ప్రియుడి మోజులో భర్తను ముక్కలు చేసిన భార్య.. సంభాల్‌లో ఒళ్లు గగుర్పొడిచే ఘాతుకం

ఉత్తరప్రదేశ్‌లోని సంభాల్ జిల్లాలో అక్రమ సంబంధం ఒక నిండు ప్రాణాన్ని బలితీసుకుంది. తన వివాహేతర సంబంధానికి అడ్డువస్తున్నాడనే కోపంతో, ఒక భార్య తన ప్రియుడితో కలిసి భర్తను అత్యంత కిరాతకంగా హతమార్చింది. కేవలం చంపడంతో ఆగకుండా, పోలీసులకు దొరకకూడదనే ఉద్దేశంతో మృతదేహాన్ని ముక్కలు ముక్కలు చేసి కాలువలో పారేసింది. ఈ ఘటన స్థానికంగా తీవ్ర కలకలం రేపింది.
వివరాల్లోకి వెళ్తే.. సంభాల్‌కు చెందిన రాహుల్ (38) అనే వ్యక్తి గత కొద్దిరోజుల క్రితం కనిపించకుండా పోయాడు. దీనిపై అతని భార్య రూబీ స్వయంగా పోలీసులకు ఫిర్యాదు చేసి, తన భర్త మిస్ అయ్యాడంటూ నాటకమాడింది. అయితే, డిసెంబర్ 15న స్థానిక మురికి కాలువలో తల, కాళ్లు మరియు చేతులు లేని ఒక మొండెం లభ్యమవడంతో పోలీసులు అనుమానాస్పద మృతిగా కేసు నమోదు చేసి దర్యాప్తు ప్రారంభించారు. ఆ మృతదేహం రాహుల్‌దేనని నిర్ధారణ కావడంతో విచారణ వేగవంతం చేశారు.
పోలీసుల విచారణలో భార్య రూబీ ప్రవర్తనపై అనుమానం రావడంతో ఆమెను గట్టిగా ప్రశ్నించారు. ఈ క్రమంలో ఆమె తన నేరాన్ని అంగీకరించి అసలు నిజాన్ని వెల్లడించింది. రాహుల్ తనను ప్రియుడు గౌరవ్‌తో ఉండగా చూసి మందలించాడని, ఆ కోపంతోనే అతడిని వదిలించుకోవాలని ప్లాన్ చేసినట్లు తెలిపింది. గౌరవ్‌తో కలిసి రాహుల్‌ను ఐరన్ రాడ్లతో కొట్టి చంపినట్లు పోలీసుల ఎదుట రూబీ ఒప్పుకుంది.
హత్య చేసిన అనంతరం మృతదేహాన్ని గుర్తించకుండా ఉండేందుకు తల, చేతులు, కాళ్లను వేరు చేసి వేర్వేరు చోట్ల పారేసినట్లు నిందితులు వెల్లడించారు. ఈ క్రూరమైన పనిలో ఆమెకు ప్రియుడు గౌరవ్ పూర్తిస్థాయిలో సహకరించాడు. ప్రస్తుతం పోలీసులు నిందితులిద్దరినీ అరెస్ట్ చేసి రిమాండ్‌కు తరలించారు. అక్రమ సంబంధం కారణంగా ఒక పచ్చని సంసారం ఎలా కూలిపోయిందో ఈ ఘటన సాక్ష్యంగా నిలుస్తోంది.