'నా భాగస్వామికి భారతీయ మూలాలున్నాయి, కొడుకు పేరు శేఖర్': ఎలాన్ మస్క్

ప్రపంచ కుబేరుడు, టెస్లా అధినేత ఎలాన్ మస్క్ తొలిసారిగా తన వ్యక్తిగత జీవితానికి సంబంధించిన ఆసక్తికర వివరాలను బహిర్గతం చేశారు. తన జీవిత భాగస్వామి శివోన్‌ జిలిస్‌కు భారతీయ మూలాలు ఉన్నాయని.. తమ కుమారుల్లో ఒకరికి నోబెల్ గ్రహీత సుబ్రమణ్యన్ చంద్రశేఖర్ పేరులో నుంచి 'శేఖర్' అనే పదం కలిసొచ్చేలా పేరు పెట్టామని తెలిపారు. జెరోధా సహ వ్యవస్థాపకుడు నిఖిల్ కామత్ నిర్వహించిన ఒక 'పాడ్‌కాస్ట్‌'లో పాల్గొన్న సందర్భంగా మస్క్ ఈ వివరాలను వెల్లడించారు.

కుమారుడికి 'శేఖర్' పేరు

"నాకూ శివోన్ జిలిస్‌కు పుట్టిన కుమారుల్లో ఒకరికి శేఖర్ అనే పదం కలిసొచ్చేలా పేరు పెట్టాం. భారతీయ మూలాలు ఉన్న అమెరికన్ భౌతిక శాస్త్రవేత్త, నోబెల్ గ్రహీత సుబ్రమణ్యన్ చంద్రశేఖర్ పేరులో నుంచి శేఖర్‌ను తీసుకున్నాం" అని మస్క్ తెలిపారు. అలాగే మస్క్ సహచరిణి శివోన్ జిలిస్ సగం భారతీయురాలు అని నేరుగా మస్క్‌యే వెల్లడించారు. ఆమె తల్లి పంజాబీ మూలాలు కలిగిన మహిళ అని స్పష్టం చేశారు. అయితే శిశువుగా ఉన్నప్పుడే శివోన్‌ను వేరే కుటుంబం దత్తత తీసుకుందని ఎలాన్ మస్క్ గుర్తు చేశారు. దీంతో ఆమె కెనడాలో పెరిగారని.. ఆమె పూర్వీకులు భారతీయులు అయినప్పటికీ.. దత్తత వల్ల ఆమె ఇండియన్-అమెరికన్‌గా ఎదిగారన్నారు.

అసలెవరీ శివోన్‌ జిలిస్?

శివోన్ జిలిస్ ప్రస్తుతం మస్క్‌కు చెందిన ఆర్టిఫిషియల్ ఇంటెలిజెన్స్ (AI) కంపెనీ న్యూరాలింక్‌లో ఆపరేషన్స్, స్పెషల్ ప్రాజెక్ట్స్ డైరెక్టర్‌గా పనిచేస్తున్నారు. అయితే ఆమె యాల్ విశ్వవిద్యాలయం నుంచి ఎకనామిక్స్, ఫిలాసఫీలో బ్యాచిలర్ ఆఫ్ ఆర్ట్స్ పట్టా పొందారు. విద్యార్థిగా ఉన్నప్పుడు ఆమె ఐస్ హాకీ జట్టులో సభ్యురాలిగా కూడా ఉన్నారు. అనంతరం ఐబీఎం, బ్లూమ్‌బర్గ్‌లో పనిచేశారు. 2016లో జిలిస్ ఓపెన్‌ఏఐలో చేరారు. ఆ తర్వాత 2017లో న్యూరాలింక్‌లో చేరారు. ఇదిలా ఉండగా.. జిలిస్-మస్క్ దంపతులకు మొత్తం నలుగురు పిల్లలు. 2014 ఫిబ్రవరి నెలలోనే కుమార్తె ఆర్కాడియా పుట్టింది. ఆ తర్వాత కుమారుడు సెల్డాన్ లైకుర్గస్ జన్మించాడు. ఇక 2021లో వీరికి కవలలు స్ట్రైడర్, అజూర్ జన్మించారు. వీరిలో ఒక కొడుకు పేరులో శేఖర్‌ను చేర్చారు. ఇదే విషయాన్ని మస్క్ తాజాగా వెల్లడించారు.

ఇదంతా బాగానే ఉండగా.. మస్క్‌కు పలువురు భాగస్వాములతో కూడా మరింత మంది సంతానం ఉన్నారు. మొత్తంగా ఆయనకు 15 మంది పిల్లలు ఉన్నారని గతంలో అనేక వార్తలు వచ్చాయి. ముఖ్యంగా మస్క్ అతని మొదటి భార్య జస్టిన్ విల్సన్‌తో ఐదుగురు పిల్లలు కనగా.. గాయని గ్రిమ్స్‌తో ముగ్గురు పిల్లలకు జన్మనిచ్చాడు. న్యూరాలింక్ ఎగ్జిక్యూటివ్ శివోన్ జిలిస్‌తో నలుగురు సంతానం కల్గగా.. సెయింట్ క్లైర్‌తో ఒకరికి జన్మను ఇచ్చినట్లు తెలుస్తోంది. అయితే మరో ఇద్దరి పిల్లలకు సంబంధించిన వివరాలు తెలియకపోయినప్పటికీ.. మొత్తంగా మస్క్‌కు 15 మంది పిల్లలు ఉన్నట్లు సమాచారం.