చమురు కోసం చక్రవర్తి అవతారం: వెనెజువెలాపై ట్రంప్ కన్ను

అమెరికా అధ్యక్షుడు డొనాల్డ్ ట్రంప్ తాను ప్రస్తుతం వెనెజువెలా తాత్కాలిక కార్యనిర్వాహక అధ్యక్షుడిగా బాధ్యతలు స్వీకరించానని ప్రకటించారు. నికోలాస్ మదురోను బందీ చేసి అమెరికాకు తరలించిన అనంతరం వెనెజువెలాలో నాయకత్వ ఖాళీ ఏర్పడిందని ఆయన పేర్కొన్నారు.ఈ పరిణామాల నేపథ్యంలో, ఒక దేశానికి అధ్యక్షుడిగా ఉన్న వ్యక్తి మరో దేశానికి యాక్టింగ్ ప్రెసిడెంట్‌గా వ్యవహరించడం అంతర్జాతీయంగా అత్యంత అసాధారణ ఘటనగా మారింది. ట్రంప్ తన ట్రూత్ సోషల్ మాధ్యమం ద్వారా “నేనే వెనెజువెలా యాక్టింగ్ ప్రెసిడెంట్” అని ప్రకటించారు.ఇంతకుముందు ట్రంప్ అధికారిక చిత్రాల కింద కేవలం అమెరికా అధ్యక్షుడు అనే గుర్తింపు మాత్రమే ఉండేది. తాజాగా ఆ గుర్తింపులో మార్పు చోటుచేసుకుంది. అమెరికా 45వ, 47వ అధ్యక్షుడిగా ఉన్న తన హోదాతో పాటు వెనెజువెలా తాత్కాలిక అధ్యక్షుడు అనే పదవిని కూడా ఆయన జోడించుకున్నారు.వెనెజువెలాలో చట్టబద్ధమైన, న్యాయపరమైన అధికార మార్పిడి పూర్తయ్యే వరకు అక్కడి పరిపాలనా బాధ్యతలు అమెరికా పర్యవేక్షణలోనే ఉంటాయని ట్రంప్ స్పష్టం చేశారు. వెనిజులియన్ల ప్రయోజనాలను పట్టించుకోని వ్యక్తులకు దేశ బాధ్యతలు అప్పగించడం సాధ్యం కాదని, అలాంటి ప్రమాదాన్ని తాము తీసుకోదల్చుకోలేదని తెలిపారు.ఇక గత వారం వెనెజువెలా తాత్కాలిక అధ్యక్షురాలిగా బాధ్యతలు స్వీకరించిన ఉపాధ్యక్షురాలు డెల్సీ రోడ్రిగెస్ పరిస్థితి ఇప్పుడు ఏమవుతుందనే అంశం అనిశ్చితంగా మారింది.వెనెజువెలా చమురు నిల్వలను అమెరికానే వినియోగించుకుంటుందని ట్రంప్ ఇప్పటికే పలుమార్లు పేర్కొన్నారు. ఈ క్రమంలోనే అత్యంత నాణ్యమైన చమురులో నుంచి 30 నుంచి 50 మిలియన్ బ్యారెళ్ల వరకు ఇప్పటికే అమెరికాకు చేరుతున్నాయని, వాటిని మార్కెట్ ధరలకు అనుగుణంగా విక్రయించి వచ్చిన ఆదాయాన్ని అమెరికా ఖజానాకు జమ చేస్తున్నామని ఆయన వెల్లడించారు.