ఈ మారుతీ కార్లు ఉన్నాయా.. ఆ లోపంతో 39 వేలకుపైగా కార్ల రికాల్

దిగ్గజ కార్ల తయారీ సంస్థ.. మారుతీ సుజుకీ సంచలన ప్రకటన చేసింది. తన సుమారు 39,506 గ్రాండ్ విటారా మోడళ్లను రికాల్ చేస్తున్నట్లు వెల్లడించింది. ఇక్కడ కొన్ని లోపాలు ఉన్నట్లు అనుమానించిన కంపెనీ వాటిని వెనక్కి పిలిపిస్తోంది. ప్రధానంగా ఫ్యూయెల్ లెవల్ ఇండికేటర్, వార్నింగ్ లైట్‌లో లోపం కారణంగానే రికాల్ ప్రకటన చేసినట్లు తెలిపింది. ఈ మేరకు కంపెనీ తన రెగ్యులేటరీ ఫైలింగ్‌లో వెల్లడించింది. ఇవి 2024 డిసెంబర్ 9 నుంచి 2025 ఏప్రిల్ 29 మధ్య తయారైన మోడళ్లుగా పేర్కొంది. ఈ మ్యాచ్ మారుతీ గ్రాండ్ విటారా మోడళ్లలోని కొన్ని వాహనాల్లో స్పీడో మీటర్ అసెంబ్లీలో .. ఫ్యూయెల్ లెవెల్ ఇండికేటర్, వార్నింగ్ లైట్స్ సరిగా పనిచేయట్లేదని గుర్తించినట్లు తెలిపింది కంపెనీ.

ఈ లోపాలతో ఫ్యూయెల్ స్టేటస్ సరిగా చూయించట్లేదని.. వినియోగదారుల నుంచి తమ దృష్టికి ఈ సమస్య వచ్చినట్లు మారుతీ సుజుకీ తెలిపింది. ఈ లోపం ఉన్న మిడ్ SUV గ్రాండ్ విటారా కార్ల యజమానులకు వ్యక్తిగతంగానే మారుతీ సుజుకీ నుంచి సమాచారం అందుతుందని స్పష్టం చేసింది. ఈ ప్రక్రియలో భాగంగా.. కార్లను తనిఖీ చేసి సమస్య ఉన్న లేదా పాడైన పార్టును ఉచితంగానే రీప్లేస్ చేయనున్నట్లు తెలిపింది.

ఇక్కడ ఫ్యూయెల్ స్టేటస్ అస్పష్టంగా చూయిస్తుండటం వల్ల అప్పుడు వాహనదారులు .. తమ కారులో ఇంధనం అయిపోయే ప్రమాదాన్ని సరిగ్గా అంచనా వేయలేక ఇబ్బందులు ఎదుర్కోవచ్చని కంపెనీ భావించింది. ఈ క్రమంలోనే కస్టమర్ల భద్రత, వాహనం విశ్వసనీయత కోసం కంపెనీ ముందస్తుగా రికాల్ చేపట్టింది. ఇక్కడ అధీకృత డీలర్ వర్క్ షాప్స్ ద్వారా ఉచితంగానే పాడైపోయిన పార్టుల్ని రీప్లేస్ చేస్తారు. అందుకే.. కంపెనీ నుంచి సమాచారం అందిన వెంటనే.. కార్ల యజమానులు వేగంగా స్పందించి.. తనిఖీ చేయించుకోవాల్సి ఉంటుంది.

గ్రాండ్ విటారా విషయానికి వస్తే.. 32 నెలల వ్యవధిలోనే రికార్డు స్థాయిలో 3 లక్షలకుపైగా యూనిట్లను విక్రయించింది. స్ట్రాంగ్ హైబ్రిడ్ వేరియంట్ల విషయానికి వస్తే.. వార్షిక ప్రాతిపదికన 2024-25లో 43 శాతం వృద్ధిని కనబరిచింది. ఇక మారుతీ సుజుకీ అక్టోబర్ నెల మొత్తం విక్రయాల్ని పరిశీలిస్తే.. ఏకంగా 2.20 లక్షల వాహనాల్ని విక్రయించింది. ప్రధానంగా చిన్న కార్లపై జీఎస్టీ 28 శాతం నుంచి 18 శాతానికి తగ్గడం, దీపావళి పండగ నేపథ్యంలో డిస్కౌంట్లు వంటి వాటి కారణంగా సేల్స్ పెరిగాయి. మారుతీ సుజుకీ గతంలో 2024లో ఇలాగే 16 వేల యూనిట్ల వరకు వ్యాగన్ ఆర్, బాలెనో మోడళ్లను రికాల్ చేసింది. అప్పుడు ఇంధన పంప్ మోటార్ లోపం కారణంగా వెనక్కి పిలిపించింది. వాహన భద్రతను నిర్ధరించేందుకు.. వాహన పరిశ్రమలో ఇది సాధారణంగానే జరిగే ప్రక్రియగా చెప్పొచ్చు.