సీఐ భార్యను.. నన్నే డబ్బులు అడుగుతారా..రూ.లక్షల్లో టోకరా

ఆమె భర్త పోలీసుశాఖలో గౌరవప్రదమైన స్థానంలో ఉన్నాడు. మోసగాళ్లు, కేటుగాళ్ల నుంచి జనాలను కాపాడాల్సిన బాధ్యత ఆయన మీద ఉంది. ఆయన భార్య కుదిరితే జనాలకు మంచి చేయాలి. లేదంటే తన పని తాను చేసుకోవాలి. అంతే తప్ప.. భర్త పోలీసు అధికారి అని చెప్పి ఆ పవర్‌ను ఉపయోగించుకుని జనాలను ముంచ కూడదు. కాదని అలాంటి నేరాలకు పాల్పడితే.. ఇదిగో ఇప్పుడు చెప్పుకోబోయే మహిళకు ఎలాంటి పరిస్థితి కలిగిందే.. అంతకు మించే శిక్ష పడుతుంది.

ఇప్పుడు మనం చెప్పుకొబోయే మహాళ పేరు కవితా రెడ్డి. ఆమె భర్త.. సూర్యాపేట జిల్లా, మునగాల సీఐగా విధులు నిర్వహిస్తున్నారు. భర్త పోలీసు పవర్‌ను అడ్డం పెట్టుకుని.. భార్య జనాలను బురిడి కొట్టించేందుకు రెడీ అయ్యింది. బంగారం, గ్రానైట్ వ్యాపారం.. ఒక్కసారి పెట్టుబడి పెడితే.. లక్షల్లో లాభాలు.. అధిక వడ్డీ అంటూ జనాలను నమ్మించింది. ఆమె సీఐ భార్య కావడంతో.. ఆమె మాటలు నమ్మిన జనాలు.. లక్షల రూపాయలు ఆమెకు సమర్పించుకున్నారు. రోజుల గడుస్తున్నా ఎలాంటి సమాచారం లేకపోవడంతో.. తమ డబ్బులు తమకు ఇవ్వాలని నిలదీశారు.

అందుకు కవితా రెడ్డి వారి మీదనే రివర్స్ అయ్యింది. పైగా సీఐ భార్యను నన్నే డబ్బులు అడుగుతావా.. మీ సంగతి చెబుతాను అంటూ బెదిరింపులకు పాల్పడింది. బాధితులు హయత్‌నగర్ పోలీసులకు ఫిర్యాదు చేయడంతో పోలీసులు నాగోల్‌లో ఆమెను అరెస్ట్ చేసి రిమాండ్‌కు తరలించారు.

కవితా రెడ్డి.. నాగోల్ ఏరియాలో బొటిక్ బిజినెస్ చేస్తూ ఉండేది. సీఐ భార్యగా అక్కడ పరిచయం పెంచుకుంది. ఆ తర్వాత తాను గోల్డ్, గ్రానైట్ బిజినెస్ చేస్తున్నాను.. పెట్టుబడి పెడితే అధిక వడ్డీ చెల్లిస్తానంటూ స్థానికులకు ఆశ చూపింది. ఆమె మాటలు నమ్మి మోసపోయిన వారిలో ముందు స్థానంలో ఉండేది ఓ ఆటో డ్రైవర్. ఇతగాడు ఏకంగా కవితా రెడ్డికి రూ.30 లక్షలు ఇచ్చినట్లు సమాచారం. తన డబ్బులు తిరిగి అడిగినందుకు సదరు ఆటో డ్రైవర్ మీదనే ఉల్టా బెదిరింపులకు దిగింది కవిత. సీఐ భార్యను నన్నే డబ్బులు అడుగుతావా అంటూ బెదిరించింది.

దాంతో, బాధితుడు తన స్నేహితుడితో కలిసి.. కవితా రెడ్డి చేస్తోన్న మోసం గురించి పోలీసులకు తెలిపాడు. అతడి ఫిర్యాదు మేరకు కేసు నమోదు చేసుకున్న పోలీసులురంగంలోకి దిగి నాగోల్‌లో ఉంటున్న కవితారెడ్డిని అరెస్ట్ చేశారు. కవితారెడ్డి బాధితులు చాలామంది ఉన్నట్లు తెలుస్తోంది.

ఇదిలా ఉంటేగత కొంతకాలంగా నాగోల్ లో ఉంటూ స్నేహితురాలితో బొటిక్ బిజినెస్ చేస్తున్న కవితా రెడ్డి.. కస్టమర్లను సైతం మోసం చేసినట్లు గుర్తించారు పోలీసులు. ఇక్కడ మరో ఆసక్తికరమైన అంశం ఏంటంటే.. కవితా రెడ్డి భర్త అయిన సీఐ గత కొంతకాలంగా ఆమెకు దూరంగా ఉంటున్నట్లు తెలుస్తోంది.