'బూమ్రా, పంత్ నాకు సారీ చెప్పారు'.. కోల్‌కతా వివాదంపై బవుమా క్లారిటీ

ఇటీవల దక్షిణాఫ్రికా ఇండియా పర్యటనకు వచ్చిన విషయం తెలిసిందే. అందులో భాగంగా కోల్‌కతాలోని ఈడెన్ గార్డెన్స్ వేదికగా భారత్, సౌతాఫ్రికా తొలి టెస్టు ఆడాయి. ఈ మ్యాచ్‌లో సౌతాఫ్రికా 30 పరుగుల తేడాతో విజయం సాధించింది. అయితే ఈ మ్యాచ్‌లో ప్రోటీస్ కెప్టెన్ తెంబ బావుమా.. టీమిండియా ప్లేయర్లు జస్‌ప్రీత్ బూమ్రా, రిషభ్ పంత్ వివాదం చర్చనీయాంశమైంది. దీనిపై క్రికెట్ అభిమానులు బూమ్రాపై విమర్శలు గుప్పించారు. తాజాగా ఈ విషయంపై స్పందించాడు తెంబ బవుమా. బుమ్రా, పంత్ తనకు క్షమాపణ చెప్పారని తెలిపాడు.

కోల్‌కతా టెస్టులో బూమ్రా, పంత్ తన గురించి చేసిన వ్యాఖ్యల గురించి బవుమా క్లారిటీ ఇచ్చాడు. తనపై చేసిన కామెంట్ల విషయంలో బూమ్రా, పంత్ తనకు క్షమాపణ తెలిపారని చెప్పాడు. వాళ్లు సారీ చెప్పినప్పుడు.. ఎందుకు చెబుతున్నారో అర్థం కాలేదన్నాడు. అనంతరం ఈ విషయం తన మీడియా మేనేజర్‌తో మాట్లాడితేనే తెలిసిందని చెప్పాడు. అయితే గ్రౌండ్‌లో జరిగిన సంఘటనలను అక్కడే వదిలేస్తామని.. కానీ మైదానంలో ప్రత్యర్థి ప్లేయర్లు అన్న మాటలను మర్చిపోలేమని బవుమా అన్నాడు. అలాగని ఆ ప్లేయర్లపై ద్వేషం పెంచుకోలేమని చెప్పాడు. అలాంటి మాటలు మరింత మోటివేషన్‌ లాగా పనిచేస్తాయని చెప్పాడు. కాగా, ఈ టెస్ట్ సిరీస్‌లో 2-0 తేడాతో భారత్‌ను వైట్‌వాష్ చేసింది దక్షిణాఫ్రికా.

అసలేంటి వివాదం..

దక్షిణాఫ్రికా తొలి ఇన్నింగ్స్‌లో బుమ్రా 13 ఓవర్లో ఆఖరి బంతిని బవుమాకు వేశాడు. షాట్ ఆడే క్రమంలో బాల్ బవుమా ప్యాడ్‌కు తగిలింది. దీంతో బౌలర్‌తో పాటు టీమిండియా ఫీల్డర్లు కూడా ఎల్బీడబ్ల్యూకు అప్పీల్ చేశారు. అంపైర్ మాత్రం అవుట్ ఇవ్వడానికి నిరాకరించాడు. దీంతో డీఆర్ఎస్ తీసుకునే విషయంలో బుమ్రా, వికెట్ కీపర్ పంత్ చర్చించుకున్నారు. అయితే బంతి బవుమా ప్యాడ్స్‌కు ఎత్తుగా తగిలిందని పంత్ చెప్పాడు. అందుకు బుమ్రా స్పందిస్తూ ‘బౌనా భీ హై’ అని అన్నాడు. అయితే ‘బౌనా’ అంటే మరుగుజ్జు అని అర్థం. బవుమా పొట్టిగా ఉండటంతో బంతి స్టంప్స్‌ను మిస్ అయ్యే అవకాశం ఉందని చెప్పడానికి బుమ్రా ఆ పదం ఉపయోగించాడు. అయితే దీనికి సంబంధించిన వీడియో వైరల్ అవ్వడంతో నెటిజన్లు బుమ్రాపై మండిపడ్డారు.

కాగా, ఈ విషయంపై దక్షిణాఫ్రికా బ్యాటింగ్ కోచ్ యాష్‌వెల్ ప్రిన్స్ అప్పుడే స్పందించాడు. ఇలా జరగడం ఇదే తొలిసారని.. కానీ ఇప్పటివరకు డ్రెస్సింగ్ రూమ్‌లో ఎలాంటి చర్చ జరగలేదన్నాడు. ఇక్కడ జరిగిన దానివల్ల ఎవ్వరికీ పెద్దగా ఇబ్బంది కలగలేదని అనుకుంటున్నట్లు చెప్పాడు. అయితే బుమ్రా సారీ చెప్పడంతో ఈ వివాదానికి ఎండ్ కార్డ్ పడినట్లు అయింది.