వెనుజులా కంటే పాకిస్థాన్ లో భారీగా చమురు నిక్షేపాలు

దాయాది పాకిస్థాన్ భారీ జాక్‌పాట్ కొట్టింది. ఆ దేశంలో భారీగా చమురు నిక్షేపాలు బయటపడ్డాయి. వెనుజులా కంటే భారీగా ఈ నిల్వలు ఉండటం మరో విశేషం. సులైమాన్ ఫోల్డ్-థ్రస్ట్ బెల్ట్‌లో 340 బిలియన్ బ్యారెళ్ల భారీ చమురు నిల్వలను కనుగొన్నట్లు తాజాగా అమెరికా జియోలాజికల్ సర్వే ప్రకటించింది. వెనిజులాలో 303 బిలియన్ బ్యారెళ్ల నిల్వలు ఉండగా.. వాటిని పాక్ అధిగమించింది. ఇక, సులైమాన్ ఫోల్డ్ థ్రస్ట్ బెల్ట్ పాకిస్థాన్ వాయువ్య ప్రాంతంలో ఉంది. ఇండియా టెక్టానిక్ ప్లేట్, యురేషియా టెక్టానిక్ ప్లేట్ పరస్పరం ఢీకొట్టడంతో ఇది ఏర్పడింది. ఇది బలూచిస్థాన్, ఖైబర్ పఖ్తూంఖ్వా ప్రాంతాల్లో విస్తరించింది. గతేడాది పాకిస్థాన్‌తో అమెరికా అధ్యక్షుడు డొనాల్డ్ ట్రంప్ ఇంధన ఒప్పందానికి ఇదే కారణమై ఉంటుందని భావిస్తున్నారు.

కాగా, పాకిస్థాన్ సైతం తమ దేశంలో భారీగా గ్యాస్, చమురు నిక్షేపాలను బలూచిస్థాన్, ఖైబర్ పఖ్తూంఖ్వా ప్రావిన్సుల్లో గుర్తించినట్టు జనవరి 1న ప్రకటించింది. ఇది దేశంలో చమురు సరఫరా లోటును తగ్గించడానికి సహకరిస్తుందని పేర్కొంది. ఖోహాట్ జిల్లాలో ప్రభుత్వ రంగ సంస్థ అయిన ఆయిల్ అండ్ గ్యాస్ డెవలప్‌మెంట్ కంపెనీ లిమిటెడ్ (OGDCL) డట్టా ఫార్మేషన్‌లో చేపట్టిన తవ్వకాల్లో ఇది బయటపడింది. డట్టా ఫార్మేషన్ అనేది ఉత్తర పాకిస్థాన్‌లోని కొన్ని ప్రాంతాల్లో చమురు, సహజవాయువు నిల్వలు ఉన్నట్లు తెలియజేసే శిలాజం. అందువల్ల చమురు అన్వేషణ కార్యకలాపాల్లో ఇది కీలకంగా మారింది.

డిమాండ్ పెరుగుతుండటం, దేశీయ ఉత్పత్తి పరిమితంగా ఉండటంతో పాక్‌లో ఇంధన లోటు మరింత పెరుగుతోంది. దీనివల్ల ఖరీదైన ఇంధన దిగుమతులపై దేశం ఎక్కువగా ఆధారపడాల్సి వస్తోంది. ఫలితంగా ప్రపంచ మార్కెట్ల ధరల మార్పులకు పాకిస్థాన్ ఆర్థిక వ్యవస్థ ఎక్కువగా ప్రభావితమవుతోంది. ‘‘డట్టా ఫార్మేషన్‌ (జురాసిక్ కాలానికి చెందింది)లో నిర్వహించిన కేస్-హోల్ డ్రిల్ స్టెమ్ టెస్ట్ (DST-02)లో ఆ బావి రోజుకు 4,100 బ్యారెళ్ల చమురు (BOPD), రోజుకు 10.5 మిలియన్ స్టాండర్డ్ క్యూబిక్ ఫీట్లు (MMSCFD) సహజవాయువు ఉత్పత్తి చేయగలదని వెల్లడయ్యింది’ అని OGDCL కంపెనీ సెక్రటరీ వసీమ్ అహ్మద్ పాకిస్థాన్ స్టాక్ ఎక్స్చేంజ్‌కు రాసిన లేఖలో తెలిపారు.

డ్రిల్ స్టెమ్ టెస్ట్ అనేది ఓ బావిలో ఆయిల్, గ్యాస్‌ ఎంత మొత్తంలో ఉత్పత్తి చేయగలదో అంచనా వేయడానికి సహకరించే పరీక్ష. దీని ద్వారా కంపెనీలు ఒక ఆవిష్కరణ లాభదాయకమా? కాదా? అని తెలుసుకుంటాయి. ఓజీడీసీఎల్ బావిని 5,170 మీటర్ల లోతు వరకు తవ్విన తర్వాత అనేక చోట్ల చమురు, గ్యాస్ ఉన్నట్లు గుర్తించారు. ఇంతకుముందు కూడా లోతైన పొరల్లో పరీక్షలు చేసి, నిల్వలను కనుగొన్నారు. ఈ ఆవిష్కరణ దేశీయ వనరులతో ఇంధన సరఫరా, డిమాండ్ మధ్య అంతరాన్ని తగ్గించడానికి దోహదపడుతుందని OGDCL తెలిపింది.