ఢిల్లీ ఎర్రకోట పేలుడు.. తీవ్రతకు పగిలిపోయిన సీసీటీవీ కెమెరా

దేశ రాజధానిలో జరిగిన పేలుడుకు సంబంధించిన సీసీటీవీ ఫుటేజ్ బుధవారం వెలుగులోకి వచ్చింది. ఢిల్లీలోని ఎర్రకోట వద్ద కారు బాంబు పేలుడు ఘటనపై జాతీయ దర్యాప్తు సంస్థ (ఎన్ఐఏ) విచారణ ప్రారంభించింది. ఈ సంఘటనకు సంబంధించిన 15 సెకన్ల క్లిప్‌లో ఎర్రకోట మెట్రో స్టేషన్ సమీపంలో రద్దీగా ఉండే ప్రాంతం కనిపిస్తుంది. డజన్ల కొద్దీ వాహనాలు నెమ్మదిగా కదులుతున్నాయి. పేలుడుకు మూలంగా భావిస్తున్న i20 కారు ఆ ప్రాంతం నుంచి వెళ్తుండగా.. ఘటనా స్థలంలో ఉవ్వెత్తున్న ఎగిసిపడుతున్న భారీ అగ్నిగోళం కనిపిస్తుంది. సాయంత్రం 6.50 గంటలకు జరిగిన ఈ పేలుడు జరిగిందని, మంటల్లో పలు వాహనాలు దగ్దమయ్యాయని కంట్రోల్ అందించిన సీసీటీవీ వీడియోలో తేలింది. అయితే, ఈ పేలుడు తీవ్రతకు సీసీటీవీ కూడా పగిలిపోవడంతో తర్వాత ఏం జరిగింది? అనేది తెలుసుకోవడం కష్టంగా మారింది. దర్యాప్తునకు కొంత ఆటంకం కలిగింది. పేలుడు జరిగిన వెంటనే విద్యుత్‌ సరఫరా నిలిచిపోవడంతో ప్రజలు భయభ్రాంతులకు గురై వీధుల్లో పరుగులు తీశారు.

జైషే మహమ్మద్, అన్సార్ ఘజావత్ ఉల్ హింద్ ఉగ్రవాద సంస్థలకు సంబంధించిన ‘వైట్ కాలర్’ ఉగ్ర మాడ్యూల్‌ను బయటపడిన నేపథ్యంలో కశ్మీర్, హర్యానా, ఉత్తర ప్రదేశ్‌ల వరకు విస్తరించిన ఈ కుట్రలో ఫరీదాబాద్‌లో ముగ్గురు వైద్యులు సహా ఎనిమిది మందిని అరెస్ట్ చేసి, 2900 కిలోల అమ్మోనియం నైట్రేట్ సహా పేలుడు పదార్థాలను స్వాధీనం చేసకున్న కొన్ని గంటల్లోనే ఢిల్లీలో పేలుడు చోటుచేసుకుంది. అల్ ఫలాహ్ యూనివర్సిటీలో పనిచేసే డాక్టర్ ముజామిల్ గనాయ్, డాక్టర్ షహీన్ సయ్యద్ వద్ద 360 కిలోల అమ్మోనియం నైట్రేట్ పట్టుబడింది.

ఢిల్లీ కారు పేలుడులో అనుమానితుడు డాక్టర్ ఉమర్ నబీకి సైతం ఈ యూనివర్సిటీతో సంబంధం ఉంది. పేలుడుకు ముందు ఎర్రకోట వద్ద ఉమర్, గనాయ్‌లు రెక్కీ నిర్వహించారు. రద్దీ ప్రదేశాల్లో దీపావళి సమయంలోనే పేలుళ్లకు ప్రయత్నించి విఫలమయ్యారు. అంతేకాదు, జనవరి 26న రిపబ్లిక్ డే రోజు పేలుళ్లకు ప్లాన్ చేసినట్టు మూలాలు తెలిపారు. అమెనియం నైట్రేట్, ఫ్యూయల్ కలిపిన ANFO నిర్దిష్టంగా తెలియని పరిమాణంలో హ్యుందాయ్ i20లో ఉన్నట్టు తెలుస్తోంది. బాంబును ఒక డిటొనేటర్ ద్వారా పేల్చినట్టు అనుమానిస్తున్నారు. పేలుడులో హై-గ్రేడ్ పేలుడు పదార్థాలను కూడా ఉపయోగించినట్టు విశ్వసనీయ వర్గాలు పేర్కొన్నాయి. ఘటనా స్థలిలో సేకరించిన నమూనాల్లోని ఒకటి అమ్మోనియం నైట్రేట్ కంటే అత్యంత శక్తిమంతమైందని నమ్ముతున్నారు. ఫరీదాబాద్‌లో ఇద్దరు వైద్యులను పోలీసులు అరెస్ట్ చేయడంతో తాను కూడా దొరికిపోతాననే భయపడి డాక్టర్ ఉమర్ పేలుడుకు పాల్పడినట్టు అనుమానిస్తున్నారు.