ఆరోగ్య సంజీవని ‘పసుపు’.. సరైన రీతిలో తీసుకుంటేనే అద్భుత ప్రయోజనాలు!

భారతీయ వంటగదిలో పసుపు లేనిదే ఏ వంటా పూర్తికాదు. కేవలం రంగు కోసం మాత్రమే కాకుండా, పసుపులో ఉండే ‘కర్కుమిన్’ అనే సమ్మేళనం అద్భుతమైన ఔషధ గుణాలను కలిగి ఉంటుంది. ఇది శరీరంలో కలిగే ఇన్‌ఫ్లమేషన్ (వాపు)ను తగ్గించడమే కాకుండా, దీర్ఘకాలిక ఒళ్లు నొప్పులు మరియు కీళ్ల నొప్పుల నుండి ఉపశమనం కలిగిస్తుంది. అంతేకాకుండా, మహిళల్లో ఈ రోజుల్లో ప్రధాన సమస్యగా మారిన PCOS వంటి హార్మోన్ల అసమతుల్యతను అదుపు చేయడంలో పసుపు కీలక పాత్ర పోషిస్తుంది.
వయసు పెరగడం వల్ల శరీరంలో వచ్చే మార్పులను అడ్డుకోవడంలో పసుపు ఒక 'యాంటీ ఏజింగ్' ఏజెంట్‌గా పనిచేస్తుంది. దీనిలోని యాంటీ ఆక్సిడెంట్లు చర్మంపై ముడతలు రాకుండా కాపాడి, సహజమైన కాంతిని అందిస్తాయి. అలాగే, గుండె ఆరోగ్యాన్ని మెరుగుపరచడంలోనూ, రక్త నాళాల్లో అడ్డంకులను తొలగించడంలోనూ ఇది ఎంతో మేలు చేస్తుంది. మెదడు పనితీరును మెరుగుపరిచి, అల్జీమర్స్ వంటి వ్యాధులు రాకుండా మేధస్సును చురుగ్గా ఉంచడానికి పసుపు తోడ్పడుతుంది.
చాలామంది పసుపును నీటిలో కలిపి లేదా నేరుగా తీసుకుంటుంటారు, కానీ అలా చేయడం వల్ల శరీరానికి పూర్తిస్థాయి ప్రయోజనం అందదు. పసుపులో ఉండే కర్కుమిన్ సమ్మేళనాన్ని మన శరీరం నేరుగా గ్రహించే శక్తి తక్కువగా ఉంటుంది. దీనివల్ల మనం ఎంత పసుపు తిన్నా, అది రక్తం ద్వారా శరీర భాగాలకు చేరదు. అందుకే పసుపును ఏ పద్ధతిలో తీసుకుంటే గరిష్ట ఫలితాలు వస్తాయో తెలుసుకోవడం చాలా అవసరం అని ఆరోగ్య నిపుణులు సూచిస్తున్నారు.
పసుపు యొక్క శక్తిని వంద రెట్లు పెంచాలంటే దానిని నల్ల మిరియాల పొడితో కలిపి తీసుకోవాలి. మిరియాల్లో ఉండే ‘పైపెరిన్’ అనే పదార్థం, పసుపులోని కర్కుమిన్‌ను శరీరం సులభంగా గ్రహించేలా చేస్తుంది. అలాగే, పసుపు కొవ్వులో కరిగే గుణం కలిగి ఉంటుంది కాబట్టి, దీనిని నెయ్యి లేదా కొబ్బరి నూనె వంటి ఆరోగ్యకరమైన కొవ్వులతో కలిపి తీసుకోవడం వల్ల రక్తంలోకి వేగంగా చేరుతుంది. ఈ చిట్కాలను పాటిస్తేనే పసుపు నిజమైన ‘ఆరోగ్య నిధి’గా మారుతుంది.