భారత్ ఆపరేషన్ సిందూర్ చేపడితే తప్పేంటి,,, పాకిస్థాన్ మిలిటరీపై సొంత నేతల ఆగ్రహం

పాకిస్థాన్ సైనిక నాయకత్వం అనుసరిస్తున్న అనాలోచిత విదేశీ విధానాలపై ఆ దేశపు అత్యంత ప్రభావవంతమైన మత గురువు, ప్రతిపక్ష నాయకుడు మౌలానా ఫజ్లూర్ రెహ్మాన్ నిప్పులు చెరిగారు. మంగళవారం జరిగిన ఒక మత పండితుల సదస్సులో ఆయన ప్రసంగిస్తూ.. ఆర్మీ చీఫ్ జనరల్ అసిమ్ మునీర్‌ను నేరుగా టార్గెట్ చేశారు. ముఖ్యంగా అఫ్గానిస్థాన్ సరిహద్దుల్లో పాక్ సైన్యం జరుపుతున్న దాడులను ఆయన తీవ్రంగా ఖండించారు. భారత్, అఫ్గానిస్థాన్ విషయంలో పాక్ సైన్యం ప్రదర్శిస్తున్న 'ద్వంద్వ ప్రమాణాల'ను ఈ సందర్భంగా ఎండగట్టారు.

మీరు చేయగాలేంది.. భారత్ చేస్తే తప్పేంటి?

"మీ శత్రువులు అక్కడ ఉన్నారన్న సాకుతో మీరు అఫ్గానిస్థాన్‍‌పై దాడులు చేయడాన్ని సమర్థించుకుంటే.. మరి భారత్ తన శత్రువులను ఏరివేసేందుకుబహావల్పూర్, మురిద్ (పాకిస్థాన్‌లో) ప్రాంతాల్లో దాడులు చేసినప్పుడు మీరు ఎందుకు అభ్యంతరం వ్యక్తం చేస్తున్నారు?" అంటూ ఆయన వేసిన ప్రశ్న పాక్ సైనిక వర్గాల్లో కలకలం రేపింది. ముఖ్యంగా పాకిస్థాన్, అఫ్గానిస్థాన్ సరిహద్దుల్లో ఉద్రిక్తతలకు పాక్ సైనిక నాయకత్వమే కారణమని రెహ్మాన్ ఆరోపించారు. అఫ్గానిస్థాన్ గడ్డపై తెహ్రీక్-ఎ-తాలిబన్ పాకిస్థాన్ (టీటీపీ) ఉగ్రవాదులు ఉన్నారనే కారణంతో వైమానిక దాడులు చేయడం సరికాదని ఆయన హితవు పలికారు. ఇలాంటి చర్యలు ప్రాంతీయ అస్థిరతకు దారి తీస్తాయని.. దీనివల్ల రెండు దేశాలకు నష్టమే తప్ప లాభం లేదని హెచ్చరించారు. తుపాకులతో కాకుండా రాజకీయ అవగాహన, చర్చల ద్వారానే సమస్యలను పరిష్కరించుకోవాలని ఆయన సూచించారు.

పాకిస్థాన్ నేషనల్ అసెంబ్లీలో 10 మంది సభ్యులు కలిగిన జేయూఐ-ఎఫ్ పార్టీ అధినేతగా రెహ్మాన్ వ్యాఖ్యలు రాజకీయంగా అత్యంత ప్రాముఖ్యతను సంతరించుకున్నాయి. పాక్ సైన్యం దేశ భద్రత పేరుతో రాజకీయాల్లో జోక్యం చేసుకోవడం, విఫలమైన సరిహద్దు వ్యూహాలను అమలు చేయడం వల్ల దేశం దౌత్యపరంగా ఒంటరి అవుతోందని ఆయన ఆందోళన వ్యక్తం చేశారు. కేవలం మిలిటరీ శక్తిపై ఆధార పడకుండా.. పొరుగు దేశాలతో పరస్పర గౌరవంతో కూడిన విదేశీ నీతిని అనుసరించాలని డిమాండ్ చేశారు.

ప్రస్తుతం పాకిస్థాన్ సరిహద్దుల్లో ఒకవైపు ఆఫ్ఘన్ దళాలతో ఘర్షణలు, మరోవైపు ఉగ్రవాద దాడులతో సతమతం అవుతోంది. ఈ క్లిష్ట సమయంలో సొంత దేశపు కీలక నేత నుంచి ఇంతటి తీవ్ర విమర్శలు రావడం జనరల్ అసిమ్ మునీర్ నేతృత్వంలోని సైనిక పాలనకు పెద్ద సవాలుగా మారింది.