మదురోపై అమెరికా కోపానికి కారణం ఆ డ్యాన్స్ వీడియో..ట్రంప్‌కు తెప్పించింది అంటున్న మీడియా

వెనిజులా అధ్యక్షుడు నికొలస్ మదురోను అమెరికా సైన్యం అదుపులోకి తీసుకోవడం ప్రపంచవ్యాప్తంగా సంచలనంగా మారింది. ట్రంప్ చర్యలను చాలా దేశాలు ఖండిస్తున్నాయి. మదురో, అతడి భార్యను అదుపులోకి తీసుకుని న్యూయార్క్‌కు తరలించారు. డ్రగ్ టెర్రరిజం కుట్ర, ఆయుధాల నేరాలు, కొకైన్ దిగుమతి కుట్ర వంటి ఆరోపణలపై విచారణకు సిద్ధం చేశారు. అయితే మదురోను ఇంత అకస్మాత్తుగా అదుపులోకి తీసుకోవడం యావత్ ప్రపంచాన్ని షాక్‌కు గురి చేసింది. అసలేం జరిగిందని ట్రంప్ ఇలాంటి నిర్ణయం తీసుకున్నారని దేశాధ్యక్షులతో పాటు సామాన్య ప్రజలు సైతం చర్చించుకుంటున్నారు. మదురో చేసిన ఓ డ్యాన్స్ పరిస్థితి ఇంత అధ్వాన్నంగా మారడానికి ప్రధాన కారణం అంటున్నారు.

మదురో అధికారం నుంచి తప్పుకోవాలని... లేదంటే చాలా తీవ్ర పరిణామాలు ఎదుర్కోవాల్సి వస్తుందని ట్రంప్ ప్రభుత్వం చాలా కాలం నుంచే హెచ్చరిస్తోంది. పైగా యుద్ధం తప్పదని వార్నింగ్ కూడా ఇచ్చిందని సమాచారం. అయితే మదురో అమెరికా హెచ్చరికలను పట్టించుకోకుండా... బహిరంగ కార్యక్రమాలకు హాజరు కావడమే కాక... అమెరికా హెచ్చరికలను హేళన చేస్తున్నట్లుగా... 'నో వార్, ఎస్ పీస్'  పాటకు ట్రంప్‌ను అనుకరిస్తూ డ్యాన్స్ చేయడం అమెరికాను రెచ్చగొట్టినట్లుగా మారిందని... ఆ డ్యాన్స్ వీడియో వైరల్ కావడంతో పరిస్థితులు ఒక్కసారిగా మారిపోయి మదురో జీవితం తలకిందులు అయిపోయిందని అభిప్రాయపడుతున్నారు.

దీంతో అమెరికా అధ్యక్షుడు డొనాల్డ్ ట్రంప్ , వెనిజులా అధ్యక్షుడు మదురోను అరెస్టు చేయాలని, ఆ దేశాన్ని బాంబులతో ధ్వంసం చేయాలని ఆదేశించారని వార్తలు వస్తున్నాయి. 'నో వార్, ఎస్ పీస్' అనే పాట రీమిక్స్‌కు మదురో చేసిన డ్యాన్స్, ట్రంప్‌కు విపరీతమైన కోపం తెప్పించిందని న్యూయార్క్ టైమ్స్ కథనం పేర్కొంది. వైరల్‌గా మారిన ఆ వీడియోలో మదురో 'నో వార్, ఎస్ పీస్' పాటకు డ్యాన్స్ చేస్తూ కనిపించారు. అప్పటికే అమెరికా మదురోకు యుద్ధం తప్పదనే హెచ్చరికలు జారీ చేయడం... మదురో వాటిని ఈ పాట ద్వారా పరోక్షంగా ప్రస్తావించడం ట్రంప్‌కు కోపం తెప్పించిందని సమాచారం. ఈ డ్యాన్స్ వీడియో కొన్నాళ్ల క్రితం వరకు కూడా అనేక సార్లు ప్రసారమైంది.

అప్పటికే వెనిజులాపై యుద్ధం తప్పదని ట్రంప్ ప్రభుత్వం వార్నింగ్ ఇచ్చింది. అయితే మదురో హెచ్చరికలను హేళన చేస్తున్నట్టుగా ఉన్న డ్యాన్స్ వీడియో విడుదల కావడంతో ట్రంప్ ప్రభుత్వానికి తీవ్ర ఆగ్రహం కలిగిందని అమెరికా వర్గాలు చెబుతున్నాయి. ఈ డ్యాన్స్ వీడియో ద్వారా మదురో... ట్రంప్ ప్రభుత్వం తమను ఏం చేయలేదనే సందేశాన్ని పంపించారని అమెరికా ప్రభుత్వ పెద్దల్లో కొందరు భావించారట. ఇదే చివరకు ఉద్రిక్త పరిస్థితులకు దారి తీసింది.

మదురో తీరుపై ఆగ్రహంగా ఉన్న అమెరికా... సైన్యాన్ని రంగంలోకి దింపిందని సంబంధిత వర్గాలు తెలిపాయి. అమెరికాకు మాదకద్రవ్యాలు అక్రమంగా రవాణా చేస్తూ నార్కో-టెర్రరిజానికి పాల్పడిన ఆరోపణలపై ట్రంప్ సర్కారు మదురోను అదుపులోకి తీసుకున్న విషయం తెలిసిందే.