ఈ పండ్లు తింటే కోలన్‌ క్యాన్సర్‌ ముప్పు తగ్గుతుంది

ఆరోగ్యంగా జీవించడానికి.. మొదటి పునాది మన గట్‌ హెల్త్‌ అని చెప్పొచ్చు.. అంటే జీర్ణవ్యవస్థ సరిగా పనిచేయడం. కానీ చాలా మందికి తెలియని విషయం ఏమిటంటే, మనం ప్రతిరోజూ తినే ఆహారం నేరుగా మన గట్‌ మైక్రోబయోమ్‌‌ను ప్రభావితం చేస్తుంది. ఇది శరీరంలో ఉండే “మంచి బ్యాక్టీరియా” సమూహం. ఈ మంచి బ్యాక్టీరియా ఇన్‌ఫ్లమేషన్‌ (వాపు)ను తగ్గించి, కోలన్‌ క్యాన్సర్‌ వంటి వ్యాధుల నుంచి రక్షణనిస్తాయి. సైన్స్ డైరెక్ట్‌లో ప్రచురించి ఒక అధ్యయనం ప్రకారం.. జనాభా పెరగడం, వృద్ధాప్యం, మానవ అభివృద్ధి కారణంగా 2040 లో ప్రపంచవ్యాప్తంగా 3.2 మిలియన్ల కొత్త కొలొరెక్టల్ క్యాన్సర్ కేసులు పెరిగే అవకాశం ఉందని అంచనా.

హార్వర్డ్‌లో శిక్షణ పొందిన గ్యాస్ట్రోఎంటరాలజిస్ట్ డాక్టర్ సౌరభ్ సేథి.. మన పేగు ఆరోగ్యానికి మేలు చేసి.. కోలన్‌ క్యాన్సర్‌ ముప్పును తగ్గించే.. కొన్ని పండ్లను మనతో షేర్‌ చేసుకున్నారు. వాటిలో పోషకాలు, ఫైబర్‌ సమృద్ధిగా ఉండటమే కాదు, జీర్ణక్రియకు మద్దతు ఇచ్చే, ఇన్ఫ్లమేషన్‌ తగ్గించే, క్యాన్సర్‌ ముప్పును తగ్గించే.. సమ్మేళనాలు ఉంటాయి.

యాపిల్‌..

డాక్టర్ సేథి యాపిల్‌లోని పెక్టిన్ కంటెంట్ గురించి ప్రత్యేకంగా చెప్పారు. ఇది గట్ బ్యాక్టీరియాకు ఆహారంగా పనిచేసే ఒక రకమైన కరిగే ఫైబర్. పెద్దప్రేగులో పులిసినప్పుడు.. పెక్టిన్ బ్యూటిరేట్ వంటి షార్ట్-చైన్ ఫ్యాటీ యాసిడ్‌లను (SCFAలు) ఉత్పత్తి చేస్తుంది, ఇవి పెద్దప్రేగు కణాలను క్యాన్సర్‌గా మారకుండా కాపాడతాయి.

ఫ్రాంటియర్స్‌లో జరిగిన ఒక అధ్యయనం ప్రకారం.. ఆపిల్‌ను రోజూ తింటే.. ఆరోగ్యకరమైన గట్ హెల్త్‌కు మోలు చేస్తుంది, హానికరమైన బ్యాక్టీరియాను తగ్గిస్తుందని, మంచి బ్యాక్టీరియాను పెంచుతుంది. ముఖ్యంగా యాపిల్‌ తొక్కల్లో క్వెర్సెటిన్ ఉంటుంది, ఇది కణాలలో DNA నష్టాన్ని నివారించే.. శక్తివంతమైన యాంటీఆక్సిడెంట్.

కివి..

పేగు ఆరోగ్యానికి మేలు చేసే పండ్లలో కివీ ఒకటి. దీనిలో ఆక్టినిడిన్ ఉంటుంది, ఇది ప్రోటీన్‌ను విచ్ఛిన్నం చేయడానికి సహాయపడే సహజ ఎంజైమ్.

