జ్వరంతో ఇబ్బంది,,,,అన్ని కార్యక్రమాలు రద్దు చేసుకున్న జగన్

వైసీపీ అధినేత, మాజీ ముఖ్యమంత్రి వైఎస్ జగన్ మోహన్ రెడ్డి అస్వస్థతకు గురయ్యారు. వైఎస్ జగన్ జ్వరంతో ఇబ్బంది పడుతున్నారు. దీంతో వైద్యుల సూచన మేరకు బుధవారం రోజు పాల్గొనాల్సిన అన్ని కార్యక్రమాలను రద్దు చేసుకున్నారు. ఈ విషయాన్ని వైఎస్సార్ కాంగ్రెస్ పార్టీ అధికారికంగా ప్రకటించింది. ఎక్స్ వేదికగా వైసీపీ ట్వీట్ చేసింది. మరోవైపు వైఎస్ జగన్ ప్రస్తుతం పులివెందుల పర్యటనలో ఉన్నారు.

ఈ పర్యటనలో భాగంగా షెడ్యూల్ ప్రకారం.. వైఎస్ జగన్ బుధవారం రోజున ఇడుపులపాయలో జరిగే ప్రార్థనల్లో పాల్గొనాల్సి ఉంది. అలాగే బుధవారం మధ్యాహ్నం నుంచి పులివెందులలోని క్యాంపు కార్యాలయంలో ప్రజా దర్బార్ నిర్వహించాల్సి ఉంది. అయితే వైఎస్ జగన్ జ్వరం బారిన పడటంతో ఈ కార్యక్రమాలను అన్నింటినీ రద్దు చేసుకున్నారు. మరోవైపు క్రిస్‌మస్ సందర్భంగా గురువారం రోజున పులివెందుల చర్చిలో జరిగే ప్రార్థనలకు వైఎస్ జగన్ హాజరయ్యే అవకాశాలు ఉన్నాయి.

పులివెందుల పర్యటనలో భాగంగా మంగళవారం రోజున వైఎస్‌ జగన్‌.. కార్యకర్తలు, ప్రజలతో సమావేశమయ్యారు. మంగళవారం సాయంత్రానికి పులివెందులకు చేరుకున్న వైఎస్ జగన్‌కు.. వైసీపీ శ్రేణులు ఘన స్వాగతం పలికారు. ఈ సందర్భంగా పేరుపేరునా అందరినీ పలకరించిన వైఎస్ జగన్.. వారి యోగక్షేమాలు అడిగి తెలుసుకున్నారు.

ఈ సందర్భంగా పలువురు తమ సమస్యలను జగన్ దృష్టికి తీసుకొచ్చారు. వారికి పరిష్కారం చూపిస్తామని జగన్ భరోసా ఇచ్చారు. మరోవైపు వైఎస్ జగన్ పులివెందుల వస్తున్నారనే సమాచారంతో వైసీపీ అభిమానులు, కార్యకర్తలు, నేతలు పెద్దఎత్తున పులివెందుల క్యాంప్ కార్యాలయం వద్దకు చేరుకున్నారు. దీంతో ఆ ప్రాంగణం అంతా జగన్ నినాదాలతో మార్మోగింది.

ఇస్రోకు వైఎస్ జగన్ శుభాకాంక్షలు..

మరోవైపు ఇస్రో ప్రయోగం విజయవంతం కావటంతో వైఎస్ జగన్ ఇస్రో శాస్త్రవేత్తలకు అభినందనలు తెలియజేశారు. ఇస్రో బ్లూబర్డ్ బ్లాక్ - 2 మిషన్ విజయవంతమైన నేపథ్యంలో ఇస్రోతో పాటుగా ఈ ప్రయోగంలో భాగస్వామ్యులైన శాస్త్రవేత్తల బృందానికి అభినందనలు తెలియజేస్తున్నట్లు వైఎస్ జగన్ ట్వీట్ చేశారు. నిర్దేశిత కక్షలోకి ఉపగ్రహాన్ని విజయవంతంగా ప్రవేశపెట్టడం.. భారతదేశానికి గర్వకారణమని కొనియాడారు. ఇది భారతీయ శాస్త్రవేత్తల నైపుణ్యానికి నిదర్శనమని కొనియాడారు. యావత్ దేశానికి స్ఫూర్తిగా నిలుస్తున్న ఇస్త్రో శాస్త్రవేత్తలకు, ఇంజనీర్లకు సెల్యూట్ చేస్తున్నానంటూ జగన్ ట్వీట్ చేశారు.