లైవ్ టీవీ డిబేట్‌లో బాబా రామ్‌దేవ్‌ను ఎత్తిపడేసిన ప్యానెలిస్ట్

సాధారణంగా రాజకీయాలకు సంబంధించి.. అన్ని టీవీ ఛానెళ్లలో డిబేట్లు జరుగుతూ ఉంటాయి. ఇలాంటి డిబేట్లలో కొన్నిసార్లు అందులో పాల్గొన్న వారు.. దారుణంగా అరవడం, తిట్టుకోవడం.. చివరికి కొట్టుకున్న సంఘటనలు కూడా ఉన్నాయి. పెద్ద పెద్ద నేతలు కూడా కొన్నిసార్లు ఇలాంటి వాటిలో కనిపిస్తూ ఉంటారు. అయితే తాజాగా జరిగిన ఓ డిబేట్‌లో యోగా గురువు బాబా రామ్‌దేవ్‌కు ఊహించని సంఘటన ఎదురైంది. ఓ నేషనల్ టీవీ ఛానెల్ లైవ్ డిబేట్‌లో పాల్గొన్న బాబా రామ్‌దేవ్‌ను.. ఓ ప్యానెలిస్ట్ ఎత్తి పడేయడం.. దానికి సంబంధించిన వీడియో సోషల్ మీడియాలో తెగ వైరల్ కావడం ఇప్పుడు తీవ్ర చర్చనీయాంశంగా మారింది.

అమర్ ఉజాలా టీవీ ఛానల్ లైవ్ డిబేట్‌లో నిర్వహించిన ఒక ప్రత్యక్ష చర్చా కార్యక్రమంలో యోగా గురువు బాబా రామ్‌దేవ్, ఒక ప్యానెలిస్ట్ మధ్య జరిగిన ఘర్షణ సోషల్ మీడియాలో సంచలనంగా మారింది. చర్చ మధ్యలో తన బలాన్ని నిరూపించుకోవడానికి ఒక రెజ్లింగ్ ఎత్తుగడను ప్రదర్శించబోయిన రామ్‌దేవ్ బాబా .. ప్రత్యర్థి చేతిలో అనూహ్యంగా దెబ్బతిన్నారు. రామ్‌దేవ్‌ను అమాంతం గాలిలోకి ఎత్తిన ప్యానెలిస్ట్.. స్టూడియో నేలకేసి కొట్టడం చూసి నెటిజన్లు షాక్ అవుతున్నారు. దీనిపై సోషల్ మీడియాలో మీమ్స్ వైరల్ అవుతున్నాయి.

లైవ్ డిబేట్‌లో భాగంగా ఒక విషయంపై వాదన జరుగుతుండగా.. బాబా రామ్‌దేవ్ తన శక్తిని చూపించేందుకు ప్రయత్నించారు. కాషాయ వస్త్రాల్లో ఉన్న రామ్‌దేవ్ బాబా.. తన ఎదురుగా ఉన్న ప్యానెలిస్ట్‌ను పట్టుకోబోగా.. ఆ ప్యానెలిస్ట్ అంతే వేగంతో స్పందించి రామ్‌దేవ్‌ను గాలిలోకి ఎత్తి నేలకేసి కొట్టారు. ఈ అనూహ్య సంఘటనతో ఆ లైవ్ స్టూడియోలో కొద్దిసేపు అంతా సైలెంట్ అయింది. అయితే.. జరిగిన ఘటనపై స్పందించిన రామ్‌దేవ్ బాబా.. అదంతా కేవలం సరదా కోసం చేసిన పని మాత్రమేనని.. సీరియస్‌గా తీసుకోవద్దని చెప్పుకొచ్చారు.

ఈ వీడియో వైరల్ కావడంతో నెటిజన్లు రకరకాలుగా స్పందిస్తున్నారు. రామ్‌దేవ్ బాబా వేసిన ఎత్తుగడ ఆయనకే రివర్స్ అయిందంటూ నెటిజన్లు సోషల్ మీడియాలో సెటైర్లు వేస్తున్నారు. మజా వచ్చేసింది అంటూ నవ్వుతున్న ఎమోజీలతో కామెంట్లు పెడుతున్నారు. పతంజలి నెయ్యి తింటే ఇలాగే కింద పడతారు అని కొందరు నెటిజన్లు విమర్శలు చేస్తున్నారు. రామ్‌దేవ్‌ను స్కామ్‌దేవ్ అని పిలుస్తూ మరికొందరు నెటిజన్లు ఎద్దేవా చేస్తున్నారు. ఇక టీవీ ఛానళ్లు రేటింగ్‌ల కోసం చర్చలను కాస్తా కుస్తీ పోటీలుగా మార్చేస్తున్నాయని మీడియా విశ్లేషకులు విమర్శిస్తున్నారు.