ఏఐతో నకిలీ ఆధార్, పాన్ కార్డులు.. ఫేక్, ఒరిజినల్ అస్సలు గుర్తించలేరు

ప్రస్తుత టెక్నాలజీ యుగంలో ఆర్టిఫిషియల్ ఇంటెలిజెన్స్ (ఏఐ) ఎంతటి విప్లవాన్ని సృష్టిస్తుందో మనం చూస్తూనే ఉన్నాం. ఇక ప్రస్తుతం అందుబాటులో ఉన్న ఏఐ టూల్స్‌ను ఉపయోగించి.. అనేక రకాల పనులను సులువుగా చేస్తూ ఉన్నాం. అయితే ఇప్పుడు ఇవే ఏఐ టూల్స్.. మానవులకు అతిపెద్ద ముప్పును తెచ్చే అవకాశాలు ఉన్నాయంటూ.. టెక్ నిపుణులు ఎప్పటినుంచో హెచ్చరికలు చేస్తున్న సంగతి తెలిసిందే. అయితే తాజాగా ఓ టెక్ ఎక్స్‌పర్ట్ చేసిన పని.. అందర్నీ తీవ్ర కలవరపాటుకు గురి చేస్తోంది. ఏఐ టూల్‌ను ఉపయోగించి.. ఆ టెకీ తయారు చేసిన ఫేక్ ఆధార్, పాన్ కార్డులు.. ఇప్పుడు అందరి గుండెల్లో రైళ్లు పరిగెత్తేలా చేస్తున్నాయి. దీంతో ఏఐ దుర్వినియోగంపై తీవ్ర చర్చ జరుగుతోంది.

బెంగళూరుకు చెందిన టెక్ నిపుణుడు హర్వీన్ సింగ్ చాధా.. గూగుల్ అధునాతన ఇమేజ్ జనరేషన్ టూల్ అయిన నానో బనానా ఫీచర్‌ను ఉపయోగించి అచ్చం ఒరిజినల్‌గా కనిపించే నకిలీ ఆధార్ కార్డు, పాన్ కార్డులను సృష్టించి.. అందర్నీ తీవ్ర ఆందోళనకు గురి చేశారు. నానో బనానా ఏఐ టూల్ చాలా అద్భుతమైందని.. కానీ అదే ఇప్పుడు అతి పెద్ద సమస్య అని హర్వీన్ సింగ్ చాధా పేర్కొన్నారు. ఇది చాలా కచ్చితత్వంతో ఫేక్ ఐడీ కార్డులను సృష్టించగలదని తెలిపారు. పాత ఇమేజ్ వెరిఫికేషన్ సిస్టమ్స్.. ఈ ఫేక్ కార్డులను అస్సలు గుర్తించలేవని హర్వీన్ సింగ్ చాధా సోషల్ మీడియా ప్లాట్‌ఫారమ్ ఎక్స్‌లో వెల్లడించారు. దీనికి ఉదాహరణగా ఆయన ట్విట్టర్‌ప్రీత్ సింగ్ అనే పేరుతో నకిలీ ఆధార్, పాన్ కార్డులను తయారు చేసి షేర్ చేశారు.

అధునాతన జనరేటివ్ ఏఐ టూల్స్‌ను ఉపయోగించి ఫేక్ సర్టిఫికెట్లను ఎలా ఈజీగా తయారు చేయవచ్చు అనే ఆందోళనను హర్వీన్ సింగ్ చాధా ప్రదర్శన స్పష్టం చేసింది. ఇది మన దేశంలో డిజిటల్ వెరిఫికేషన్ సిస్టమ్‌లకు, కంట్రోల్ సిస్టమ్‌లకు తీవ్రమైన ముప్పును సూచిస్తుంది.

ఇక ఈ వార్త ఇప్పుడు సోషల్ మీడియాలో తెగ చర్చనీయాంశంగా మారింది. దీంతో నెటిజన్లు.. రకరకాల కామెంట్లు చేస్తున్నారు. ఏఐతో రూపొందించిన చిత్రాలకు SynthID అనే కనిపించని డిజిటల్ వాటర్‌మార్క్‌లు ఉంటాయని.. వీటిని గూగుల్ జెమిని యాప్ ద్వారా గుర్తించవచ్చని ఒక యూజర్ పేర్కొన్నారు. అయితే దీనికి స్పందించిన హర్వీన్ సింగ్ చాధా.. ఎయిర్‌పోర్ట్ లేదా హోటల్‌లో ఆధార్ కార్డు చూపించినప్పుడు.. వారు నిజంగా ప్రతీ కార్డును స్కాన్ చేస్తారా అని ప్రశ్నించారు. ఇలాంటి వెరిఫికేషన్ ఆచరణలో ఎంతవరకు పని చేస్తాయనే సందేహాన్ని ఆయన లేవనెత్తారు.

ఒకరి గుర్తింపును నిజంగా ధృవీకరించాలి అంటే.. వారు ఇచ్చిన సమాచారాన్ని అధికారికంగా సరిచూసుకోవాలి తప్ప.. కేవలం వారు ఇచ్చిన ఐడీ కార్డు పైన ఉన్న పేరు, అడ్రస్, నంబర్ల ఆధారంగా చెక్ చేయవద్దని మరో యూజర్ స్పష్టం చేశారు. హర్వీన్ సింగ్ చాధా చేసిన ఈ పోస్ట్.. భారత్‌లో మెరుగైన సెక్యూరిటీ ఏర్పాట్లు, అత్యాధునిక వెరిఫికేషన్ టెక్నాలజీ, బాధ్యతాయుతమైన ఏఐ వినియోగానికి సంబంధించిన తక్షణ అవసరం అని.. ఆన్‌లైన్‌లో విస్తృతంగా చర్చ జరుగుతోంది.