విడాకులు తీసుకోనివారు లివ్ ఇన్ రిలేషన్‌‌లో ఉండటం చెల్లదు..అలహాబాద్ హైకోర్టు సంచలన తీర్పు

సహజీవనం , వివాహ బంధానికి సంబంధించిన చట్టపరమైన బాధ్యతలపై అలహాబాద్ హైకోర్టు కీలక తీర్పు వెలువరించింది. విడాకులు లేకుండా సాగే ఇలాంటి లివ్ ఇన్ రిలేషన్‌షిప్‌లను చట్టబద్ధమైనవిగా పరిగణించలేమని.. హైకోర్టు ధర్మాసనం స్పష్టం చేసింది. అందుకే అలా విడాకులు తీసుకోకుండా లివ్ ఇన్ రిలేషన్‌షిప్‌లో ఉన్న వారికి.. పోలీస్ రక్షణ కల్పించలేమని పేర్కొంటూ.. పిటిషన్‌ను తిరస్కరించింది. వివాహం ద్వారా ఏర్పడే సామాజిక, చట్టపరమైన బాధ్యతలను విస్మరించలేమని.. సహజీవనం కూడా చట్ట పరిమితులకు లోబడి ఉండాలని హైకోర్టు తన తీర్పులో స్పష్టం చేసింది.

వ్యక్తిగత స్వేచ్ఛ అనేది మరొకరి చట్టబద్ధమైన హక్కులను కాలరాయకూడదని అలహాబాద్ హైకోర్టు న్యాయమూర్తి వివేక్ కుమార్ సింగ్ ఈ సందర్భంగా తేల్చి చెప్పారు. భార్య లేదా భర్తకు విడాకులు ఇవ్వకుండా.. భర్త లేదా భార్య మరొకరితో సహజీవనం చేస్తూ చట్టపరమైన రక్షణ కోరడం చెల్లుబాటు కాదని సంచలన తీర్పును వెలువరించారు. వివాహ బంధం ద్వారా చట్టబద్ధమైన భాగస్వామికి వచ్చే తోడును కాదని.. లివ్ ఇన్ రిలేషన్లకు రక్షణ కల్పించలేమని ఈ కేసులో కోర్టు స్పష్టం చేసింది.

దినేష్ కుమార్ అనే వ్యక్తికి.. ఇప్పటికే పెళ్లి కాగా.. తన భార్య నుంచి విడాకులు తీసుకోకుండానే.. మరో మహిళతో సహజీవనం సాగిస్తున్నాడు. అయితే తమ లివ్ ఇన్ రిలేషన్‌షిప్‌కు.. తన భార్య, ఆమె కుటుంబ సభ్యుల నుంచి ముప్పు ఉందని పేర్కొంటూ.. తమకు రక్షణ కల్పించాలని దినేష్ కుమార్, అతని సహజీవన భాగస్వామి.. అలహాబాద్ హైకోర్టులో ఒక పిటిషన్ దాఖలు చేసింది. తాము ఇద్దరం ప్రస్తుతం మేజర్లం అని.. ఇష్టపూర్వకంగా కలిసి ఉంటున్నందున తమ వ్యక్తిగత స్వేచ్ఛను గౌరవించాలని వారు కోర్టుకు విజ్ఞప్తి చేశారు. ఇతరుల వ్యతిరేకత కారణంగా తమ భద్రతకు ప్రమాదం ఉందని వారు కోర్టుకు తెలిపారు.

ఈ పిటిషన్‌ను విచారించిన అలహాబాద్ హైకోర్టు జడ్జి వివేక్ కుమార్ సింగ్.. వ్యక్తిగత స్వేచ్ఛ పేరుతో చట్టపరమైన బాధ్యతలను విస్మరించలేమని పేర్కొన్నారు. 18 ఏళ్లు నిండిన ఇద్దరు వ్యక్తులు.. తమకు నచ్చినట్లు జీవించే హక్కును.. వారి తల్లిదండ్రులు కూడా అడ్డుకోలేరని ఈ సందర్భంగా కోర్టు అంగీకరించింది. అయినప్పటికీ ఆ స్వేచ్ఛకు కూడా కొన్ని పరిమితులు ఉంటాయని గుర్తు చేసింది. ఒకరి స్వేచ్ఛ కారణంగా.. మరొకరి హక్కులను కాలరాయలేరని స్పష్టం చేసింది.

ఒక వ్యక్తికి పెళ్లి జరిగినపుడు.. అతని జీవిత భాగస్వామికి.. చట్టబద్ధంగా కొన్ని హక్కులు వస్తాయని ఈ కేసు విచారణ సందర్భంగా అలహాబాద్ హైకోర్టు వ్యాఖ్యానించింది. ముఖ్యంగా జీవిత భాగస్వామి తోడును పొందే హక్కును ఆప్షనల్ ఛాయిస్ పేరుతో విస్మరించలేమని తెలిపింది. విడాకులు తీసుకోకుండా ఇంకో వ్యక్తితో ఉండటం వల్ల.. మొదటి భాగస్వామి హక్కులకు తప్పనిసరిగా భంగం కలుగుతుందని.. ఇలాంటి సంబంధాలకు రక్షణ కల్పిస్తే చట్టబద్ధమైన వివాహ వ్యవస్థను అవమానించినట్లే అవుతుందని హైకోర్టు అభిప్రాయం వ్యక్తం చేసింది.

ఈ తీర్పు ద్వారా ప్రస్తుతం చాలా మంది సహజీవనం చేసే వ్యక్తులు.. తమ పాత వివాహ బంధాలను చట్టబద్ధంగా తెంచుకోవాల్సిన అవసరాన్ని అలహాబాద్ హైకోర్టు గుర్తు చేసింది. కేవలం మేజర్లు అయినంత మాత్రాన చట్టాలను అతిక్రమించే హక్కు ఉండదని ఈ తీర్పు తేల్చి చెప్పింది.