కెనడాలో భారతీయ మహిళ దారుణ హత్య

కెనడాలో నివసిస్తున్న భారతీయ మహిళ దారుణ హత్యకు గురయ్యారు. టొరంటో నగరంలో జరిగిన ఈ ఘటనలో ఆమె సన్నిహిత భాగస్వామియే ప్రధాన నిందితుడు అని పోలీసులు గుర్తించారు. ఈ ఉదంతం ప్రవాస భారతీయుల్లో పెను విషాదాన్ని నింపింది.

అదృశ్యమైన కొద్ది గంటలకే శవమై..

పోలీసుల కథనం ప్రకారం.. టొరంటోలోని స్ట్రాచన్ అవెన్యూ, వెల్లింగ్టన్ స్ట్రీట్ ఏరియాలో నివసిస్తున్న 30 ఏళ్ల హిమాన్షి శుక్రవారం రాత్రి నుంచి కనిపించడం లేదంటూ పోలీసులకు ఫిర్యాదు అందింది. రాత్రి 10.40 గంటల సమయంలో దర్యాప్తు ప్రారంభించిన అధికారులకు.. మరుసటి రోజు శనివారం ఉదయం 6.30 గంటల ప్రాంతంలో ఒక నివాసంలో ఆమె విగతజీవిగా కనిపించింది. ఆమె మరణాన్ని ప్రాథమికంగా హత్యగా గుర్తించిన పోలీసులు.. వెంటనే హోమిసైడ్ యూనిట్‌కు కేసును బదిలీ చేశారు.

ఇదీ చూడండి: అమెరికాలో ఘోరం: తండ్రిని సుత్తితో కొట్టి చంపిన భారత సంతతి వ్యక్తి, అది నా డ్యూటీ అంటూ వింత వాదన

ప్రేమించి ప్రాణం తీశాడా?

ఈ దారుణ హత్యకు పాల్పడింది ఆమెతో సన్నిహిత సంబంధం కలిగిన 32 ఏళ్ల అబ్దుల్ గపూరీ అని పోలీసులు అనుమానిస్తున్నారు. వారిద్దరూ రిలేషన్‌షిప్‌లో ఉన్నారని స్థానిక మీడియా కథనాలు వెల్లడించాయి. ఈ క్రమంలో నిందితుడైన గపూరీపై 'ఫస్ట్-డిగ్రీ మర్డర్' కింద కేసు నమోదు చేసిన టొరంటో పోలీసులు.. అతడిని అరెస్ట్ చేసేందుకు కెనడా వ్యాప్తంగా రెడ్ కార్నర్ వారెంట్ జారీ చేశారు. నిందితుడి ఫోటోలను కూడా విడుదల చేసి, ఎవరికైనా సమాచారం తెలిస్తే వెంటనే పోలీసులకు తెలపాలని ప్రజలను కోరారు.

హిమాన్షి ఖురానా హత్యపై టొరంటోలోని భారత కాన్సులేట్ జనరల్ తీవ్ర దిగ్భ్రాంతి వ్యక్తం చేసింది. "యువ భారతీయ పౌరురాలు హిమాన్షి ఖురానా హత్యకు గురవడం మాకు ఎంతో బాధ కలిగించింది. ఈ క్లిష్ట సమయంలో ఆమె కుటుంబ సభ్యులకు మా ప్రగాఢ సానుభూతిని తెలియజేస్తున్నాం" అని ఎక్స్ వేదికగా పేర్కొంది. మృతదేహాన్ని స్వదేశానికి తీసుకురావడం, ఇతర చట్టపరమైన ప్రక్రియల విషయంలో స్థానిక అధికారులతో సమన్వయం చేసుకుంటూ కుటుంబానికి పూర్తి స్థాయి సహాయ సహకారాలు అందిస్తున్నట్లు రాయబార కార్యాలయం తెలిపింది.