స్కిల్ డెవలప్‌మెంట్ కేసు క్లోజ్.. సీఎం చంద్రబాబు సహా 37 మందికి ఏసీబీ కోర్టు క్లీన్ చిట్!

ఏపీ రాజకీయాల్లో పెను సంచలనం సృష్టించిన స్కిల్ డెవలప్‌మెంట్ కేసులో కీలక మలుపు చోటుచేసుకుంది. ఈ కేసును విచారిస్తున్న విజయవాడ ఏసీబీ ప్రత్యేక కోర్టు, సీఐడీ సమర్పించిన నివేదికను పరిగణనలోకి తీసుకుంటూ కేసును పూర్తిగా మూసివేస్తున్నట్లు ప్రకటించింది. గత ప్రభుత్వ హయాంలో నమోదైన ఈ కేసులో సరైన ఆధారాలు లేవని, ఇది కేవలం 'మిస్టేక్ ఆఫ్ ఫ్యాక్ట్' (తప్పుడు సమాచారంతో కూడినది) అని కోర్టు స్పష్టం చేస్తూ సంచలన తీర్పునిచ్చింది.
ముఖ్యమంత్రి నారా చంద్రబాబు నాయుడు సహా ఈ కేసులో నిందితులుగా ఉన్న మొత్తం 37 మందికి కోర్టు క్లీన్ చిట్ ఇచ్చింది. విచారణలో భాగంగా సేకరించిన అంశాలు నేరాన్ని నిరూపించేలా లేవని పేర్కొంటూ, వారందరిపై ఉన్న అభియోగాలను కొట్టివేస్తూ విముక్తి కల్పించింది. సుదీర్ఘ కాలంగా కొనసాగుతున్న ఈ న్యాయపోరాటం చివరకు నిందితులందరికీ అనుకూలంగా ముగియడం రాష్ట్ర రాజకీయ వర్గాల్లో పెద్ద చర్చకు దారితీసింది.
ఈ తీర్పు వెలువడక ముందే స్టేట్ స్కిల్ డెవలప్‌మెంట్ కార్పొరేషన్ మాజీ ఛైర్మన్ కె. అజయ్ రెడ్డి దాఖలు చేసిన పిటిషన్‌ను న్యాయస్థానం తోసిపుచ్చింది. తీర్పు ఇచ్చే ముందు తన వాదనలను కూడా వినాలని ఆయన కోర్టును అభ్యర్థించగా, అందుకు న్యాయమూర్తి నిరాకరించారు. ఇప్పటికే అన్ని అంశాలను పరిశీలించినట్లు భావించిన కోర్టు, అజయ్ రెడ్డి అభ్యర్థనలో తగిన కారణాలు లేవని పేర్కొంటూ ఆ పిటిషన్‌ను తిరస్కరించి, తుది ఉత్తర్వులను వెలువరించింది.
ఈ పరిణామంతో గత కొన్నాళ్లుగా తెలుగుదేశం పార్టీ శ్రేణులను, చంద్రబాబు నాయుడును ఉక్కిరిబిక్కిరి చేసిన స్కిల్ డెవలప్‌మెంట్ వివాదానికి తెరపడింది. ఎట్టకేలకు న్యాయస్థానం కేసును క్లోజ్ చేయడంతో సీఎం చంద్రబాబుకు పెద్ద ఊరట లభించినట్లయింది. విచారణ సంస్థల నివేదికల ఆధారంగానే కోర్టు ఈ నిర్ణయం తీసుకోవడం గమనార్హం, ఇది భవిష్యత్తులో రాజకీయంగా కూడా కీలక ప్రభావం చూపే అవకాశం ఉందని విశ్లేషకులు భావిస్తున్నారు.