NIH పరిశోధన ప్రకారం కివీ.. ప్రేగు క్రమబద్ధతను ప్రోత్సహిస్తుంది, మలబద్ధకాన్ని తగ్గిస్తుంది. ఇవి పేగు క్యాన్సర్‌ రావడానికి ముఖ్య కారణాలు అని చెప్పొచ్చు. ఈ పండులో యాంటీఆక్సిడెంట్లు, ప్రీబయోటిక్‌ల ప్రత్యేక మిశ్రమం.. పేగు గోడను బలోపేతం చేస్తాయి, ఇన్ఫ్లమేషన్‌ తగ్గిస్తాయి, క్యాన్సర్‌ ముప్పు తగ్గిస్తాయి.

సిట్రస్ పండ్లు..

నారింజ, నిమ్మ, ద్రాక్షపండ్లు లాంటి సిట్రస్‌ పండ్లు.. రిఫ్రెషింగ్‌గా ఉండటమే కాదు.. అవి న్యాచుర్‌ డీటాక్స్‌లా పనిచేస్తాయి. సిట్రస్ పండ్లలో ఫ్లేవనాయిడ్లు, విటమిన్ ‌సి అధికంగా ఉంటుందని డాక్టర్‌ సేథి అన్నారు. ఇవి పేగుల్లో హానికరమైన ఫ్రీ రాడికల్స్‌ను తొలగిస్తాయి. ఈ యాంటీఆక్సిడెంట్లు ఆక్సీకరణ ఒత్తిడిని తగ్గిస్తాయి. ఆక్సీకరణ ఒత్తిడి.. క్యాన్సర్‌కు ముఖ్యకారణం.

NIHలో ప్రచురించిన అధ్యయనం ప్రకారం.. సిట్రస్‌ పండ్లలోని హెస్పెరిడిన్, నరింగెనిన్ వంటి సమ్మేళనాలు పెద్దప్రేగులో క్యాన్సర్ కణాల పెరుగుదలను నిరోధిస్తాయి. దానికి మించి, సిట్రస్ పండ్లలోని కరిగే ఫైబర్ గట్ బాక్టీరియాను పోషిస్తుంది, సమతుల్య మైక్రోబయోమ్‌ను నిర్వహించడానికి సహాయపడుతుంది.

పుచ్చకాయ..

పేగు ఆరోగ్యానికి ఫైబర్‌ మాత్రమే కాదు.. హైడ్రేషన్‌ కూడా చాలా ముఖ్యమని డాక్టర్‌ సేథి అన్నారు. వాటర్‌ కంటెంట్‌ సమృద్ధిగా ఉండే.. పుచ్చకాయలు పెద్దపేగును హైడ్రేట్‌గా ఉంచుతాయి. జీర్ణక్రియను సజావుగా సాగేలా చేస్తుంది. పుచ్చకాయలో లైకోపీన్ ఉంటుంది, ఇది శక్తివంతమైన యాంటీఆక్సిడెంట్. లైకోపీన్‌లో క్యాన్సర్ నిరోధక లక్షణాలు ఉన్నాయని ఓ అధ్యయనం తెలిపింది. NIH పరిశోధన లైకోపీన్ తీసుకోవడం వల్ల పెద్దప్రేగు క్యాన్సర్‌తో సహా కొన్ని క్యాన్సర్‌ల ముప్పు తగ్గుతుందని తెలిపింది.

గమనిక:ఇది సోషల్ సమాచారం మాత్రమే. కొన్ని అధ్యయనాలు, సంబంధిత నిపుణుల ప్రకారం ఈ వివరాలు అందించాం. వ్యక్తుల ఆరోగ్యాన్ని బట్టి ఫలితాలుంటాయి. వీటిని పాటించేముందు.. సంబంధిత నిపుణుడిని సంప్రదించడం శ్రేయస్కరం. అలాగే, హెల్తీ లైఫ్ స్టైల్, సరైన ఆహారం కూడా తీసుకోవడం మీ ఆరోగ్యానికి ఎంతో మేలు.