హెచ్‌డీఎఫ్‌సీ బ్యాంకులో నిబంధనల ఉల్లంఘన.. షాకిచ్చిన రిజర్వ్ బ్యాంక్ ఆఫ్ ఇండియా

నిబంధనలు ఉల్లంఘిస్తున్న బ్యాంకులపై రిజర్వ్ బ్యాంక్ ఆఫ్ ఇండియా కొరడా ఝులిపిస్తోంది. ఈసారి ఏకంగా దిగ్గజ బ్యాంకుకు భారీగా పెనాల్టీ వేసింది. ప్రైవేట్ రంగంలోని అతిపెద్ద బ్యాంకు అయిన హెచ్‌డీఎఫ్‌సీ బ్యాంక్ లిమిటెడ్‌కు ఏకంగా రూ.91 లక్షల పెనాల్టీ వేసినట్లు శుక్రవారం ఓ ప్రకటనలో తెలిపింది. బ్యాంకింగ్ రెగ్యులేషన్ యాక్ట్ 1949 నిబంధనల ఉల్లంఘన, అడ్వాన్సులపై వడ్డీ రేట్లు, ఔట్‌సోర్సింగ్ ఫైనాన్షియల్ సర్వీసెస్ విషయంలో ఆర్‌బీఐ మార్గదర్శకాలను విస్మరించడంతో పాటు నో యువర్ కస్టమర్ (KYC) నిబంధనలను ఉల్లంఘించినట్లు గుర్తించిన క్రమంలో ఈ మేరకు పెనాల్టీ వేయాల్సి వచ్చిందని తెలిపింది.

ఒకే లోన్ కేటగిరీకి ఈ బ్యాంకు బహుళ బెంచ్ మార్క్ ఉపయోగించి వడ్డీ రేట్లను నిర్ణయిస్తోన్న కారణంగానే పెనాల్టీ వేసినట్లు ఆర్‌బీఐ తెలిపింది. అలాగే అనుమతులు లేని వ్యాపారం నిర్వహించేందుకు తమ భాగస్వామ్య సంస్థను అనుమతించినట్లు పేర్కొంది. అలాగే కేవైసీ నిబంధనలు పాటించడంలోనూ విఫలమైనట్లు ఆర్‌బీఐ పేర్కొంది. ఈ మేరకు బ్యాంకింగ్ రెగ్యులేషన్ యాక్ట్ 1949లోని సెక్షన్ 46 (4)(i), సెక్షన్ 47A (1)(C) కింద ఈ మేరకు పెనాల్టీ వేసినట్లు నవంబర్ 18, 2025 రోజున ఉత్తర్వులు జారీ చేసింది. 2024, మార్చి 31వ తేదీన బ్యాంకులో తనిఖీలు నిర్వహించిన క్రమంలో ఆయా రూల్స్ అతిక్రమించినట్లు గుర్తించామని, ఈ మేరకు తమ స్పందన తెలియజేయాలని హెచ్‌డీఎఫ్‌సీ బ్యాంకుకు అప్పుడే షోకాజ్ నోటీసులు పంపినట్లు తెలిపింది. అయితే బ్యాంకు స్పందన సంతృప్తికరంగా లేకపోవడంతోనే పెనాల్టీలు వేయాల్సి వచ్చినట్లు తెలిపింది.

బ్యాంకులో రూల్స్ ఉల్లంఘన జరిగి భారీగా పెనాల్టీ వేసిందన్న వార్తలతో ఖాతాదారులు ఆందోళన చెందే అవకాశం ఉంది. ఈ క్రమంలో రిజర్వ్ బ్యాంక్ క్లారిటీ ఇచ్చింది. నిబంధనలు, మార్గదర్శకాలు పాటించే అంశంపైనే పెనాల్టీలు వేయడం జరిగిందని, కస్టమర్ల ట్రాన్సాక్షన్లపై ఎలాంటి ప్రభావం ఉండదని స్పష్టం చేసింది. ఎలాంటి ట్రాన్సాక్షన్‌పై ప్రభావం చూపదని, బ్యాంక్ ట్రాన్సాక్షన్లు యదావిధిగా కొనసాగుతాయని పేర్కొంది. ఖాతాదారులు ఎలాంటి ఆందోళన చెందాల్సిన అవసరం లేదని భరోసా ఇచ్చింది.