఉసిరికాయతో తెల్ల జుట్టును నల్లగా ఎలా మార్చుకోవాలో ఇప్పుడు చుద్దాం.

తెల్ల జుట్టును నల్లగా మార్చడానికి ఉసిరి

​ఉసిరిలో సహజ యాంటీఆక్సిడెంట్లు పుష్కలంగా ఉన్నాయి. ఇవి జుట్టు రంగును పెంచడంలో ప్రభావాన్ని చూపుతాయి. తెల్ల జుట్టుకు ఉసిరి అప్లై చేయడం వల్ల జుట్టు యొక్క pH స్థాయి సమతుల్యం అవుతుంది. ఇది జుట్టు బూడిద రంగులోకి మారకుండా నిరోధిస్తుంది.

ఉసిరిలో మంచి మొత్తంలో కాపర్ ఉంటుంది. ఇది మెలనిన్ ఉత్పత్తికి సాయపడుతుంది. జుట్టుకు నల్ల రంగు ఇచ్చేది మెలనిన్. అందుకే ఉసిరి తెల్ల జుట్టుకు ప్రయోజనకరంగా ఉంటుంది. జుట్టును నల్లగా చేయడమే కాకుండా దాని ఆరోగ్యాన్ని కాపాడుతుంది. ఇక, తెల్ల జుట్టుకు ఉసిరికాయని ఎలా వాడాలో డాక్టర్ ఉపాసన చెప్పారు. ఆ వివరాలపై ఓ లుక్కేద్దాం.

కావాల్సిన పదార్థాలు

* ఉసిరి కాయలు - ఓ రెండు లేదా మూడు (పెద్ద సైజులో ఉన్నది ఒక్కటైనా సరిపోతుంది)

* ఇనుప కడాయి, దానిపై మూత

తయారీ విధానం

ఓ పెద్ద ఉసిరికాయ లేదా రెండు మూడు చిన్న ఉసిరికాయల్ని తీసుకుని బాగా తురుముకోవాలి. ఉసిరి తురుముని ఒక గిన్నెలోకి తీసుకోండి. ఆ తర్వాత ఉసిరి తురుమును ఒక ఇనుప కడాయిలోకి తీసుకోండి. ఆ ఉసిరి తురుమును అలాగే ఉంచి దానిపై మూత పెట్టండి. ఒక రాత్రంతా లేదా అది నల్లగా మారేంత వరకు మూత అలాగే ఉంచండి. ఉసిరి తురుము నల్లగా అయినా తర్వాత దాని నుంచి రసాన్ని ఫిల్టర్ చేయండి.

వాడే విధానం

నల్లగా మారిన ఉసిరి రసాన్ని జుట్టు కుదుళ్ల నుంచి చివర్ల వరకు బాగా అప్లై చేయాలి. ఇలా అప్లై చేసి ఐదు గంటల పాటు అలాగే ఉంచాలని డాక్టర్ ఉపాసన వోహ్రా చెబుతున్నారు. ఐదు గంటల పాటు అలాగే ఉంచిన తర్వాత.. తల స్నానం చేయాలని డాక్టర్ సూచిస్తున్నారు.

తలస్నానం కోసం షాంపూ వాడకూడదని డాక్టర్ చెబుతున్నారు. నార్మల్ వాటర్‌తో వాష్ చేసుకోవాలని చెప్పారు. ఈ చిట్కాతో పాటు ఇతర టిప్స్ కూడా తెల్ల జుట్టును నల్లగా మార్చడంలో సాయపడతాయి.

ఉసిరి పొడి చిట్కా

ఒక గిన్నెలో హెన్నా తీసుకొని ఉసిరి పొడితో బాగా కలపండి. ఇప్పుడు కొబ్బరి నూనె, నీటిని కలిపి పేస్టులా చేయండి. ఈ హెయిర్ డై జుట్టును నల్లగా చేయడానికి సాయపడుతుంది. ఈ హెయిర్ మాస్క్‌ను తలపై 3 నుంచి 4 గంటలు ఉంచండి. ఈ డైని ప్రతి 15 రోజులకు ఒకసారి జుట్టుకు అప్లై చేయవచ్చు.

ఉసిరితో హెయిర్ డై

​తెల్ల జుట్టును నల్లగా చేయడానికి.. ఉసిరి కాయల్ని వాడండి. 2-3 పచ్చి ఉసిరి కాయల్ని మెత్తగా పేస్ట్ చేయండి. ఈ పేస్టుకు టీ ఆకులు జోడించండి. ఆ తర్వాత సగం నిమ్మకాయ నుంచి రసాన్ని పిండుకుని.. ఆ పేస్టులో కలపాలి. ఇంకేముంది హెయిర్ డై సిద్ధమైనట్టే.

అయితే, తెల్ల జుట్టుకు హెయిర్ డై వేసే ముందు.. ఏదైనా నూనెను అప్లై చేసుకోండి. ఆ తర్వాత షాంపూతో తలస్నానం చేయండి. జుట్టు పూర్తిగా ఆరిన తర్వాత డై వేయండి. ఈ నేచరల్ డై నెలకు ఓ రెండు సార్లు వాడటం వల్ల తెల్ల జుట్టు కాస్తా నల్లగా మారుతుందని నిపుణులు చెబుతున్నారు.