62 ఏళ్ల వయసులో ప్రేయసిని పెళ్లాడిని ఆస్ట్రేలియా ప్రధాని

ఆస్ట్రేలియా ప్రధాన మంత్రి ఆంథోనీ అల్బనీస్ తన 62 ఏళ్ల వయసులో పెళ్లి చేసుకున్నారు. ముఖ్యంగా తన ప్రేయసి జోడీ హేడన్‌ను శనివారం రోజు వివాహమాడారు. ప్రధాన మంత్రి పదవిలో ఉండగా... పెళ్లి చేసుకున్న ఆస్ట్రేలియా తొలి నేతగా ఆయన చరిత్ర సృష్టించారు. కాన్‌బెర్రాలోని తన అధికారిక నివాసం 'ది లాడ్జ్' గార్డెన్‌లో వీరి వివాహం ప్రైవేట్‌గా జరిగింది. అయితే ఫైనాన్షియల్ సర్వీసెస్ ఉద్యోగి అయిన హేడన్.. తెల్లటి గౌనులో మెరిసిపోగా, అల్బనీస్ బో-టై ధరించి కనిపించారు. కాగితాల వర్షం కురుస్తుండగా.. నవ్వుతూ నూతన వధూవరులు ఒకరి చేయి ఒకరు పట్టుకొని ఉన్న వీడియోను ప్రధాని సోషల్ మీడియాలో పోస్ట్ చేశారు.

ప్రత్యేక ఆకర్షణగా నిలిచిన అల్బనీస్ పెంపుడు కుక్క

అయితే వివాహ వేడుకలో అల్బనీస్ పెంపుడు కుక్క టోటో ప్రత్యేక ఆకర్షణగా నిలిచింది. టోటో రింగ్ బేరర్‌గా వ్యవహరించింది. తన దంపతులు తమ వివాహానికి సొంతంగా ప్రమాణాలు చేసుకున్నారు. స్టీవీ వండర్ పాడిన "Signed, Sealed, Delivered (I'm Yours)" పాట సంగీతం వస్తుండగా.. వీరు అతిథుల ముందుకు నడుచుకుంటూ వచ్చారు. అనంతరం మీడియాతో మాట్లాడుతూ.. "మా ప్రేమను, మేము కలిసి భవిష్యత్తులో గడపబోయే ప్రయాణాన్ని మా కుటుంబం, సన్నిహితుల ముందు పంచుకున్నందుకు మేము చాలా సంతోషిస్తున్నాం" అని దంపతులు తెలిపారు.

మొదటి భార్యకు 2019లో విడాకులు..

అల్బనీస్ తన మొదటి భార్య నుంచి 2019లో విడాకులు తీసుకున్నారు. వారికి నాథన్ అనే కుమారుడు కూడా ఉండగా.. ఇద్దరి మధ్య భేదాభిప్రాయాలు రాగా విడాకులు తీసుకుని విడిపోయారు. అయితే ఐదేళ్ల క్రితం మెల్‌బోర్న్ వ్యాపార విందులో హేడన్‌ను కలుసుకున్న ఈయన... 2024 వాలెంటైన్స్ డే నాడు హేడన్‌కు ప్రపోజ్ చేశారు. ఈ విషయాన్ని అధికారింకగా ధ్రువీకరిస్తూ.. "నా జీవితాంతం కలిసి ఉండాలనుకున్న భాగస్వామి దొరికింది" అంటూ అప్పట్లో చెప్పారు.

ప్రధాని మోదీ శుభాకాంక్షలు..

భారతదేశ ప్రధాన మంత్రి నరేంద్ర మోదీ కూడా తన స్నేహితుడు ఆంథోనీ అల్బనీస్‌కు, జోడీ హేడన్‌కు ఎక్స్ వేదికగా శుభాకాంక్షలు తెలిపారు. తాజాగా ఎన్నికల్లో విజయం సాధించి రెండో సారి మూడు సంవత్సరాల పదవీ కాలం దక్కించుకున్న లేబర్ పార్టీ నాయకుడు ఆంథోనీ అల్బనీస్.. 62 ఏళ్ల వయసులో వివాహం చేసుకోవడంతో అంతర్జాతీయంగా అందరి దృష్టిని ఆకర్షఇంచారు. ముఖ్యంగా ఆయన సోమవారం నుంచి ఐదు రోజుల పాటు ఆస్ట్రేలియాలోనే హనీమూన్‌కు వెళ్లనున్నారు.