షేక్ హసీనా లాగే యూనస్ కూడా దేశం విడిచి పారిపోవాల్సిందేనా,,,,హాదీ సోదరుడి హెచ్చరిక

రాజకీయ అస్థిరతతో కొట్టుమిట్టాడుతున్న బంగ్లాదేశ్‌లో పరిస్థితులు రోజురోజుకూ దిగజారుతున్నాయి. గతేడాది విద్యార్థి ఉద్యమంతో షేక్ హసీనా ప్రభుత్వాన్ని గద్దె దించడంలో కీలక పాత్ర పోషించిన యువ నేత షరీఫ్ ఉస్మాన్ హాదీ హత్య.. ఇప్పుడు తాత్కాలిక ప్రభుత్వాధినేత మహమ్మద్ యూనస్‌కు పెను సవాలుగా మారింది. ఈ హత్య వెనుక స్వయంగా యూనస్ సర్కార్ హస్తం ఉందంటూ వస్తున్న ఆరోపణలు దేశంలో కొత్త ఉద్రిక్తతలకు దారితీస్తున్నాయి. ముఖ్యంగా ఆయన కూడా మాజీ ప్రధాని షేక్ హసీనా లాగే దేశం విడిచి పారిపోవాల్సిన సమయం వచ్చిందని.. మృతుడు ఉస్మాన్ హాదీ సోదరుడి హెచ్చరిక చూస్తుంటే అర్థం అవుతోంది.

హసీనాలాగే మీరు కూడా పారిపోవాలి..

ఇంకిలాబ్ మోంచో నేత ఉస్మాన్ హాదీ హత్యపై ఆయన సోదరుడు ఒమర్ సంచలన వ్యాఖ్యలు చేశారు. యూనస్ ప్రభుత్వంలోని కీలక వ్యక్తులే ఈ ఘాతుకానికి ఒడిగట్టారని ఆయన ఆరోపించారు. వచ్చే ఏడాది జరగాల్సిన ఎన్నికలను అడ్డుకోవాలనే కుట్రతోనే తన సోదరుడిని చంపేశారన్నారు. ఈ హత్యపై తక్షణమే నిష్పక్షపాత దర్యాప్తు జరగాలని కోరారు. హాదీకి న్యాయం జరగకపోతే.. గతేడాది షేక్ హసీనా దేశం విడిచి ఎలా పారిపోయారో, మీరు కూడా అదే పరిస్థితిని ఎదుర్కోవాల్సి వస్తుందంటూ ఒమర్ ఘాటుగా హెచ్చరించారు. ఈ వ్యాఖ్యలు ఇప్పుడు బంగ్లాదేశ్ రాజకీయ వర్గాల్లో ప్రకంపనలు సృష్టిస్తున్నాయి.

బంగ్లాదేశ్‌లో ప్రస్తుతం అరాచక శక్తులు రెచ్చిపోతున్నాయి. ఇప్పటికే పలు మీడియా సంస్థలపై దాడులు జరగ్గా.. తాజాగా గ్లోబల్ టీవీ హెడ్ నాజ్నిన్ మున్నీని లక్ష్యంగా చేసుకున్నారు. ఆమెను తక్షణమే పదవి నుంచి తొలగించాలని, లేదంటే పరిణామాలు తీవ్రంగా ఉంటాయని ఆందోళనకారులు బెదిరింపులకు పాల్పడుతున్నారు. పత్రికా స్వేచ్ఛను అణచివేస్తున్న ఇలాంటి చర్యలు బంగ్లాదేశ్‌లో శాంతిభద్రతల పరిస్థితికి అద్దం పడుతున్నాయి. మొత్తానికి ఒకవైపు అంతర్గత తిరుగుబాటు, మరోవైపు అంతర్జాతీయ ఒత్తిళ్లతో మహమ్మద్ యూనస్ సర్కార్ అగ్నిపరీక్షను ఎదుర్కొంటోంది. పొరపాటున ఉస్మాన్ హాదీ హత్య కేసులో నిజాలు తేలకపోతే.. దేశం మరోసారి అల్లకల్లోలంగా మారే ప్రమాదం కనిపిస్తోంది. ముఖ్యంగా యూనస్ నిజంగానే దేశం నుంచి పారిపోయే పరిస్థితి వస్తుందని అంతా భావిస్తున్నారు.