61 ఏళ్ల వృద్ధురాలిపై ఆవుల మంద దాడి

స్కాట్లాండ్‌లోని హైలాండ్స్ ప్రాంతంలో హైకింగ్‌కు వెళ్లిన ఒక 61 ఏళ్ల వృద్ధురాలికి ఎదురైన భయానక అనుభవం ప్రపంచవ్యాప్తంగా అందరినీ ఆశ్చర్యానికి గురిచేస్తోంది. ఆవుల మంద దాడి చేసినప్పుడు ఆమె ప్రదర్శించిన సమయస్ఫూర్తి ఆమె ప్రాణాలను కాపాడింది. 61 ఏళ్ల మేరీ జేన్ పార్కర్ తన పెంపుడు కుక్కతో కలిసి హైకింగ్ చేస్తుండగా అకస్మాత్తుగా ఆమెపై ఆవుల మంద దాడి చేసింది. ఆవులు ఆమెను తొక్కేసి, గాల్లోకి ఎగరేసి కిందపడేసి.. తీవ్రంగా గాయపరిచాయి. తీవ్ర గాయాలు, భయంతో ఉన్న ఆ వృద్ధురాలికి అనుకోకుండా ఒక ఆలోచన తట్టింది. ఆవుల మంద తిరిగి దాడి చేయకుండా ఉండేందుకు ఏకంగా 45 నిమిషాల పాటు చనిపోయినట్లుగా శవంలా పడి ఉంది. చివరికి రెస్క్యూ టీం వచ్చి ఆమెను కాపాడింది.

మేరీ జేన్ ఒక అనుభవజ్ఞురాలైన హైకర్. ఆగస్ట్ నెలలో ఆమె తన పెంపుడు కుక్క లోలాతో కలిసి న్యూటన్‌మోర్ సమీపంలోని పర్వత ప్రాంతంలో నడుస్తోంది. అయితే అదే సమయంలో ఒక గుట్ట వెనుక దాగి ఉన్న ఆవుల మందను.. ఆమె గమనించలేదు. అకస్మాత్తుగా అవి చుట్టుముట్టి ఆమెను తొక్కడం ప్రారంభించాయి. రెండు ఆవుల మధ్య చిక్కుకున్న మేరీ జేన్‌ను అవి కొంత దూరం ఈడ్చుకుంటూ వెళ్లాయి. ఆమె బ్యాగ్ స్ట్రాప్ ఒక ఆవు కాలికి చిక్కుకోవడంతో ఆమెను అవి.. ఈడ్చుకుంటూ వెళ్లాయి. ఆ తర్వాత ఒక ఆవు వచ్చి.. ఆమెను గాల్లోకి ఎగురవేయడంతో ఆమె బలంగా కింద పడిపోయింది.

ఆవులు దాడి చేయడం ఆపేసినప్పటికీ.. అవి మాత్రం ఆమె చుట్టూనే తిరుగుతున్నాయి. ఆవులు తనను మళ్లీ తొక్కుతాయేమోననే భయంతో ఆమె ఏమాత్రం కదలకుండా శవంలా పడిపోయింది. తన పక్కనే పడిపోయిన ఫోన్ కూడా అందుకోలేకపోయిన ఆ వృద్ధురాలు.. తన బ్యాగులో ఉన్న ఎమర్జెన్సీ ట్రాకింగ్ డివైస్‌ను అతి కష్టం మీద యాక్టివేట్ చేసింది. దీంతో అది రెస్క్యూ సిబ్బందిని అలర్ట్ చేసింది. అయితే వాళ్లు వచ్చే వరకు ఎలాగైనా ప్రాణాలు కాపాడుకోవాలని ఆ వృద్ధురాలు.. చనిపోయినట్లు నటించింది. ఆ సమయంలో ఒక ఆవు ఆమె తల దగ్గర వాసన చూస్తుంటే.. మరో ఆవు ఆమె గాయాలను నాకుతోంది. అయినప్పటికీ ఆమె కదలకుండా అలాగే ఉండిపోయింది.

ఎట్టకేలకు 45 నిమిషాలపాటు అలా ఉన్న తర్వాత అక్కడికి సహాయక సిబ్బంది చేరుకున్నారు. వెంటనే ఆమెను ఎయిర్ అంబులెన్స్‌లో దగ్గర్లో ఉన్న ఆస్పత్రికి తరలించారు. ఆ వృద్ధురాలికి తగిలిన గాయాలు చూసి అక్కడి డాక్టర్లే షాక్ అయ్యారు. 10 పక్కటెముకలు విరిగిపోయాయి. రొమ్ము ఎముక, కుడి చేయి విరిగాయి. ఊపిరితిత్తులు తీవ్రంగా దెబ్బతిన్నాయి. ఎడమ కాలి కండరాలు బయటకు వచ్చేలా తీవ్ర గాయం అయింది. ఆమెకు అనేక సర్జరీలు, చర్మ మార్పిడి చేసిన తర్వాత 10 రోజుల పాటు ఆమె ఆస్పత్రిలో ఉండి చివరికి డిశ్చార్జ్ అయింది.

తాను బతికి ఉన్నానంటే అది ఒక అద్భుతమని.. మేరీ జేన్ కోలుకున్న తర్వాత వెల్లడించింది. ఆవులు ఉన్న ప్రాంతాల్లో చాలా జాగ్రత్తగా ఉండాలని పేర్కొంది. మన వెంట కుక్క ఉంటే.. ఆవులు దాడి చేస్తున్నప్పుడు వెంటనే కుక్కకు ఉన్న గొలుసును వదిలేయాలని ఆమె సూచించింది. ఎందుకంటే ఆవులు మనిషి కంటే కుక్కలనే ఎక్కువగా శత్రువులుగా భావిస్తాయని తన అనుభవాన్ని పంచుకుంది.