'నాకు చనిపోవాలని లేదు నాన్న, వచ్చి కాపాడండి'.. చివరి కాల్‌లో తండ్రిని వేడుకున్న కొడుకు

'నాకు చనిపోవాలని లేదు నాన్న, వచ్చి కాపాడండి'.. చివరి కాల్‌లో తనను రక్షించమని తండ్రితో కొడుకు చెప్పిన మాటలివి. తండ్రి వెంటనే పోలీసులకు ఫోన్ చేసి.. సహాయక చర్యలు చేపట్టినా.. అతడి ప్రాణం దక్కలేదు. నొయిడాలో పొగమంచు కారణంగా రోడ్డు పక్కన ఉన్న డ్రైనేజ్ గోడను ఢీకొట్టి.. 70 అడుగుల గుంతలో పడిపోయింది 27 ఏళ్ల సాఫ్ట్‌వేర్ ఇంజినీర్ కారు. రోడ్డుపై రిఫ్లెక్టర్స్ లేకపోవడంతో.. రోడ్డు చివరి భాగం కనిపించక ఈ ప్రమాదం జరిగిందని బాధితుడి తండ్రి ఆరోపిస్తున్నాడు. కాగా, ఈ ఘటనపై స్థానికులు ఆగ్రహావేశాలు వ్యక్తం చేస్తున్నారు.

పోలీసులు తెలిపిన వివరాల ప్రకారం.. యువరాజ్ మెహతా అనే వ్యక్తి శుక్రవారం (జనవరి 16) రాత పని ముగించుకుని ఇంటికి తిరిగివస్తున్నాడు. దట్టమైన పొగమంచు, రోడ్డుపై రిఫ్లెక్టర్లు లేకపోవడం వల్ల.. యువరాజ్ కారు పక్కపక్కనే ఉన్న రెండు డ్రైనేజీ కాలువలను వేరుచేసే ఎత్తైన గట్టును ఢీకొట్టింది. అనంతరం నీటితో నిండిన 70 అడుగుల లోతైన గుంతలో పడిపోయింది. అటుగా వెళ్తున్న కొందరు మెహతా అరుపులు విని సహాయం చేయడానికి ప్రయత్నించారు. కానీ కారు పూర్తిగా నీటిలో మునిగిపోయింది. అయితే చనిపోక ముందు యువరాజ్.. తన తండ్రి రాజ్‌కుమార్ మెహతాకు ఫోన్ చేసి "నాన్న, నేను నీటితో నిండిన లోతైన గుంతలో పడిపోయాను. మునిగిపోతున్నాను. వచ్చి నన్ను కాపాడండి నాన్న. నాకు చనిపోవాలని లేదు" అని భయంతో చెప్పినట్లు తెలుస్తోంది.

కాగా, కొన్ని నిమిషాల్లోనే స్థానిక పోలీసులు, డైవర్లు, ఎన్డీఆర్ఎఫ్ బృందాలు ఘటనా స్థలానికి చేరుకుని సహాయక చర్యలు ప్రారంభించాయి. యువరాజ్ తండ్రి వారితోనే ఉన్నాడు. దాదాపు ఐదు గంటల పాటు సాగిన సహాయక చర్యల తర్వాత.. కారుతో పాటు టెకీ మృతదేహాన్ని వెలికితీశారు. కొద్ది సేపట్లో ఇంటికి వస్తాడనుకున్న కొడుకు అకస్మాత్తుగా చనిపోవడంతో.. తండ్రి కన్నీరుమున్నీరుగా విలపించాడు. ఈ దృశ్యం అక్కడున్న వారి హృదయాలను కదిలించింది.

ఈ ఘటన తర్వాత యువరాజ్ కుటుంబ సభ్యులు పోలీసులకు ఫిర్యాదు చేశారు. నోయిడా సెక్టార్ 150లోని సర్వీస్ రోడ్డు వెంబడి అధికారులు రిఫ్లెక్టర్లు ఏర్పాటు చేయలేదని ఆరోపించారు. దట్టమైన పొగమంచు ఉన్న సమయంలో.. రోడ్డు వెంబడి రిఫ్లెక్టర్లు లేకపోవడం వల్లే ప్రమాదం జరిగిందని బాధితుడి తండ్రి అన్నారు. దీనికి కారణమైన వారిపై కఠిన చర్యలు తీసుకువాలని డిమాండ్ చేశాడు. కాగా, ఈ ఘటనకు సంబంధించి నిర్లక్ష్యంగా వ్యవహరించిన వారిపై దర్యాప్తు చేసి చట్టపరమైన చర్యలు తీసుకుంటామని పోలీసులు తెలిపారు.