గుప్పెడు గింజలు రోజూ తింటే మహిళల ఆరోగ్యానికి ఏ ఢోకా ఉండదు

మహిళలు ఆరోగ్యంగా ఉంటేనే కుటుంబం, సమాజం కూడా ఆరోగ్యంగా ఉంటుంది. అయితే, ఉరుకుల పరుగుల లైఫ్‌స్టైల్‌, అటు ఉద్యోగం, ఇంటి బాధ్యత చూసుకోవడంలో వారి ఆరోగ్యాన్ని చాలామంది మహిళలు నిర్లక్ష్యం చేస్తూ ఉంటారు. దీంతో హార్మోన్ల సమస్యలు, ఎముకల్లో బలం తగ్గడం, నడుము నొప్పి, నిద్రలేమి వంటి సమస్యలను ఎదుర్కొంటున్నారు. ఇవాళ వేగవంతమైన జీవితంలో మహిళలు వారి ఆరోగ్యాన్ని సింపుల్‌గా, చిన్న చిన్న మార్పులతో రక్షించుకోవడానికి గుమ్మడి గింజలు అద్భుతంగా పనిచేస్తాయి. ఇవి చూడటానికి చిన్నగా ఉన్నా మహిళల ఆరోగ్యంపై చూపే ప్రభావం మాత్రం అమితంగా ఉంటుంది. మహిళలు రోజూ గుప్పెడు గుమ్మడి గింజలు తీసుకుంటే.. అద్భుతమైన ఆరోగ్య ప్రయోజనాలు ఉంటాయని నిపుణులు అంటున్నారు. అవేంటో ఈ స్టోరీలో చూసేద్దాం.

పోషకాల పవర్‌ హౌస్

​గుమ్మడికాయ గింజలు పోషకాల స్టోర్‌ హౌస్‌ అని చెప్పొచ్చు. ముఖ్యంగా మహిళలకు అవసరమైన పోషకాలు దీనిలో అధికంగా ఉంటాయి. ఈ చిన్ని గుమ్మడి గింజల్లో మెగ్నీషియం, జింక్, ఐరన్‌, మొక్కల ఆధారిత ప్రోటిన్‌ మెండుగా ఉంటాయి. మెగ్నీషియం శరీరంలోని 600 కిపైగా జీవరసాయన ప్రతిచర్యలలో కీలక పాత్ర పోషిస్తుంది. ఇది మానసిక స్థతి, కండరాల పనితీరును మెరుగుపరుస్తుంది. ఎముకల ఆరోగ్యాన్ని రక్షిస్తుంది.

అదే సమయంలో, జింక్‌ రోగనిరోధక శక్తిని మెరుగుపరుస్తుంది. చర్మ ఆరోగ్యానికి, హోర్మోన్ల సమతుల్యకు మద్దతు ఇస్తుంది. ప్రెగ్నెన్సీ సమయంలో చాలామంది మహిళలు ఐరన్‌ లోపం కారణంగా ఇబ్బంది పడుతూ ఉంటారు. గుమ్మడి గింజల్లోని ఐరన్‌తో పాటు ఇతర ఖనిజాలు.. వారిలోని పోషక లోపాన్ని తీరుస్తాయి. ఈ పోషకాలు మహిళలలోని హార్మోన్లను సమతుల్యంగా ఉంచుతాయి.

 పునరుత్పత్తి వ్యవస్థను ఆరోగ్యంగా ఉంచుతాయ్

ఈ మధ్య కాలంలో మహిళల్లో హార్మోన్ల అసమతుల్యత సమస్య పెరిగిపోయింది. దీని కారణంగా నెలసరి సమస్యలు, సంతానలేమి, మెనోపాజ్‌ సమయంలో సమస్యలతో ఇబ్బంది పడుతున్నారు. గుమ్మడి గింజలు హార్మోన్లను సమతుల్యంగా ఉంచి.. మహిళల ఆరోగ్యానికి ఎంతో మేలు చేస్తాయి. గుమ్మడి గింజల్లోని ఫైటోఈస్ట్రోజెన్‌, లిగ్నన్‌ వంటి సమ్మేళనాలు హార్మోన్ల కార్యకలాపాలను సున్నితంగా మాడ్యులేట్ చేస్తాయి. అంతేకాకుండా, గుమ్మడి గింజల్లోని జింక్‌ కంటెంట్ ప్రొజెస్టెరాన్, ఈస్ట్రోజెన్ ఉత్పత్తికి కీలక పాత్ర పోషిస్తాయి.

గుండె ఆరోగ్యానికి మంచిది

గుమ్మడి గింజల్లో పాల, మోనోశాచురేటెడ్‌ వంటి మంచి కొవ్వులు ఉంటాయి. ఇవి కొలెస్ట్రాల్‌ ప్రొఫైల్‌ను మెరుగుపరచి, గుండె ఆరోగ్యానికి మేలు చేస్తాయి. వీటిలో అధికంగా ఉండే మెగ్నీషియం, ఫైబర్‌ కంటెంట్‌ బీపీని కంట్రోల్‌లో ఉంచుతాయి. డైట్‌లో గుమ్మడి గింజలను చేర్చుకుంటే, గ్లూకోజ్‌ స్పైక్‌లను తగ్గిస్తుందని అధ్యయనాలు చెబుతున్నాయి. ఇది టైప్‌ 2 డయాబెటిస్‌ను కంట్రోల్‌లో ఉంచడానికి సహాయపడుతుంది.

ఎముకలను ఆరోగ్యంగా ఉంచుతాయి

నెలసరి ఆగిపోయిన తర్వాత, మహిళల్లో ఎముకల సాంద్రత తగ్గుతుంది, ఆస్ట్రియోపోరోసిస్‌ సమస్య ఎక్కువగా కనిపిస్తుంది. గుమ్మడిగింజల్లోని మెగ్నీషియం, ఫాస్పరస్ ఎముకల ఆరోగ్యానికి మేలు చేస్తాయి. మెనోపాజ్‌ ముగిసిన తర్వాత మహిళలు మెగ్నీషియం అధికంగా తీసుకుంటే ఎముకల సాంద్రత మెరుగుపడుతుందని ఓ అధ్యయనం తెలిపింది.

మంచి నిద్రను ఇస్తాయి

ఒత్తిడి, హార్మోన్ల తగ్గుదల మహిళల్లో నిద్ర, మానసిక స్థితి, శక్తిని దెబ్బతీస్తాయి. గుమ్మడి గింజల్లో ట్రిప్టోఫాన్‌ ఉంటుంది. ఇది సెరోటోనిన్, మెలటోనిన్‌లకు పూర్వగామి. ఇది మానసిక స్థితిని మెరుగుపరుస్తుంది, ప్రశాంతమైన నిద్రను ఇస్తుంది. గుమ్మడి గింజల్లోని జింక్‌, మెగ్నీషియం నాడీ వ్యవస్థను ఆరోగ్యంగా ఉంచుతాయి.